Ծառայութեան մէջ հմտութիւնդ բարելաւէ. Դրան առջեւ Աստուածաշունչի ուսումնասիրութիւն սկսիլ՝ գործածելով Աստուծոյ կողմէ ուրախ լուրեր գրքոյկը
Ինչո՛ւ կարեւոր է։ Աշակերտելու յանձնարարութիւնը կատարելու համար, պէտք է որ Աստուծոյ Խօսքին ուսուցիչները ըլլանք (Մատ. 28։19, 20)։ Բոլորս կրնանք ճշմարտութիւնը ազդու կերպով ուսուցանել՝ գործածելով մեզի մատչելի եղող գործիքները։ Աստուծոյ կողմէ ուրախ լուրեր գրքոյկը մասնաւորաբար պատրաստուած է մեզի օգնելու, որ ճշմարտութիւնը ուրիշներուն սորվեցնենք։ Իրականութեան մէջ, կրնանք զայն գործածել տանտիրոջ հետ իր դրան առջեւ Աստուածաշունչի ուսումնասիրութիւն մը սկսելու համար առաջին հանդիպումին։
Ինչպէ՛ս ընել։
• Շրջանակին մէջ գտնուող ներկայացումը աչքէ անցուր (տե՛ս նաեւ Մեր Թագաւորութեան ծառայութիւնը թերթիկին մարտ 2013 թիւը)։
• Գրքոյկին անձնական օրինակդ ծառայութեան պայուսակիդ մէջ դիր։ Վստահ եղիր որ առաջարկելու համար բաւարար գրքոյկներ ունիս։
• Տանտիրոջ հետ միայն մէկ կամ երկու պարբերութիւն նկատի առ եւ դրան առջեւ առաւելագոյնը տասը վայրկեան կեցիր։
Այս ամսուան ընթացքին, հետեւեալը փորձէ.
• Աղօթքով Եհովային յայտնէ թէ կը փափաքիս ուսումնասիրութիւն մը ունենալ։ Նաեւ Եհովային աղաչէ որ քեզի օգնէ Աստուածաշունչի ուսումնասիրութիւն մը սկսելու եւ ճշմարտութեան ազդու ուսուցիչ մը դառնալու (Փլպ. 2։13)։
• Ընտանեկան պաշտամունքի կամ անձնական ուսումնասիրութեան ընթացքին, ներկայացումը սորվելու ժամանակ տրամադրէ։ Այսպիսով, պիտի կարենաս ծառայութեան մէջ համոզումով խօսիլ եւ դրան առջեւ Աստուածաշունչի ուսումնասիրութիւն մը սկսիլ։
[Շրջանակ՝ էջ 1]
Տունէ տուն ծառայութեան ելլելու ատեն։
«Եկած ենք ձեր կարծիքը առնելու նիւթի մը շուրջ։ Մարդիկ մտահոգ են թէ աշխարհը ո՛ւր կ’երթայ։ Կը կարծէ՞ք թէ վիճակները երբեք պիտի բարելաւուին։ [Թոյլ տուր որ պատասխանէ։] Շատեր կը զարմանան, երբ գիտնան թէ Աստուածաշունչը կը բովանդակէ ուրախ լուրեր, որոնք մեզի յոյս կու տան։ Նկատի առէք այս կարգ մը հարցումները, որոնց Աստուածաշունչը կը պատասխանէ»։ Տանտիրոջ տուր գրքոյկէն օրինակ մը, եւ իրմէ խնդրէ որ ետեւի կողքէն ընտրէ զինք հետաքրքրող հարցում մը։ Ապա իր ընտրած դասը բաց եւ ցոյց տուր թէ ինչպէ՛ս մարդոց հետ կ’ուսումնասիրենք։ Կարգադրութիւններ ըրէ վերադառնալու, որպէսզի այդ դասին յաջորդ հարցումը նկատի առնես։