Ilu

14 Nwaanyị ma ihe na-eme ka ihe na-aga nke ọma n’ezinụlọ ya,+

Ma nwaanyị nzuzu na-eji aka ya aghasa ezinụlọ ya.

 2 Onye na-akwụwa aka ọtọ na-atụ egwu Jehova,

Ma onye aghụghọ* na-eleda Chineke anya.

 3 Okwu ọjọọ onye nzuzu na-ekwu dị ka ụtarị,

Ma ihe ndị ma ihe na-ekwu ga-echebe ha.

 4 N’ebe a na-enweghị ehi, ihe e ji etinyere ehi nri na-adị ọcha,

Ma otú oké ehi si arụsi ọrụ ike na-eme ka ihe a na-eweta n’ubi buo ibu.

 5 Onye akaebe a tụkwasịrị obi agaghị agha ụgha,

Ma ụgha juru onye akaebe ụgha ọnụ.+

 7 Gị na onye nzuzu emekọla ihe,

N’ihi na ị gaghị amụta ihe n’ọnụ ya.+

 8 Amamihe na-eme ka onye ma ihe na-aghọta ihe ọ na-eme,

Ma ihe na-eduhie ndị nzuzu* bụ iberiibe ha.+

 9 Ihe ọjọọ ndị iberiibe na-eme na-atọ ha ọchị,+

Ma ndị ezi omume na-adị njikere idozi okwu.

10 Ọ bụ onye ihe na-ewute ma ihe na-ewute ya n’obi,

Onye ọzọ enweghịkwa ike ịghọta obi ụtọ mmadụ na-enwe.

11 A ga-ebibi ụlọ ndị ajọ omume,+

Ma ihe ga na-aga nke ọma n’ụlọikwuu ndị ezi omume.

12 E nwere ihe na-adị mma n’anya mmadụ,+

Ma ọ na-emecha butere mmadụ ọnwụ.+

13 Mmadụ nwere ike na-achị ọchị mgbe obi na-adịghị ya mma,

Onye na-aṅụrị ọṅụ nwekwara ike ruwezie uju.

14 Onye obi ya na-adịghị n’ime ihe dị mma ga-ata ahụhụ ihe ndị ọ na-eme,+

Ma ezigbo mmadụ ga-eri uru ihe ndị ọ na-eme.+

15 Onye na-amaghị ihe na-ekweta ihe niile e kwuru,

Ma onye ma ihe na-echebara ihe ọ bụla ọ chọrọ ime echiche.+

17 Onye na-ewe iwe ọsọ ọsọ na-ezuzu nzuzu,+

Ma a kpọrọ onye na-echebara ihe echiche asị.

18 Ndị na-amaghị ihe ga-aghọ ndị nzuzu,

Ma ndị ma ihe ga-amụta ihe.+

19 Ndị ọjọọ ga-akpọrọ ndị ezigbo mmadụ isiala,

Ndị ajọ omume ga-akpọkwa isiala n’ọnụ ụzọ ámá ndị ezi omume.

21 Onye na-eleda onye agbata obi ya anya na-eme mmehie,

Ma onye na-emetere ndị ọ na-enweghị ka ọ hà ha ebere na-enwe obi ụtọ.+

23 Mmadụ na-erite uru ma ọ bụrụ na ọ na-arụsi ọrụ ike,

Ma mmadụ ịna-ekwu naanị okwu ga-eme ka ọ daa ogbenye.+

24 Mma onye ma ihe bụ akụnụba ya,

Ma ndị iberiibe ga na-ezuzu naanị nzuzu.+

25 Onye akaebe nke na-ekwu eziokwu na-azọ mmadụ ndụ,

Ma ihe juru onye na-aghọ aghụghọ ọnụ bụ ụgha.

26 Obi na-esi onye na-atụ egwu Jehova ezigbo ike,+

Ịtụ egwu Chineke ga-echebekwa ụmụ ya.+

27 Ịtụ egwu Jehova na-eme ka mmadụ dị ndụ,

Ọ na-emekwa ka mmadụ ghara ịba ná nsogbu ga-ata isi ya.

28 Gidigidi bụ ùgwù eze,+

Ma onye ọchịchị na-ala n’iyi ma ọ bụrụ na e nweghị ndị ọ na-achị.

29 Onye na-anaghị ewe iwe ọsọ ọsọ na-aghọta ihe nke ọma,+

Ma onye na-anaghị enwe ndidi na-egosi na ọ dị nzuzu.+

30 Ahụ́ na-adị mmadụ mma ma obi ruo ya ala,

Ma anyaụfụ dị ka ọrịa nke na-eme ka ọkpụkpụ mmadụ na-ere ure.+

31 Onye na-erigbu onye ọ na-enweghị ka ọ hà ya na-akparị Onye kere ya,+

Ma onye na-emetere ogbenye ebere na-eto Onye kere ya.+

32 Ihe ọjọọ onye ajọ omume na-eme ga-eme ka ọ laa n’iyi,

Ma a ga-echebe onye ezi omume maka na ọ kwụsiri ike n’ebe Chineke nọ.+

33 Onye na-aghọta ihe anaghị ekwu na ya ma ihe,+

Ma onye iberiibe na-akọsa na ya ma ihe.

34 Ezi omume na-eme ka a na-akwanyere obodo ùgwù,+

Ma mmehie na-eme ka ihere na-eme ndị bi na ya.

35 Eze na-enwe mmasị n’ohu ya nke na-aghọta ihe,+

Ma ọ na-ewesa onye na-emechu mmadụ ihu ezigbo iwe.+