JỌN NKE ATỌ

1 Gayọs, onye m hụrụ n’anya, onye m hụrụ n’anya n’eziokwu, mụnwa bụ́ okenye* na-edetara gị akwụkwọ ozi.

2 Onye m hụrụ n’anya, m na-ekpe ekpere ka ahụ́ na-agbasi gị ike nakwa ka ihe niile na-agara gị nke ọma, otú ha na-agara gị* nke ọma ugbu a. 3 N’ihi na m ṅụrịrị nnukwu ọṅụ mgbe ụmụnna bịara kwuo* na i jisiri eziokwu ahụ aka ike. M na-aṅụrịkwa ọṅụ na ị na-eje ije n’eziokwu ahụ.+ 4 E nweghị ihe na-eme m obi ụtọ karịa ihe a: na m ga-anụ na ụmụ m nọgidere na-eje ije n’eziokwu ahụ.+

5 Onye m hụrụ n’anya, ihe ị na-emere ụmụnna, n’agbanyeghị na ị maghị ndị ha bụ,+ gosiri na i jisiri Chineke aka ike. 6 Ha akọọrọla ọgbakọ* banyere ịhụnanya gị. Biko, mgbe ha na-ala, gbalịa nyere ha aka otú ga-adị Chineke mma.+ 7 N’ihi na ọ bụ maka aha ya ka ha ji gawa izisa ozi ọma n’anaghị ndị mba ọzọ ihe ọ bụla.+ 8 N’ihi ya, anyị kwesịrị ịnabata ụdị ndị a nke ọma,+ ka anyị wee bụrụ ndị ha na ha na-arụkọ ọrụ n’ịkwado eziokwu ahụ.+

9 E nwere akwụkwọ ozi m detaara ọgbakọ, ma Dayotrefis, onye na-achọ ịbụ onye mbụ n’ime ha,+ anaghị akwanyere ihe ọ bụla si n’aka anyị ùgwù.+ 10 N’ihi ya, ọ bụrụ na mụ abịa, m ga-eme ka a mata ọrụ ndị ọ na-arụ, na ọ na-akọsa ihe na-abụghị eziokwu* banyere anyị.+ Nke a ezughịrị ya. Ọ naghịdị anabata ụmụnna+ nke ọma. Ọ na-agbalịkwa igbochi ndị chọrọ ịnabata ha, na-achụpụkwa ha n’ọgbakọ.

11 Onye m hụrụ n’anya, esola ndị ọjọọ na-eme ihe ọjọọ, kama soro ndị na-eme ihe ọma mewe ihe ọma.+ Onye na-eme ihe ọma si na Chineke.+ Onye na-eme ihe ọjọọ ahụbeghị Chineke.+ 12 Ha niile kọrọ akụkọ ọma banyere Dimitriọs, eziokwu ahụ gbakwaara ya àmà. N’eziokwu, anyị na-ekwukwa okwu ọma banyere ya.* Ị makwa na ihe anyị na-ekwu* bụ eziokwu.

13 E nwere ọtụtụ ihe m chọrọ ịgwa gị, ma achọghị m iji mkpịsị akwụkwọ na ịnk na-edere gị ha. 14 Ma, enwere m olileanya na m ga-ahụ gị n’oge na-adịghị anya, anyị ga-ekwukwa okwu ihu na ihu.

Udo dịrị gị.+

Ndị enyi anyị na-ekele+ gị. Keleere m+ ndị enyi anyị n’otu n’otu.