Կրթութիւնը՝ Եհովան փառաբանելու համար գործածենք
«Ան որ ինքնիրմէ կը խօսի, իր անձին փառքը կը փնտռէ, բայց ան որ զինք ղրկողին փառքը կը փնտռէ, անիկա ճշմարիտ է»։—ՅՈՎՀԱՆՆՈՒ 7։18
1. Կրթութիւնը ե՞րբ եւ ինչպէ՞ս սկսաւ։
ԿՐԹՈՒԹԻՒՆԸ շա՜տ երկար ժամանակ առաջ սկսաւ։ Անիկա սկսաւ երբ Եհովա Աստուած՝ Մեծ Դաստիարակը եւ Ուսուցիչը՝ իր անդրանիկ Որդին ստեղծեց։ (Եսայեայ 30։20, ՆԱ. Կողոսացիս 1։15) Ահաւասիկ մէկը որ ուղղակի Մեծ Դաստիարակէն պիտի կարենար սորվիլ։ Անհամար հազարամեակներու ընթացքին, Հօրը հետ մտերիմ ընկերակցութիւն վայելելով, այդ Որդին՝ որ հետագային ճանչցուեցաւ որպէս Յիսուս Քրիստոս՝ թանկարժէք կրթութիւն ստացաւ Եհովա Աստուծոյ յատկութիւններուն, գործերուն եւ նպատակներուն մասին։ Հետագային, երբ որպէս մարդ երկրի վրայ եկաւ, Յիսուս կրցաւ ըսել. «Ինքնիրմէս բան մը չեմ ըներ, հապա Հայրս ինչպէս ինծի սորվեցուց՝ այնպէս կը խօսիմ»։—Յովհաննու 8։28
2-4. (ա) Ըստ Յովհաննու 7–րդ գլուխին, պարագաները ի՞նչ էին երբ Յիսուս Հ.Դ. 32–ի Տաղաւարահարաց Տօնին ներկայ եղաւ։ (բ) Յիսուսի ուսուցանելու կարողութիւնը ի՞նչու կը զարմացնէր Հրեաները։
2 Յիսուս իր ստացած կրթութիւնը ինչպէ՞ս գործածեց։ Իր երկրային ծառայութեան ընթացքին, երեքուկէս տարի, իր սորված բաները անխոնջօրէն ուրիշներու հետ բաժնեց։ Ասիկա ըրաւ իր մտքին մէջ գլխաւոր նպատակ մը ունենալով։ Ի՞նչ էր այդ նպատակը։ Քննենք Յիսուսի խօսքերը Յովհաննու 7–րդ գլուխին մէջ, ուր ան բացատրեց իր ուսուցումին թէ՛ ծագումը եւ թէ նպատակը։
3 Նախ նկատի առնենք տեսարանը։ Հ.Դ. 32–ի աշունն էր, Յիսուսի մկրտութենէն գրեթէ երեք տարի ետք։ Հրեաները Երուսաղէմի մէջ հաւաքուած էին Տաղաւարահարաց Տօնին համար։ Տօնախմբութեան առաջին օրերուն շատ խօսակցութիւններ կը դառնային Յիսուսի մասին։ Տօնախմբութեան կիսուն, Յիսուս տաճար գնաց ու սկսաւ սորվեցնել։ (Յովհաննու 7։2, 10–14) Ինչպէս միշտ, ան փաստեց որ մեծ Ուսուցիչ մըն էր։—Մատթէոս 13։54. Ղուկաս 4։22
4 Յովհաննու 7–րդ գլուխին 15–րդ համարը կ’ըսէ. «Հրեաները կը զարմանային ու կ’ըսէին. ‘Ի՞նչպէս ասիկա գրքերը գիտէ, որ սորված չէ’»։ Կը հասկնա՞ք թէ անոնք ինչու շփոթած էին։ Յիսուս ռաբունական դպրոց յաճախած չէր, ուստի, իրենց կարծիքով անուս էր։ Սակայն, Յիսուս Սրբազան Գրութիւններէն դիւրութեամբ հատուածներ կրնար գտնել եւ կարդալ։ (Ղուկաս 4։16–21) Այս Գալիլիացի ատաղձագործը նոյնիսկ Մովսէսի Օրէնքը կը սորվեցնէր անոնց։ (Յովհաննու 7։19–23) Ասիկա ինչպէ՞ս կարելի էր։
5, 6. (ա) Յիսուս իր ուսուցումին աղբիւրը ինչպէ՞ս ցոյց տուաւ։ (բ) Յիսուս իր ստացած կրթութիւնը ի՞նչ կերպով գործածեց։
