Պարբերաթերթեր տեղաւորելէ ետք ի՛նչպէս Աստուածաշունչի ուսումնասիրութիւններ սկսիլ

1. Պարբերաթերթեր տեղաւորելու ատեն մեր նպատակը ի՞նչ է։

¹ Ընդհանրապէս Շաբաթ օրերը ծառայութեան մէջ Դիտարան ու Զարթի՛ր պարբերաթերթերը կը ներկայացնենք։ Սակայն ասիկա պարզապէս առաջին քայլն է, պարկեշտամիտ անհատներուն ճշմարտութիւնը սորվեցնելու համար։ Վարը նշուած են կարգ մը թելադրութիւններ թէ ի՛նչպէս կրնանք վերայցելութեան մը ընթացքին Աստուածաշունչը կը սորվեցնէ գիրքը տեղաւորել, ապա Աստուածաշունչի ուսումնասիրութիւն մը սկսիլ։ Կրնաս ասոնք թաղամասիդ յարմարցնել եւ քու բառերովդ գործածել։ Ազատ զգայ ուրիշ մօտեցում մը գործածելու, եթէ քեզի գործնական է։

2. Ի՞նչպէս կրնանք Աստուածաշունչը կը սորվեցնէ գրքին բացման էջերը գործածել, Աստուածաշունչի ուսումնասիրութիւն մը սկսելու համար։

² Բացման էջերը գործածէ. Երբ վերադառնաս, կրնաս ըսել. «Քեզի տուած պարբերաթերթերս ուշադրութիւնդ կ’ուղղեն Աստուածաշունչին։ Նկատի առ թէ Աստուածաշունչ կարդալը ինչո՛ւ այդքան կարեւոր է»։ Կարդա՛ Եսայի 48։17, 18–ը, Յովհաննէս 17։3–ը, կամ ուրիշ յարմար համար մը։ Աստուածաշունչը կը սորվեցնէ գիրքը ներկայացնելէ եւ տանտիրոջ օրինակ մը տալէ ետք, կրնաս սապէս շարունակել.

◼ «Աստուածաշունչը ապագային համար իսկական յոյս մը կու տայ»։ Տանտիրոջ ցոյց տուր էջ 4-5–ը, ապա հարցուր. «Այս խոստումներէն ո՞ր մէկը կ’ուզես որ իրականանայ»։ Անոր ուշադրութեան յանձնէ այն գլուխը որ իր ընտրած աստուածաշնչական խոստումը կը քննարկէ, եւ եթէ թոյլատրէ, հակիրճօրէն մէկ կամ երկու պարբերութիւններ նկատի առ։

◼ Կամ կրնաս ըսել. «Աստուածաշունչը կեանքի ամենակարեւոր հարցումներուն կը պատասխանէ»։ Անոր ուշադրութեան յանձնէ էջ 6–ը, եւ հարցուր եթէ բնաւ իր մտքէն անցած է էջին վարը գտնուող հարցումներէն որեւէ մէկը։ Պատասխանը նկատի առնող գլուխը բաց եւ հակիրճօրէն քննարկէ մէկ կամ երկու պարբերութիւն։

◼ Կամ կրնաս բովանդակութեան մէջ նշուած կարգ մը խորագիրներուն ակնարկութիւն ընել եւ հարցնել թէ նիւթերէն ո՛ր մէկը զինք կը հետաքրքրէ։ Նշուած գլուխը բաց եւ հակիրճօրէն ցուցադրէ Աստուածաշունչի ուսումնասիրութիւն մը։

3. Ի՞նչպէս կրնանք Աստուածաշունչի ուսումնասիրութիւն մը սկսիլ երբ տեղաւորենք պարբերաթերթեր, որոնք կը քննարկեն (ա) աշխարհի վատթարացող վիճակները, (բ) ընտանիքը, (գ) Աստուածաշունչին վստահելի ըլլալը։

