Inyocha Ọrụ Dị Ngwa nke Ime Ndị Na-eso Ụzọ Site n’Oge Ruo n’Oge
1 Tupu Jisọs ahapụ ụwa, o nyere ụmụazụ ya iwu ‘ime mba nile ka ha bụrụ ndị na-eso ụzọ.’ Nke a chọrọ ka ha rụọ ọrụ nkwusa na izi ihe n’ụzọ sara mbara ma gbasaa ọrụ ha n’elu ụwa dum mmadụ bi. (Mat. 28:19, 20; Ọrụ 1:8) Hà lere ọrụ a anya dị ka ibu dị oké arọ obubu? Dị ka Jọn onyeozi si kwuo, ọ dịghị otú ahụ. Mgbe o jesịrị ozi ruo afọ 65 dị ka onye na-eme ndị na-eso ụzọ, o dere sị: “Nke a bụ ịhụnanya Chineke, ka anyị debe ihe nile O nyere n’iwu: ihe O nyere n’iwu adịghịkwa arọ.”—1 Jọn 5:3.
2 Ihe e dekọrọ n’Akwụkwọ Nsọ banyere ọrụ ndị Kraịst oge mbụ na-egosi na ha dị ngwa n’ịrụ ọrụ ha nke ime ndị na-eso ụzọ Jisọs Kraịst. (2 Tim. 4:1, 2) Ha mere nke a, ọ bụghị nanị iji mezuo iwu, kama n’ihi ọchịchọ ha ji ịhụnanya chọọ ito Chineke na inye ndị ọzọ olileanya nke nzọpụta. (Ọrụ 13:47-49) Ebe ndị nile ghọrọ ndị na-eso ụzọ mesịrị bụrụ ndị na-eme ndị na-eso ụzọ n’onwe ha, ọgbakọ ndị Kraịst mụbara ngwa ngwa na narị afọ mbụ.—Ọrụ 5:14; 6:7; 16:5.
3 Ọrụ Ime Ndị Na-eso Ụzọ Agaa Ọsọ Ọsọ: Ọ bụ n’oge anyị ka a na-arụzu ihe kasịnu a rụzutụworo n’ọrụ ime ndị na-eso ụzọ! Ka ọ dị ugbu a, ọtụtụ nde mmadụ anakwerewo ozi ọma ahụ ma mee ihe kwekọrọ na ya. (Luk 8:15) Ebe ọ bụ na oge na-agwụnahụ usoro ihe dị ugbu a, “ohu ahụ kwesịrị ka a tụkwasị ya obi, nke nwekwara uche” enyewo anyị ngwá ọrụ ndị na-eme ka ọ dịrị ndị nwere obi eziokwu mfe ịmụta eziokwu ahụ ngwa ngwa.—Mat. 24:45.
4 Na 1995, anyị natara akwụkwọ bụ́ Ihe Ọmụma nke Na-eduba ná Ndụ Ebighị Ebi, na 1996, broshuọ bụ́ Gịnị Ka Chineke Na-achọ n’Aka Anyị? sochikwara ya. Mbipụta Ụlọ Nche nke January 15, 1996, peeji nke 14 kwuru banyere akwụkwọ Ihe Ọmụma, sị: “A pụrụ ịmụcha akwụkwọ nke a dị peji 192 na nwa oge nta, ‘ndị e doro ịnata ndụ ebighị ebi’ kwesịkwara inwe ike ịmụta ihe zuru ezu site n’imụ ya iji wee rara onwe ha nye Jehova, e wee mee ha baptism.”—Ọrụ 13:48.
5 Ihe ntinye Ozi Alaeze Anyị nke June 1996, bụ́ “Otú E Si Eji Akwụkwọ Ihe Ọmụma Eme Ndị Na-eso Ụzọ,” nyere anyị ihe mgbaru ọsọ a: “Na-adabere n’ọnọdụ na ikike ịmụta ihe nke onye mmụta ahụ, ọ pụrụ ikwe gị omume ịtụlezu ihe ka ọtụtụ n’isiakwụkwọ ndị ahụ n’otu nnọkọ nke otu awa ma ọ bụ ihe yiri ya, n’achụghị ọmụmụ ihe ahụ n’ọkụ n’ọkụ. Ndị mmụta ga-enwe ọganihu ka mma mgbe ma onye nkụzi ma onye mmụta na-edebe agba ha yiri ịmụ ihe kwa izu.” Isiokwu ahụ gara n’ihi ikwu, sị: “E kwesịrị ịtụ anya na ka mmadụ na-amụzula akwụkwọ Ihe Ọmụma, ezi nzube obi na ókè mmasị o nwere n’ife Chineke hà ga-apụtaworị ìhè.” Igbe Ajụjụ dị n’Ozi Alaeze Anyị nke October 1996 kọwara, sị: “A na-atụ anya na n’ime oge dịtụ mkpirikpi, onye nkụzi dị irè ga-enwe ike inyere onye mmụta nwere obi eziokwu, nke nwetụrụ ihe ọmụma aka inweta ihe ọmụma zuru ezu iji mee ezi mkpebi ijere Jehova ozi.”