5 Յիսուս բացատրեց, ինչպէս կը կարդանք 16 եւ 17–րդ համարներուն մէջ. «Իմ վարդապետութիւնս իմս չէ, հապա զիս ղրկողինն է։ Եթէ մէկը կ’ուզէ անոր կամքը ընել, պիտի գիտնայ այս վարդապետութեան համար թէ արդեօք Աստուծմէ՞ է՝ թէ ես ինքնիրմէս կը խօսիմ»։ Անոնք ուզեցին գիտնալ թէ Յիսուս իր կրթութիւնը ո՞րմէ ստացած էր. ուստի, անոնց բացայայտօրէն ըսաւ որ իր կրթութիւնը Աստուծմէ ստացած էր։—Յովհաննու 12։49. 14։10
6 Յիսուս իր ստացած կրթութիւնը ինչպէ՞ս գործածեց։ Ինչպէս արձանագրուած է Յովհաննու 7։18–ին մէջ, Յիսուս ըսաւ. «Ան որ ինքնիրմէ կը խօսի, իր անձին փառքը կը փնտռէ, բայց ան որ զինք ղրկողին փառքը կը փնտռէ, անիկա ճշմարիտ է եւ անոր քով անիրաւութիւն չկայ»։ Որքա՜ն տեղին էր որ Յիսուս իր ստացած կրթութիւնը գործածէր «իմաստութեամբ կատարեալ եղողին»՝ Եհովայի՝ փառք բերելու համար։—Յոբայ 37։16
7, 8. (ա) Կրթութիւնը ինչպէ՞ս պէտք է գործածենք։ (բ) Հաւասարակշռուած կրթութեան չորս հիմնական նպատակակէտերը ի՞նչ են։
7 Ուստի, Յիսուսէ արժէքաւոր դաս մը կը սորվինք. կրթութիւնը պէտք է գործածենք ո՛չ թէ մենք մեզ փառաւորելու համար, այլ Եհովան փառաբանելու համար։ Ասկէ աւելի լաւ կերպով կարելի չէ գործածել կրթութիւնը։ Բայց ինչպէ՞ս կրնանք զայն գործածել Եհովան փառաբանելու համար։
8 Կրթել կը նշանակէ «պաշտօնական հրահանգով եւ վերահսկուած վարժութեամբ՝ մարզել, մանաւանդ հմտութեան մը, վաճառականութեան կամ արհեստի մը մէջ»։ Արդ, հաւասարակշռուած կրթութեան չորս հիմնական նպատակակէտեր նկատի առնենք եւ տեսնենք թէ անոնցմէ իւրաքանչիւրը ինչպէ՛ս կարելի է գործածել Եհովան փառաբանելու համար։ Հաւասարակշռուած կրթութիւնը պէտք է մեզի օգնէ (1) լաւ կարդալու, (2) ընթեռնելի կերպով գրելու, (3) մտային եւ բարոյական գետնի վրայ զարգանալու եւ (4) առօրեայ ապրելակերպի համար հարկ եղած գործնական մարզում ձեռք ձգելու։
Լաւ Կարդալ Սորվիլ
9. Ինչո՞ւ կարեւոր է լաւ ընթերցող մը ըլլալ։
9 Առաջին հերթին կու գայ՝ լաւ կարդալ սորվիլ։ Ինչո՞ւ այդքան կարեւոր է լաւ ընթերցող մը ըլլալ։ Համայնագիտարան մը (The World Book Encyclopedia) կը բացատրէ. «Կարդալը . . . հիմնական է սորվելու համար եւ առօրեայ կեանքին մէջ ամենէն կարեւոր հմտութիւններէն մէկն է։ . . . Հմուտ ընթերցողները բարգաւաճ, արդիւնաբեր ընկերութիւն մը ստեղծելու կը նպաստեն։ Միեւնոյն ատեն, անոնք աւելի լեցուն ու աւելի գոհացուցիչ կեանք մը կը վայելեն»։
10. Աստուծոյ Խօսքը կարդալը ինչպէ՞ս մեզի կ’օգնէ որ աւելի ճոխ եւ աւելի գոհացուցիչ կեանք մը վայելենք։