³ Առաջին այցելութեան աւարտին հարցում մը ուղղէ. Ուրիշ ընտրութիւն մըն է՝ առաջին հանդիպումին վերայցելութեան համար գետին պատրաստել։ Տանտէրը մեր պարբերաթերթերը ընդունելէ ետք, անոր հարցում մը ուղղէ եւ խոստացիր պատասխանը տալ յաջորդ այցելութեան։ Ջանա՛ վերայցելելու հաստատ կարգադրութիւններ ընել եւ ժամադրութիւնդ յարգէ։ (Մատթ. 5։37) Երբ վերադառնաս, ուղղած հարցումդ դարձեալ նշէ, Աստուածաշունչը կը սորվեցնէ գրքէն հակիրճօրէն պատասխանը կարդա՛ ու քննարկէ։ Գրքէն օրինակ մը տանտիրոջ տուր, որպէսզի քեզի հետեւի։ Հետեւեալները քանի մը օրինակներ են.

◼ Եթէ տեղաւորած պարբերաթերթդ կը քննարկէ աշխարհի վատթարացող վիճակները, կրնաս ըսել. «Յաջորդ անգամին կրնանք նկատի առնել Աստուածաշունչին պատասխանը սա հարցումին. ‘Աստուած երկրի վրայ ի՞նչ փոփոխութիւններ պիտի կատարէ’»։ Երբ վերադառնաս, 4-5–րդ էջերը գործածէ։ Կամ կրնաս սա հարցումը ուղղել. «Ողբերգութիւնները Աստուծոյ կա՞մքն են»։ Վերայցելութեան՝ տանտիրոջ ցոյց տուր առաջին գլուխին 7-8–րդ պարբերութիւնները։

◼ Եթէ տեղաւորած պարբերաթերթդ ընտանիքի վերաբերեալ նիւթ մը կը քննարկէ, մեկնելէ առաջ կրնաս սա հարցումը ուղղել. «Ընտանիքի իւրաքանչիւր անդամ ի՞նչ կրնայ ընել, որպէսզի ընտանեկան կեանքը աւելի ուրախ ըլլայ»։ Երբ վերադառնաս, 14–րդ գլուխին 4–րդ պարբերութիւնը նկատի առ։

◼ Եթէ տեղաւորած պարբերաթերթդ Աստուածաշունչին վստահելի ըլլալուն մասին է, յաջորդ այցելութեանդ համար կրնաս սա հարցումը ուղղել. «Աստուածաշունչը գիտականօրէն ճշգրի՞տ է»։ Վերայցելութեան՝ նկատի առ 2–րդ գլուխին 8–րդ պարբերութիւնը։

4. Ի՞նչ պէտք է ընենք եթէ տանտէրը Աստուածաշունչը կը սորվեցնէ գիրքը չընդունի։

⁴ Իւրաքանչիւր քննարկման վերջաւորութեան, հարցում մը ուղղէ որ յաջորդ այցելութեան կ’ուզես նկատի առնել։ Անմիջապէս որ կանոնաւոր ուսումնասիրութիւն մը հաստատուի, գիրքը հետեւողական կերպով նկատի առ՝ սկիզբէն մինչեւ վերջը։ Իսկ եթէ տանտէրը Աստուածաշունչը կը սորվեցնէ գիրքը չընդունի, կրնաս շարունակել պարբերաթերթեր բերել եւ իրեն հետ աստուածաշնչական զրոյցներ ունենալ։ Մինչ իր հետաքրքրութիւնը կը մշակես, ժամանակի ընթացքին թերեւս Աստուածաշունչի ուսումնասիրութիւն մը ընդունի։

5. Ինչո՞ւ պէտք է ջանանք պարբերաթերթեր տեղաւորելէն աւելին ընել։

⁵ Դիտարան ու Զարթի՛ր պարբերաթերթերը կրնան անհատի մը փափաքը արթնցնել, գիտնալու համար թէ Աստուածաշունչը իրապէս ի՛նչ կը սորվեցնէ։ Հետեւաբար, մասնայատուկ ջանք թափէ, որպէսզի պարբերաթերթերը տեղաւորելէ ետք կարենաս Աստուածաշունչի ուսումնասիրութիւններ սկսիլ։ Այս կերպով, ‘աշակերտելու եւ սորվեցնելու’ Յիսուսի պատուէրին հնազանդած կ’ըլլանք։—Մատթ. 28։19, 20