6 Akwụkwọ Ihe Ọmụma Arụpụta Ihe: Mgbe a na-eme otu nwa agbọghọ baptism, ọ kọrọ mmetụta o nwere banyere ịmụ akwụkwọ Ihe Ọmụma. Ruo oge ụfọdụ, ọ nọwo na-amụ akwụkwọ Ịdị Ndụ Ebighị Ebi. Mgbe e wepụtara akwụkwọ Ihe Ọmụma, nwanna nwanyị na-eduziri ya ọmụmụ ihe gafere n’akwụkwọ ọhụrụ ahụ. N’oge na-adịghị anya, onye ahụ a na-amụrụ ihe hụrụ na nke a ga-achọ ka o mee mkpebi, a kpalikwara ya inwe ọganihu dị ngwa malite mgbe ahụ. Nwa agbọghọ ahụ, onye bụ́ nwanna anyị nwanyị ugbu a, na-ekwu, sị: “Akwụkwọ Ịdị Ndụ Ebighị Ebi nyeere m aka ịhụ Jehova n’anya, ma akwụkwọ Ihe Ọmụma nyeere m aka ime mkpebi ijere ya ozi.”
7 Tụlee otú nwanyị ọzọ si mụta eziokwu ahụ ngwa ngwa. Mgbe ọ mụsịrị ihe nke ugboro abụọ, ọ gara nzukọ n’Ụlọ Nzukọ Alaeze n’oge nleta nke onye nlekọta sekit. N’izu ahụ, n’ọmụmụ ihe ya nke ugboro atọ, ọ gwara ya na ya ararawo onwe ya nye Jehova ma chọọ ịghọ onye nkwusa a na-emebeghị baptism. Ya na ndị okenye nọkọrọ, bụ́ ndị kwadoro ya ịbụ onye nkwusa, n’izu na-esokwa ya, ọ malitere ije ozi ubi. O tinyere nnọọ onwe ya n’ọmụmụ Bible ya nke na ọ naara ezumike n’ọrụ iji mụọ ihe ugboro abụọ ma ọ bụ atọ n’izu ma tinyekwuo oge n’ozi. Mgbe ụfọdụ, ha ga-amụcha isiakwụkwọ abụọ ma ọ bụ atọ n’otu oge. Ọ malitere itinye ihe ndị ọ na-amụta n’ọrụ n’akụkụ nile nke ndụ ya, mụchaa akwụkwọ Ihe Ọmụma ahụ n’ime izu anọ, ma nwee ọganihu ruo n’ịbụ onye e mere baptism!
8 Di otu nwanna nwanyị kọwara onwe ya dị ka onye bụbu “ihe atụ nke onye òtù ọlụlụ na-ekweghị ekwe.” Otu ụbọchị, otu nwanna nwoke gwara ya ka ya jiri akwụkwọ Ihe Ọmụma duziere ya ọmụmụ Bible, gwakwa ya na ọ pụrụ ịkwụsị mgbe a mụchara ihe nke mbụ ma ọ bụ mgbe ọ bụla ọzọ mgbe e mesịrị. Di ahụ kwere ịnwale ya n’agbanyeghị na ọ bụ onye na-amaghị akwụkwọ mgbe ọ bụ nwata na onye na-amụbeghị ụdị akwụkwọ okpukpe ọ bụla ruo afọ 20. Gịnị bụ mmeghachi omume ya n’ịmụ akwụkwọ Ihe Ọmụma? O kwuru, sị: “Ọ bụ ihe obi ụtọ n’ezie ịhụ na e dere akwụkwọ a e ji amụ Bible n’ụzọ dị mfe otú a. E dere ihe ọmụma dị n’ime ya n’ụzọ doro nnọọ anya na n’ụzọ ezi uche dị na ya nke na n’oge na-adịghị anya, m na-eji atụmanya dị ukwuu elepụ anya n’ihu maka ọmụmụ ihe ọzọ. Onye nkụzi m ji nkà gbasoo ụzọ e si eme ndị na-eso ụzọ bụ́ ndị Society kọwapụtara, sitekwa n’enyemaka nke mmụọ Jehova, e mere m baptism mgbe ọnwa anọ gasịrị. Apụrụ m ikwu n’ezie na ọ bụrụ na anyị azụlite ịhụnanya maka ime ndị na-eso ụzọ, nọgide na-achọ ndị obi ha ziri ezi n’ozi ubi, na-eji akwụkwọ Ihe Ọmụma na akwụkwọ ndị ọzọ e ji amụ Bible bụ́ ndị Society na-enye na-eme ihe, nke kasị mkpa, na-ekpekwa ekpere maka nduzi Jehova, anyị pụrụ inwe kpọmkwem ihe ùgwù ahụ pụrụ iche nke inye aka na-eme ndị na-eso ụzọ.” Ihe ndị a kọrọ n’elu bụ ahụmahụ ndị a na-adịghị enwekebe. Ọtụtụ n’ime ndị anyị na-amụrụ ihe adịghị eji otú ahụ anara eziokwu ngwa ngwa.