10 Եթէ կարդալը սովորաբար մեզի կ’օգնէ որ ‘աւելի լեցուն եւ աւելի գոհացուցիչ կեանք մը վայելենք’, որքան աւելի՝ Աստուծոյ Խօսքը կարդալը։ Աստուծոյ Խօսքը կարդալը մեր մտքերն ու սրտերը Եհովայի խորհուրդներով եւ նպատակներով լեցուելու կը նպաստէ եւ զանոնք յստակօրէն հասկնալը մեր կեանքին իմաստ մը կու տայ։ Ասկէ զատ, «Աստուծոյ խօսքը կենդանի է ու զօրեղ», կ’ըսէ Եբրայեցիս 4։12–ը։ Երբ կը կարդանք Աստուծոյ Խօսքը եւ անոր վրայ կը մտածենք, անոր Հեղինակին հետ աւելի կը մտերմանանք եւ կը մղուինք մեր կեանքին մէջ փոփոխութիւններ մտցնել, իրեն հաճելի դառնալու համար։ (Գաղատացիս 5։22, 23. Եփեսացիս 4։22–24) Նաեւ, մեր կարդացած թանկագին ճշմարտութիւնները ուրիշներուն հետ բաժնելու մղումը կ’ունենանք։ Այս բոլորը կը փառաբանեն Մեծ Դաստիարակը՝ Եհովա Աստուած։ Վստահաբար, կարդալու մեր կարողութիւնը աւելի լաւ կերպով գործածելու ուրիշ կերպ մը չկա՛յ։
11. Անձնական ուսումնասիրութեան հաւասարակշռուած յայտագիր մը ի՞նչ պէտք է բովանդակէ։
11 Ըլլանք երիտասարդներ թէ տարեցներ, պէտք է լաւ կարդալ սորվինք, քանի որ կարդալը կարեւոր դեր մը ունի մեր Քրիստոնէական կեանքին մէջ։ Աստուծոյ Խօսքը կանոնաւորաբար կարդալէ զատ, անձնական ուսումնասիրութեան հաւասարակշռուած յայտագիր մը պէտք է բովանդակէ՝ Աստուածաշունչը Քննենք Ամէն Օր խորագրով գրքոյկէն օրուան համարը նկատի առնել, Դիտարանը եւ Զարթի՛րը ամբողջութեամբ կարդալ եւ Քրիստոնէական ժողովներու պատրաստուիլ։ Իսկ ի՞նչ կրնանք ըսել Քրիստոնէական ծառայութեան մասին։ Շատ որոշ է որ հանրային քարոզչութիւնը, հետաքրքրուող անհատներու վերայցելութիւններ ընելը եւ տան սուրբ գրային ուսումնասիրութիւններ վարելը լաւ կարդալու կարողութիւն կը պահանջեն։
Յստակօրէն Գրել Սորվիլ
12. (ա) Ինչո՞ւ կարեւոր է որ յստակօրէն գրել սորվինք։ (բ) Որեւէ ժամանակի ամենէն արժէքաւոր գրութիւնը ո՞րն էր։
12 Երկրորդ նպատակակէտը այն է որ հաւասարակշռուած կրթութիւնը պէտք է մեզի օգնէ որ յստակօրէն գրել սորվինք։ Գրելը ոչ միայն ուրիշներուն կը փոխանցէ մեր խօսքերն ու գաղափարները, այլ նաեւ՝ զանոնք կը պահպանէ։ Դարե՜ր առաջ, շուրջ 40 Հրեաներ պապիրոսներու կամ մորթերու վրայ խօսքեր գրեցին, որոնք ներշնչեալ Սուրբ Գրութիւնները կազմեցին։ (Բ. Տիմոթէոս 3։16) Վստահաբար ասիկա որեւէ ժամանակի ամենէն արժէքաւոր գրութիւնը եղաւ։ Անկասկած Եհովա դարերու ընթացքին առաջնորդեց այդ սրբազան խօսքերուն ընդօրինակութիւնը եւ վերընդօրինակութիւնը, այնպէս որ անոնք մեր ձեռքերը հասան վաւերական կերպով։ Երախտապարտ չե՞նք որ Եհովա իր խօսքերը գրութեան վերածեց, փոխանակ զանոնք բերանացի կերպով փոխանցելու։—Բաղդատել Ելից 34։27, 28։
