Otú Anyị Ga-esi Na-emekwu nke Ọma n’Ozi Ọma—Ihe Anyị Ga-agwa Ndị Na-achọghị Ịnụ Ozi Ọma

Ihe Mere O ji Dị Mkpa: Ka e were ya na ị nụrụ na ala ọma jijiji chọrọ ime. Ọ ga-egbu ndị mmadụ ma ọ bụrụ na ha agbapụghị. Gị agaa ịgwa onye agbata obi gị, ya asị na ya enweghị efe ịnụ ihe ị chọrọ ikwu. Ị̀ ga-ahapụ ya ozugbo, pụwa? Mbanụ. Ị ga-agbalị mee ka ọ gee gị ntị. Ọtụtụ ndị anaghị achọ ige anyị ntị n’ihi na ha amaghị na ozi ọma anyị na-ekwusa ga-eme ka ha dị ndụ. O nwere ike ịbụ na ha ji ihe n’aka mgbe anyị bịara na nke ha. (Mat. 24:37-39) O nwekwara ike ịbụ na e nwere ihe a gwara ha banyere anyị. (Mat. 11:18, 19) Ha nwere ike ịna-eche na anyị na ndị chọọchị ndị ọzọ bụ otu ihe. (2 Pita 2:1, 2) N’ihi ya, ọ bụrụ na onye anyị gara na nke ya achọghị ige anyị ntị, anyị ekwesịghị ịpụwa ozugbo.

Ihe Anyị Ga-eme:

Tupu ị gawa ozi ụlọ n’ụlọ, buru ụzọ chee ihe onye na-achọghị ige ntị nwere ike ikwu na ihe ị ga-aza ya.
Gbalịa chọọ otú ị ga-esi zie ya ozi ọma ma o kwuo ihe gosiri na ọ chọghị ige ntị. I nwere ike ịja ya mma maka ihe o kwuru. Dị ka ihe atụ, ọ bụrụ na mmadụ asị na ya nwere chọọchị ya na-aga, i nwere ike ịsị ya, “Ama m na m ga-ahụ onye ife Chineke na-atọ ụtọ ka gị.” Oge ụfọdụ, ikwu na ị ghọtara ihe onye ahụ gwara gị nwere ike ime ka o gewezie gị ntị. Dị ka ihe atụ, ọ bụrụ na mmadụ sị na ya ji ihe n’aka, i nwere ike ịsị ya: “Aghọtara m. Ma tupu m pụwa, ka m nye gị ihe a.” Ihe ọzọ anyị nwere ike ime bụ ịjụ ya ihe mere na ọ chọghị ige anyị ntị. I nwere ike ịsị ya, “Ọ̀ pụtara na ị chọghị ige ihe Baịbụl kwuru ka ọ̀ bụ na ike ihe ndị chọọchị na-eme agwụla gị?”
Amanyela ya ka o gee gị ntị. Cheta na e nweghị onye Jehova na-amanye ka o fee ya. (Diut. 30:19) Ọ bụ onye ọ bụla ga-eji aka ya kpebie ma ọ̀ ga-efe Chineke. (Gal. 6:5) Ọ bụrụ na anyị agbalịa ime ka onye ahụ gee anyị ntị ma ọ chọghị, ọ ka mma ka anyị pụwa. Ọ bụrụ na anyị akwanyere onye ahụ ùgwù, o nwere ike ige ntị n’oge ọzọ.—1 Pita 3:15.

Mee Ihe A n’Ọnwa A:

Ọ bụrụ na unu si na nke onye na-achọghị ige ntị pụta, gị na onye gị na ya so gaa ozi ọma kwuo ihe unu gaara agwa ya ka o gee ntị.