Ծառայութեան մէջ հմտութիւնդ բարելաւէ. Աստուածաշունչը կը սորվեցնէ գիրքը առաջարկել

Ինչո՛ւ կարեւոր է։ Աստուածաշունչը կը սորվեցնէ գիրքը հիմնական գործիք մըն է մեր ուսուցանելու գործիքներու տուփին մէջ։ Բայց առաջ որ անհատի մը հետ այս գիրքը ուսումնասիրենք, պէտք է որ զայն տեղաւորենք։ Ուստի հարկ է որ բոլորս ջանանք հմուտ ըլլալ Աստուածաշունչը կը սորվեցնէ գիրքը ծառայութեան մէջ առաջարկելու (Առ. 22։29)։ Տեղաւորելու շատ կերպեր կան, եւ հրատարակիչները պէտք է ընտրեն յարմարագոյն կերպը։

Ինչպէ՛ս առաջարկել։

• Տանտիրոջ հարցուր հետաքրքրաշարժ հարցում մը, որպէսզի կարենաս զինք ուղղել գիրքին որոշ մէկ գլուխին։ Կրնաս նոյնիսկ ընտրել իւրաքանչիւր գլուխի սկիզբը նշուած հարցումներէն մէկը։ Տանտիրոջ պատասխանը մտիկ ընելէ ետք, կարդա՛ յարմար համար մը եւ իրեն ցոյց տուր այդ նիւթին մասին պարբերութիւն մը. ապա կրնաք զայն հակիրճ կերպով քննարկել։

• Այլ կերպ մըն է սկիզբի էջերը գործածել հետաքրքրութիւն արթնցնելու եւ ապա տանտիրոջ ցոյց տալ թէ գիրքին ո՛ր գլուխը Աստուածաշունչին պատասխանը կու տայ։ Օրինակ, կրնաս ակնարկել լուրերուն մէջ վերջերս նշուած ողբերգական դէպքի մը եւ բացատրել թէ շատեր հարց տուած են էջ 3–ի վրայ նշուած հարցումներուն մասին։ Կամ կրնաս ըսել թէ մարդոց կ’այցելես իրենց հետ ապագային նկատմամբ դրական տեսակէտ մը բաժնելու համար։ Ապա ցոյց տուր էջ 4-5–ի վրայի պատկերները եւ հարցուր. «Այս խոստումներէն ո՞ր մէկուն կատարումը կ’ուզէք տեսնել»։ Այլ կերպ մըն է ըսել թէ մարդոց կարճ այցելութիւն մը կու տաս, իրենց օգնելու համար որ կեանքի կարեւոր հարցումներուն պատասխանները գտնեն։ Ապա տանտիրոջ ցոյց տուր էջ 6–ի վերջաւորութեան գտնուող հարցումները եւ հարցուր թէ ո՞ր հարցումը զինք ամէնէն շատ կը հետաքրքրէ։

• Ուղղակի առաջարկէ Աստուածաշունչի ուսումնասիրութիւն մը։ Կրնաս ըսել. «Մարդոց ցոյց կու տանք այս գիրքը, որ կ’օգնէ Աստուածաշունչը ուսումնասիրելու։ Ասկէ առաջ այս գիրքը տեսա՞ծ էք։ [Թոյլ տուր որ պատասխանէ։] Եթէ միայն քանի մը վայրկեան տրամադրէք, կը փափաքիմ ցոյց տալ թէ ինչպէ՛ս կրնաք այս գիրքը գործածել ձեր Աստուածաշունչին հետ մէկտեղ»։

Այս ամսուան ընթացքին հետեւեալը փորձէ.

• Ընտանեկան պաշտամունքիդ ընթացքին փորձի նիստեր ունեցիր։

• Ծառայութեան մէջ, այլ հրատարակիչներու ըսէ թէ բացումդ ի՛նչ է (Առ. 27։17)։ Եթէ ներկայացումդ ազդու չէ, զայն փոխէ։