13. Ի՞նչ բան ցոյց կու տայ որ Իսրայելացիները գրել գիտէին։
13 Վաղեմի ժամանակներուն, միայն առանձնաշնորհեալ դասակարգեր ուսեալ էին, ինչպէս, Միջագետքի եւ Եգիպտոսի մէջ, դպիրները։ Ասոր ճիշդ հակառակը, Իսրայէլի մէջ իւրաքանչիւր անհատ գրագէտ ըլլալու քաջալերութիւն ստացած էր։ Բ. Օրինաց 6։8, 9–ի մէջ իրենց դրանդիքներուն վրայ գրելու Իսրայելացիներուն տրուած խրատը, որ հաւանաբար փոխաբերական առումով էր, կը նշանակէր որ անոնք գրել գիտէին։ Կանուխ հասակէն, մանուկներուն գրել կը սորվեցնէին։ Կարգ մը ուսումնականներ կը խորհին որ Գազերի Տոմարը, վաղեմի Եբրայերէն գրութեան ամենահին մէկ օրինակը, դպրոցական տղու մը գոց սորվելու վարժութիւնը ըլլալու էր։
14, 15. Գրելու կարողութիւնը գործածելու կարգ մը օգտակար եւ շինիչ կերպերը ի՞նչ են։
14 Բայց ինչպէ՞ս կրնանք գրելու մեր կարողութիւնը գործածել օգտակար եւ շինիչ կերպով։ Վստահաբար Քրիստոնէական ժողովներու ու համաժողովներու ընթացքին նոթեր առնելով։ Նամակ մը, նոյնիսկ «համառօտ» կերպով գրուած, կրնայ հիւանդ մը քաջալերել, կամ ազնուութիւն եւ հիւրասիրութիւն ցոյց տուած հոգեւոր եղբօր մը կամ քրոջ մը շնորհակալութիւն յայտնել։ (Ա. Պետրոս 5։12) Եթէ ժողովքին մէջ մէկը սիրելի մը կորսնցուցած է, կարճ նամակ մը կամ բացիկ մը կրնայ մեր կողմէ ‘մխիթարել’ զինք։ (Ա. Թեսաղոնիկեցիս 5։14) Քոյր մը որ քաղցկեղով իր մայրը կորսնցուց, բացատրեց. «Բարեկամ մը սիրուն նամակ մը գրեց ինծի։ Ատիկա շա՜տ օգնեց ինծի, քանի որ կրկին ու կրկին կարդացի»։
15 Գրելու կարողութիւնը գործածելու լաւագոյն կերպերէն մէկն է Եհովան փառաբանել, Թագաւորութեան պատգամը տալու համար նամակ մը գրելով։ Երբեմն հարկ կ’ըլլայ մեկուսի վայր մը բնակող նոր հետաքրքրուած անհատի մը հետ կապ պահել։ Երբեմն, հիւանդութիւնը ձեզի արգելք կրնայ հանդիսանալ տունէ տուն երթալու։ Այդ պարագային թերեւս նամակը կրնայ ըսել ինչ որ դուք անձամբ պիտի ըսէիք։
16, 17. (ա) Ո՞ր փորձառութիւնը Թագաւորութեան պատգամը տալու համար նամակ գրելու արժէքը կ’ապացուցանէ։ (բ) Նոյնանման փորձառութիւն մը կրնա՞ք պատմել։
16 Փորձառութիւն մը նկատի առնենք։ Տարիներ առաջ, քոյր մը տեղւոյն լրագրին մէջ մարդու մը մահազդը կարդաց եւ անոր այրի կնոջ նամակով մը Թագաւորութեան պատգամը տուաւ։ Պատասխան չստացաւ։ Ապա, 1994–ի Նոյեմբերին, 21 տարի ետք, քոյրը այս կնոջ աղջկէն նամակ մը ստացաւ, ուր կ’ըսէր.
