IHE Ị GA-EME KA Ị KWỤSỊ ỊKPỌ NDỊ ỌZỌ ASỊ

2 | Emegwarala Ihe E mere Gị

Ihe Baịbụl Kwuru:

“Unu ejila ihe ọjọọ akwụ onye ọ bụla ụgwọ ihe ọjọọ. . . . Ọ bụrụ na o kwere omume, ọ bụrụkwa unu ka ọ dị n’aka, unu na mmadụ niile dịrị n’udo. . . . Unu abọrọla onwe unu ọbọ, . . . n’ihi na e dere, sị: ‘“Ọ bụ m ga-abọ ọbọ. M ga-akwụ ụgwọ.” Ọ bụ ihe Jehova kwuru.’”—NDỊ ROM 12:17-19.

Ihe Ọ Pụtara:

Nke bụ́ eziokwu bụ na ọ na-ewute anyị ma mmadụ mejọọ anyị. Ma, Chineke achọghị ka anyị na-emegwara ndị ọzọ ihe ha mere anyị. Kama, ọ chọrọ ka anyị nwee ndidi n’ihi na o kwere anyị nkwa na ọ ga-eme ka ihe niile dị mma n’oge na-adịghị anya.—Abụ Ọma 37:7, 10.

Ihe I Nwere Ike Ime:

Ọ bụrụ na ndị mmadụ emegwara ihe ọjọọ e mere ha, ọ na-eme ka ha kpọkwuo ibe ha asị. N’ihi ya, mmadụ mee gị ihe ọjọọ ma ọ bụ kpasuo gị iwe, emegwarala ya. Gbalịa jide onwe gị ma jiri nwayọọ meso ya. Mgbe ụfọdụ, ihe nwere ike ịkacha mma ime bụ ichefu ihe ahụ merenụ. (Ilu 19:11) Ma, o nwere ike ịka mma mgbe ụfọdụ ka i wega okwu ahụ n’aka ndị ga-elebara ya anya. Dị ka ihe atụ, ọ bụrụ na e mere gị ihe ọjọọ ndị uwe ojii ma ọ bụkwanụ ndị ọzọ na-ahụ maka iwu nwere ike ilebara anya, i nwere ike ikpebi ịkọrọ ha ya.

Ihe na-aka njọ ma mmadụ megwara ihe e mere ya

Gịnị ka i kwesịrị ime ma ọ bụrụ na o yie ka o nweghị otú a ga-esi edozi nsogbu ahụ n’udo, ma ọ bụkwanụ na i meela ihe niile i nwere ike ime ka e dozie okwu ahụ n’udo? Emegwarala. Ọ bụrụ na i megwara, o nwere ike ime ka ihe ka njọ. Ma, ọ bụrụ na i megwaraghị, o nwere ike ime ka unu ghara ịkpọ ibe unu asị. Gbalịa ka ị tụkwasị Jehova obi na ihe o kwuru gbasara otú e si edozi esemokwu kacha mma. Baịbụl sịrị: “Tụkwasị ya obi. Ọ ga-enyere gị aka.”—Abụ Ọma 37:3-5.

Akụkọ Mere Eme—ADRIÁN

Ọ Kwụsịrị Ịna-achọ Ka O Megwara

Mgbe Adrián dị ihe dị ka afọ iri na atọ, ọ na-akpọ ndị mmadụ asị, na-emegwakwara ihe ọ bụla e mere ya. Ọ sịrị: “M na-ejikarị égbè alụ ọgụ. O nwekwara mgbe ụfọdụ a na-akụ m ọ̀ dị ndụ ọnwụ ka mma, ahụ́ m niile abụrụ ọbara ọbara, a hapụ m n’okporo ámá.”

Adrián malitere ịmụ Baịbụl mgbe ọ dị afọ iri na isii. Ọ sịrị: “Ka m nọ na-amụ Baịbụl, achọpụtara m na o nwere àgwà m ụfọdụ m kwesịrị ịgbanwe.” Ọ chọpụtara na o kwesịrị ịkwụsị ịkpọ ndị mmadụ asị, kwụsịkwa ịlụ ọgụ. Ihe Baịbụl kwuru ná Ndị Rom 12:17-19 ka anyị ghara imegwara ndị ọzọ baara ya ezigbo uru. Ọ sịrị: “M bịara ghọta na Jehova ga-eme ka ihe ọjọọ kwụsị n’oge ọ chọrọ nakwa otú o si chọọ ya. M jizi nwayọọ nwayọọ, kwụsị ịlụ ọgụ.”

Otu mgbede, ụfọdụ ụmụ okorobịa bịara chọwa Adrián okwu. Ha na ndị òtù Adrián nọbu na-ese okwu. Onyeisi ha bịara kụọ Adrián ihe sị ya, “Ngwa, kụgwara m!” Adrián sịrị: “Ọ nọ na-enu m enu ka m kụgwara ya.” Ma, kama ịkụgwara ya, o kpere ekpere n’obi ya ozugbo sizie ebe ahụ pụọ.

Adrián sịkwara: “N’echi ya, m hụrụ onyeisi ha ahụ ka naanị ya so. Iwe eju m obi, mụ achọwa imegwara ya. Ma, m kpeere Jehova ekpere ọzọ ka o nyere m aka ijide onwe m. Ihe m na-atụghị anya ya meziri. Onyeisi ha ahụ bịakwutere m, sị m: ‘Biko ewela iwe maka ihe ahụ m mere gị ná mgbede ụnyaahụ. Ị̀ ma na m na-achọ otú m ga-esi adị ka gị? M chọrọ ịmụ Baịbụl.’ Obi tọrọ m ezigbo ụtọ na m gbalịrị jide onwe m. E bidoziri mụwara ya Baịbụl.”