IHE Ị GA-EME KA Ị KWỤSỊ ỊKPỌ NDỊ ỌZỌ ASỊ

4 | Chineke Ga-enyere Gị Aka Ịkwụsị Ịkpọ Ndị Mmadụ Asị

Ihe Baịbụl Kwuru:

“Mkpụrụ nke mmụọ nsọ bụ ịhụnanya, ọṅụ, udo, ndidi, obiọma, ịdị mma, okwukwe, ịdị nwayọọ, mmadụ ijide onwe ya.”—NDỊ GALESHIA 5:22, 23.

Ihe Ọ Pụtara:

Chineke ga-enyeliri mmadụ aka ịkwụsị ịkpọ ndị ọzọ asị. Mmụọ nsọ ya ga-enyere anyị aka ịmụta àgwà ndị anyị na-agaghị enwe ike ịkpa n’onwe anyị. N’ihi ya, kama ịgbalịwa ka anyị kwụsị ịkpọ ndị mmadụ asị n’onwe anyị, anyị kwesịrị ịtụkwasị Chineke obi ka o nyere anyị aka ịkwụsị ya. Anyị mee ya, anyị ga-adị ka Pọl onyeozi, onye sịrị: “N’ihe niile, onye ahụ nke na-eme ka m dị ike na-enye m ike.” (Ndị Filipaị 4:13) N’eziokwu, anyị ga-enwe ike ịsị: “Ọ bụ Jehova . . . ga-enyere m aka.”—Abụ Ọma 121:2.

Ihe I Nwere Ike Ime:

“Jehova enyerela m aka, mụ akwụsị ime ihe ike ma ghọọ onye na-eme udo.”—WALDO

Jiri obi gị niile rịọ Jehova n’ekpere ka o nye gị mmụọ nsọ ya. (Luk 11:13) Rịọ ya ka o nyere gị aka ịna-akpa àgwà ndị na-amasị ya. Mụọ ihe Baịbụl kwuru gbasara àgwà ndị na-eme ka mmadụ kwụsị ịkpọ ndị ọzọ asị, àgwà ndị dị ka, ịhụnanya, udo, ndidi, na mmadụ ijide onwe ya. Gbalịakwa ka ị na-akpa àgwà ndị ahụ. Gị na ndị na-agbalị ịkpa àgwà ndị a na-akpakwa. Ha nwere ike inyere gị aka ‘ịna-ahụ ndị ọzọ n’anya ma na-arụ ezigbo ọrụ.’—Ndị Hibru 10:24.

Akụkọ Mere Eme—WALDO

Ọ Kwụsịrị Ime Tigbuo Zọgbuo na Ịkpọ Ndị Mmadụ Asị

Ihe ndị mere ná ndụ Waldo mgbe ọ na-etolite na ụdị ebe ọ nọ too mere ka ọ na-akpọ ndị mmadụ asị. Ọ sịrị: “Mụ na ndị na-ere ọgwụ ọjọọ na-alụkarị ọgụ n’okporo ámá. . . . O nwere mgbe ndị òtù ọjọọ, bụ́ ndị anyị na ha na-adịghị ná mma, kwụrụ otu onye akpụ obi a ma ama ụgwọ ka o gbuo m. Mgbe ọ bịara igbu m, ọ mara m mma, mụ erie mbọ mbọ.”

Obi adịghị Waldo mma mgbe Ndịàmà Jehova bidoro ịmụrụ nwunye ya Baịbụl. Ọ sịrị: “Anaghị m achọ iji anya ahụ Ndịàmà Jehova. Ọtụtụ mgbe, m na-akpọ ha iyi. Ma, ebe ọ bụ na ha abụghị ndị okwu na ụka, ha na-eji olu ọma agwa m okwu.”

Waldo mechara bido ịmụ Baịbụl. Ọ sịrị: “Ọ dịrịghị m mfe ime ihe m na-amụta. M chekwara na mụ emekataghị kwụsị iwe iwe ọkụ.” Ma, ihe ọ mụtara na Baịbụl nyeere ya aka ịgbanwe.

Waldo sịrị: “Otu ụbọchị, Alejandro, bụ́ onye na-akụziri m Baịbụl, gwara m ka m gụọ Ndị Galeshia 5:22, 23. . . . Alejandro gwara m na ihe ga-eme ka m mụta àgwà ndị ahụ bụ mmụọ nsọ Chineke, ọ bụghị ike nke onwe m. Ihe a ọ gwara m mere ka m gbanwee otú m si ele ihe anya.”

Waldo kwụsịrị ịkpọ ndị ọzọ asị n’ihi na ọ tụkwasịrị Chineke obi na ọ ga-enyere ya aka. Ọ sịrị: “O juru ndị mụ na ha na-akpabu na ndị ikwu m anya na ndụ m agbanweela.” Ọ sịkwara: “Jehova enyerela m aka, mụ akwụsị ime ihe ike ma ghọọ onye na-eme udo.”