17 «1973–ի Ապրիլին դուք իմ մօրս նամակ մը գրած էիք, իմ հօրս մահուան առթիւ զինք մխիթարելու համար։ Այդ ժամանակ ես ինը տարեկան էի։ Մայրս Աստուածաշունչը ուսումնասիրեց, բայց տակաւին Եհովայի ծառայ մը չէ։ Սակայն, իր ուսումնասիրութիւնը պատճառ եղաւ որ ես ճշմարտութեան ծանօթանամ։ Ես սկսայ Աստուածաշունչը ուսումնասիրել 1988–ին, ձեր նամակը ստանալէն 15 տարի ետք։ 9 Մարտ 1990–ին մկրտուեցայ։ Շա՜տ շնորհակալ եմ տարիներ առաջ ձեր գրած նամակին համար եւ ուզեցի որ գիտնաք թէ ձեր ցանած սերմերը Եհովայի օգնութեամբ աճեցան։ Մայրս ձեր նամակը ինծի տուաւ որ պահեմ եւ ես շատ կը փափաքիմ ձեզ ճանչնալ։ Կը յուսամ որ այս նամակը ձեր ձեռքը հասնի»։ Աղջկան նամակը, որու մէջ կար իր հասցէն եւ հեռաձայնի համարը, արդարեւ հասաւ այն քրոջ ձեռքը, որ տարիներ առաջ գրած էր իր մօրը։ Երեւակայեցէք երիտասարդ կնոջ զարմանքը, երբ քրոջմէն հեռաձայն ստացաւ։ Այս քոյրը տակաւին կը շարունակէ նամակներ գրել, Թագաւորութեան պատգամը ուրիշներուն հետ բաժնելու համար։
Մտային, Բարոյական եւ Հոգեւոր Գետնի Վրայ Զարգանալ
18. Աստուածաշունչի ժամանակներուն, ծնողները իրենց զաւակներուն մտային եւ բարոյական կրթութեան ի՞նչպէս հոգ կը տանէին։
18 Երրորդ նպատակակէտը այն է որ հաւասարակշռուած կրթութիւնը մեզի կ’օգնէ մտային ու բարոյական գետնի վրայ զարգանալու։ Աստուածաշունչի ժամանակներուն, երախաներուն մտային ու բարոյական զարգացումը ծնողներուն գլխաւոր պարտականութիւններէն մէկը նկատուած էր։ Երախաներուն ոչ միայն գրել ու կարդալ կը սորվեցնէին, այլ նաեւ, աւելի կարեւորը, Աստուծոյ Օրէնքով կը կրթէին զանոնք, որ իրենց կեանքին բոլոր մարզերը կը բովանդակէր։ Այս կերպով, կրթութիւնը կը պարփակէր իրենց կրօնական պարտականութիւններուն, ամուսնութեան վերաբերեալ սկզբունքներուն, ընտանեկան յարաբերութիւններուն եւ սեռային բարոյականութեան, ինչպէս նաեւ իրենց նմաններուն նկատմամբ իրենց պարտականութեանց մասին՝ հրահանգներ։ Այսպիսի կրթութիւն մը անոնց օգնեց ոչ միայն մտային եւ բարոյական գետնի վրայ զարգանալու, այլ նաեւ՝ հոգեւոր։—Բ. Օրինաց 6։4–9, 20, 21. 11։18–21
19. Ո՞ւր կրնանք գտնել կրթութիւն մը, որ մեր կեանքը վարելու համար բարոյական լաւագոյն արժէքներ տայ մեզի, ինչպէս նաեւ հոգեւոր գետնի վրայ զարգանալու օգնէ։