9 Ndị A Na-amụrụ Ihe Na-enwe Ọganihu n’Ọ̀tụ̀tụ̀ Dịgasị Iche: A ghaghị ịghọta na ikike nke ma ndị nkụzi ma ndị a na-amụrụ Okwu Chineke pụrụ ịdịgasị nnọọ iche. Uto ime mmụọ pụrụ ịga nwayọọ nwayọọ ma ọ bụ ịdị ngwa. Ụfọdụ ndị a na-amụrụ ihe na-eji ọnwa ole na ole enwe ọganihu nke pụrụ iwe ndị ọzọ oge ka nnọọ ukwuu inwe. Ọnọdụ agụmakwụkwọ mmadụ, otú o jiruru ihe ime mmụọ kpọrọ ihe na ókè nrara ọ raara onwe ya nye Jehova hà, na-emetụta otú onye ahụ si eto eto n’ụzọ ime mmụọ. Ọ bụghị mmadụ nile anyị na-amụrụ ihe nwere “obi dị ọkụ” ịmụ Akwụkwọ Nsọ kwa ụbọchị dị ka ndị Beria oge ochie nwere bụ́ ndị ghọrọ ndị kwere ekwe.—Ọrụ 17:11, 12.
10 Ọ bụ nke ahụ mere ihe ntinye Ozi Alaeze Anyị nke December 1998, nke isiokwu ya bụ́ “A Chọkwuru—Ọmụmụ Bible,” ji nye ntụzi a bara uru, sị: “N’ezie, ọ bụghị ndị nile a na-amụrụ Bible na-enwe ọganihu ha nhata. Ụfọdụ adịghị eji ihe ime mmụọ akpọrọ ihe dị ka ndị ọzọ ma ọ bụkwanụ na-amụta ihe ndị a na-akụzi ngwa ngwa dị ka ndị ọzọ. Ndị ọzọ na-ebi ndụ nke na-adịghị enye ha ohere, o nwekwara ike ha agaghị ewepụtali oge a chọrọ iji mụchaa otu isiakwụkwọ kwa izu. Ya mere, n’ọnọdụ ụfọdụ ọ pụrụ ịdị mkpa ịmụ ihe n’ihe karịrị otu ugboro iji mụsịa isiakwụkwọ ụfọdụ na ọtụtụ ọnwa karị iji mụsịa akwụkwọ ahụ.”
11 Ndị Na-eme Ndị Na-eso Ụzọ Na-enwe Echiche Ziri Ezi: Ọ dị mkpa ikpebi oge ọmụmụ ihe ahụ ga-ewe na-adabere n’ọnọdụ na ikike ịmụta ihe nke onye mmụta ahụ. Ebe ọ bụ na a na-agba anyị ume ịmalite ọmụmụ ihe na broshuọ Na-achọ, ọ pụrụ iwe malite n’ọnwa abụọ ruo ọnwa atọ iji mụchaa ya tupu a na-abanye n’akwụkwọ Ihe Ọmụma. Ọ bụrụ na anyị ejiri aro ndị a tụrụ n’ihe ntinye Ozi Alaeze Anyị nke June 1996 mee ihe, ọ pụrụ iwe site n’ọnwa isii ruo ọnwa itoolu ọzọ iji mụchaa akwụkwọ Ihe Ọmụma. Ụfọdụ ndị ka malitere ọmụmụ ihe n’akwụkwọ Ihe Ọmụma gafere na broshuọ Na-achọ iji nyere onye ha na-amụrụ ihe aka ịmụta eziokwu Bible ndị bụ́ isi ngwa ngwa karị. Mgbe ahụ, ha maliteghachiri ọmụmụ ihe ahụ n’akwụkwọ Ihe Ọmụma. Ọ bụrụ na a malite ọmụmụ ihe n’akwụkwọ Ihe Ọmụma ma nwee ọganihu dị mma, ọ pụrụ ịba uru ịmụ broshuọ Na-achọ mgbe a mụsịrị akwụkwọ ahụ, si otú ahụ na-atụleghachi eziokwu ndị bụ́ isi nke Okwu Chineke ngwa ngwa. N’ọnọdụ nke ọ bụla, anyị agaghị achọ ka inwe nghọta doro anya nke onye ahụ a na-amụrụ ihe funahụ ya n’ihi ịmụ ihe ọsọ ọsọ. Ọ dị onye ọ bụla a na-amụrụ ihe mkpa inwe ihe ndabere siri ike maka okwukwe ọhụrụ o nwere n’Okwu Chineke.
12 N’ihi ebe anyị nọ ná ngafe nke oge, ọ dị ngwa ugbu a karịa mgbe ọ bụla ọzọ inyere ndị ọzọ aka ịmụta eziokwu. E wezụga ịnọgide na-ekpe ekpere maka ịmalite ọmụmụ Bible ọhụrụ, ka anyị kpeekwa ekpere maka ndị anyị na-amụrụ ihe ugbu a. Mgbe ahụ, ọ ga-abụrụ anyị ihe ọṅụ ịnọgide na-eme ọtụtụ ndị na-eso ụzọ baptism “ụbọchị nile, ruo ọgwụgwụ oge a.”—Mat. 28:20.