3. Gịnị Mere Ndị Ezigbo Mmadụ Ji Ata Ahụhụ?
Ihe Mere O Ji Dị Mkpa Ịmata Azịza Ya
Obi anaghị adị anyị mma ma anyị hụ ka ndị ezigbo mmadụ na-ata ahụhụ. N’ihi ya, ụfọdụ ndị na-echezi na ịbụ ezigbo mmadụ enweghị uru ọ bara.
Ihe Ị Ga-echebara Echiche
Ụfọdụ ndị kweere na a na-alọ ụwa alọ. Ha sịrị na ndị mere ihe ọma na-alọ ụwa ọma, ndị mere ihe ọjọọ alọ ụwa ahụhụ. Ihe nkwenkwe a pụtara bụ na ọ bụrụgodị na mmadụ bụ ezigbo mmadụ ugbu a, ọ ka ga-ata ahụhụ n’ihi ihe ọjọọ ndị o mere n’ụwa ya mbụ.” Ma, . . .
Oleekwanụ uru ahụhụ ahụ ga-abara onye ahụ ebe ọ bụ na o nweghị ike icheta ihe ndị o mejọrọ n’ụwa ya mbụ?
Ọ bụrụ na ihe na-ekpebi otú ihe ga-adịrị anyị bụ ndụ anyị biri n’ụwa mbụ anyị, gịnịzi mere anyị ji ezere ihe mberede, na-agbalịkwa ka ahụ́ na-adị anyị mma?
MỤTAKWUO IHE NDỊ ỌZỌ
Lee vidio bụ́ Gịnị Mere Chineke Ji Kwe Ka Ahụhụ Dịrị? Ọ dị na jw.org.
Ihe Baịbụl Kwuru
Ahụhụ anyị na-ata esighị n’aka Chineke.
Kama, ihe na-akpata ọtụtụ n’ime ha bụ mmadụ ịnọ n’ebe na-ekwesịghị ekwesị n’oge na-ekwesịghị ekwesị.
“Ọ bụghị ndị nwere ụkwụ ọsọ na-emeri n’ọsọ, ọ bụghịkwa ndị dị ike na-emeri n’agha, ọ bụghịkwa ndị maara ihe na-enweta ihe oriri, ọ bụghịkwa ndị nwere nghọta na-enweta akụnụba, ọ bụghịkwa ndị nwere amamihe na-enweta ihu ọma; n’ihi na oge ọdachi na ihe a na-atụghị anya ya na-abịakwasị ha niile.”—EKLIZIASTIS 9:11.
Ihe ọzọ mere anyị ji ata ahụhụ bụ n’ihi na anyị bụ ndị mmehie.
A na-ejikarị okwu bụ́ “mmehie” akọwa ihe ọjọọ mmadụ mere. Ma, Baịbụl na-ejikwa okwu a akọwa ọnọdụ anyị niile ketara n’aka nne na nna anyị mbụ, ma ànyị bụ ndị ezigbo mmadụ ma ànyị bụ ndị ajọ mmadụ.
“Ebu m njehie pụta mgbe a mụpụtara m site n’ihe mgbu.”—ABỤ ỌMA 51:5
Mmehie akpaala ụmụ mmadụ aka ọjọọ.
O meela ka anyị na Onye kere anyị ghara ịdị ná mma, meekwa ka anyị na ihe ndị ọzọ Chineke kere ghara ịdị ná mma. Ihe a akpatarala mmadụ niile ahụhụ n’otu n’otu nakwa n’ozuzu.
“Mgbe m chọrọ ime ihe ziri ezi, ọ bụ ihe ọjọọ na-adị n’ebe m nọ.”—NDỊ ROM 7:21.
“Ihe niile e kere eke na-asụkọ ude ma na-anọkọ n’ihe mgbu ruo ugbu a.”—NDỊ ROM 8:22.