19 Ի՞նչ կրնանք ըսել հիմակուան մասին։ Աշխարհային լաւ կրթութիւն մը կարեւոր է։ Անիկա մեզի կ’օգնէ որ մտային գետնի վրայ զարգանանք։ Բայց ո՞ւր կրնանք գտնել կրթութիւն մը, որ մեր կեանքը վարելու համար բարոյական լաւագոյն արժէքներ տայ մեզի, ինչպէս նաեւ, հոգեւոր գետնի վրայ զարգանալու օգնէ։ Քրիստոնէական ժողովքին մէջ աստուածպետական կրթութեան յայտագիր մը ունինք, որ երկրի վրայ ուրիշ ո՛րեւէ տեղ մատչելի չէ։ Աստուածաշունչի եւ Սուրբ Գրային գրականութիւններու անձնական ուսումնասիրութեամբ, ինչպէս նաեւ ժողովներուն ու համաժողովներուն տրուած խրատներով, կրնանք այս թանկարժէք, շարունակական կրթութիւնը՝ աստուածային կրթութիւնը՝ ձրիօրէն ստանալ։ Անիկա ի՞նչ կը սորվեցնէ մեզի։
20. Աստուածային կրթութիւնը մեզի ի՞նչ կը սորվեցնէ, եւ ի՞նչ արդիւնքներ յառաջ բերելով։
20 Երբ սկսինք Աստուածաշունչը ուսումնասիրել, սուրբ գրային հիմնական, կամ, «նախնական» վարդապետութիւնները կը սորվինք։ (Եբրայեցիս 6։1) Մինչ կը յարատեւենք, «հաստատուն կերակուր», այսինքն, աւելի խորունկ ճշմարտութիւններ կը ստանանք։ (Եբրայեցիս 5։14) Անկէ աւելին, աստուածային սկզբունքներ կը սորվինք, որոնք մեզի կ’օգնեն Աստուծոյ ուզած կերպով ապրելու։ Օրինակ, կը սորվինք ‘մարմինը պղծող’ սովորութիւններէն խուսափիլ, հեղինակութեան եւ ուրիշներու ու անոնց ստացուածքին հանդէպ, յարգանք ունենալ։ (Բ. Կորնթացիս 7։1. Տիտոս 3։1, 2. Եբրայեցիս 13։4) Ասոնցմէ զատ, գործի մէջ պարկեշտ եւ աշխատասէր ըլլալու կարեւորութիւնը եւ սեռային բարոյական հարցերու մէջ, Աստուածաշունչի պատուէրներուն համաձայն ապրելու արժէքը գնահատել կը սորվինք։ (Ա. Կորնթացիս 6։9, 10. Եփեսացիս 4։28) Մինչ այս սկզբունքները մեր կեանքին մէջ կիրարկելու ջանք կը թափենք, հոգեւորապէս կը յառաջդիմենք եւ Աստուծոյ հետ մեր յարաբերութիւնը աւելի կը խորանայ։ Նաեւ, ուր որ ալ ապրինք, մեր բարեպաշտ վարքը մեզ լաւ քաղաքացիներ կը դարձնէ։ Իսկ ասիկա կրնայ ուրիշները մղել որ աստուածային կրթութեան Աղբիւրը՝ Եհովա Աստուած՝ փառաւորեն։—Ա. Պետրոս 2։12
Առօրեայ կեանքի համար Գործնական Մարզում
21. Աստուածաշունչի ժամանակներուն, երախաները ի՞նչ գործնական մարզում կը ստանային։
21 Հաւասարակշռուած կրթութեան չորրորդ նպատակակէտն է՝ առօրեայ կեանքի համար հարկ եղած գործնական մարզումը հայթայթել։ Աստուածաշունչի ժամանակներուն, ծնողական կրթութիւնը իր մէջ կը պարփակէր նաեւ գործնական մարզում։ Աղջիկներուն կը սորվեցնէին առտնին հմտութիւններ։ Առակաց գրքին վերջին գլուխը ցոյց կու տայ որ անոնք բազմաթիւ եւ այլազան էին. այսպիսով, աղջիկներուն կը սորվեցնէին մանել, հիւսել, եփել, առտնին ընդհանուր կարգադրութիւններ ընել, առեւտուրի եւ կալուածներու գործառնութիւնով զբաղիլ։ Տղոց ընդհանրապէս կը սորվեցնէին իրենց հօրը արհեստը. հողագործութիւն, առեւտուր կամ ուրիշ արհեստ մը։ Յիսուս իր որդեգիր հօրմէն՝ Յովսէփէն՝ ատաղձագործութիւն սորվեցաւ, անոր համար ոչ միայն «հիւսնին որդին» կոչուեցաւ, այլ՝ «հիւսնը»։—Մատթէոս 13։55. Մարկոս 6։3
22, 23. (ա) Կրթութիւնը ի՞նչ բանի պէտք է պատրաստէ երախաները։ (բ) Երբ հարկ տեսնուի մեր կրթութիւնը շարունակել, ի՞նչ պէտք է ըլլայ մեր շարժառիթը։
22 Նմանապէս այսօր, հաւասարակշռուած կրթութիւնը կը պարփակէ, հետագային ընտանիքի մը կարիքներուն հոգ տանելու համար պատրաստութիւն։ Ա. Տիմոթէոս 5։8–ի մէջ Պօղոս առաքեալի խօսքերը ցոյց կու տան որ ընտանեկան հոգատարութիւնը սրբազան պարտաւորութիւն մըն է։ Ան գրեց. «Եթէ մէկը իրեններուն ու մանաւանդ իր ընտանիքին հոգ չի տանիր, անիկա հաւատքը ուրացած է ու անհաւատէ մըն ալ գէշ է»։ Ուստի, կրթութիւնը պէտք է երախաները պատրաստէ կեանքի մէջ պատասխանատուութիւններ ստանձնելու, ինչպէս նաեւ՝ զանոնք մարզէ ընկերութեան մէջ ծանր աշխատող անդամներ դառնալու։
23 Ո՞ր տարողութեամբ աշխարհային կրթութիւն պէտք է հետապնդենք։ Ասիկա երկրէ երկիր կը տարբերի։ Բայց եթէ գործի ասպարէզը օրէնքին պահանջած նուազագոյն կրթութենէն աւելի մարզում կը պահանջէ, ծնողներուն կ’իյնայ իրենց զաւակներուն ուղղութիւն տալ, որպէսզի որոշեն թէ յաւելեալ կրթութիւն կամ մարզում պէտք է ստանան թէ ոչ. կշռադատելով անոր հաւանական առաւելութիւններն ու վնասները։ Սակայն, եթէ հարկ տեսնուի կրթութիւնը շարունակել, ի՞նչ պէտք է ըլլայ անհատին շարժառիթը։ Վստահաբար անիկա հարստանալու, ինքզինք փառաւորելու կամ գովաբանելու համար պէտք չէ ըլլայ։ (Առակաց 15։25. Ա. Տիմոթէոս 6։17) Յիշենք Յիսուսի օրինակէն մեր սորված դասը. կրթութիւնը պէտք է գործածուի, Եհովան փառաբանելու համար։ Եթէ ընտրենք մեր կրթութիւնը շարունակել, մեր մղումը պէտք է ըլլայ մեր նիւթական պէտքերը հոգալ, որպէսզի Քրիստոնէական ծառայութեան մէջ կարելի եղածին չափ լման կերպով ծառայենք Եհովայի։—Կողոսացիս 3։23, 24
24. Յիսուսէ մեր սորված ո՞ր դասը բնաւ պէտք չէ մոռնանք։
24 Ուստի աշխարհային հաւասարակշռուած կրթութիւն ձեռք ձգելու համար ջանք թափենք։ Եհովայի կազմակերպութեան մէջ մատակարարուած աստուածային կրթութեան շարունակական յայտագրէն լիովին օգտուինք։ Իսկ, բնաւ չմոռնանք այն արժէքաւոր դասը որ սորվեցանք երկրի վրայ ցարդ ապրած ամենէն ուսեալ մարդէն՝ Յիսուս Քրիստոսէ. կրթութիւնը ո՛չ թէ մենք մեզ փառաւորելու համար պէտք է գործածենք, այլ, մեծագոյն Դաստիարակը՝ Եհովա Աստուած՝ փառաբանելու համար։
Ի՞նչ կը Պատասխանէք
◻ Յիսուս իր ստացած կրթութիւնը ինչպէ՞ս գործածեց։
◻ Ինչո՞ւ կարեւոր է լաւ ընթերցել սորվիլ։
◻ Գրելու կարողութիւնը ինչպէ՞ս կրնանք գործածել, Եհովան փառաբանելու համար։
◻ Աստուածային կրթութիւնը ինչպէ՞ս մեզի կ’օգնէ որ թէ՛ բարոյական եւ թէ հոգեւոր գետնի վրայ զարգանանք։
◻ Հաւասարակշռուած կրթութիւնը ի՞նչ գործնական մարզում պէտք է պարփակէ։
[Շրջանակ՝ էջ 10]
Գործնական օգնութիւն ուսուցիչներուն համար
1995/1996–ի ընթացքին «Ուրախ Փառաբանողներ» բնաբան ունեցող Նահանգային Համաժողովներուն, Դիտարանի Ընկերութիւնը նոր գրքոյկ մը հրատարակեց որու խորագիրն է՝ Եհովայի Վկաները եւ Կրթութիւնը։ Այս 32 էջնոց գունաւոր գրքոյկը մասնաւորաբար ուսուցիչներուն համար հրատարակուած է։ Անիկա արդէն 58 լեզուներու թարգմանուած է։
Ինչո՞ւ գրքոյկ մը ուսուցիչներուն համար։ Նպատակն է անոնց օգնել որպէսզի աւելի լաւ հասկնան այն աշակերտներուն հաւատալիքները, որոնք Եհովայի Վկաներու զաւակներ են։ Գրքոյկը ի՞նչ կը բովանդակէ։ Յստակ ու դրական ոճով մը, անիկա կը բացատրէ յաւելեալ ուսման, տարեդարձի ու Ծնունդի տօնին եւ դրօշակին բարեւելու նկատմամբ մեր տեսակէտները։ Անիկա նաեւ ուսուցիչները կը հաւաստիացնէ որ մենք կ’ուզենք որ մեր զաւակները լաւ կերպով օգտուին իրենց դասընթացքներէն եւ մեր զաւակներուն կրթութեամբ իրապէս հետաքրքրուած ըլլալով, կը փափաքինք անկեղծօրէն համագործակցիլ ուսուցիչներուն հետ։
Կրթութիւն գրքոյկը ինչպէ՞ս կարելի է գործածել։ Քանի որ անիկա ուսուցչական կազմին համար պատրաստուած է, հետեւաբար կրնանք տալ դասատուներուն, տնօրէններուն եւ դպրոցական պաշտօնեաներուն։ Կը յուսանք որ այս նոր գրքոյկը բոլոր ուսուցիչներուն օգնէ հասկնալու մեր տեսակէտներն ու հաւատալիքները եւ թէ ի՛նչու երբեմն կը պահանջենք ուրիշներէն տարբեր ըլլալու իրաւունքը։ Կը քաջալերենք որ ծնողներ այս գրքոյկի հիման վրայ իրենց զաւակներուն ուսուցիչներուն հետ անձնապէս խօսին։
[Նկար՝ էջ 7]
Վաղեմի Իսրայէլի մէջ կրթութեան մեծ արժէք կը տրուէր