Ọ Kasị Mma Ime Ka Ọ Dị Mfe
1 N’ihi gịnị ka ndị ndị nkwusa na-eto eto na-ekwusara ozi Alaeze ahụ na-eji etinyekarị uche ha n’ihe ha na-ekwu? Otu ihe kpatara ya bụ na ha na-ekwu ihe ndị dị mfe. Ụfọdụ ndị nkwusa pụrụ iche na ịgba àmà n’ụzọ dị irè chọrọ iche ozi ọma ahụ n’ihu mmadụ n’ụzọ dị were were. Otú ọ dị, ahụmahụ na-egosi na ụzọ iche ihe n’ihu nke dị mfe ma doo anya kasị mma.
2 Jisọs kwusara Alaeze Chineke n’ụzọ dị mfe, ma doo anya, ọ zụkwara ndị na-eso ụzọ ya ime otu ihe ahụ. (Mat. 4:17; 10:5-7; Luk 10:1, 9) O ji okwu mmeghe, ajụjụ, na ihe atụ ndị dị mfe dọta mmasị nke ndị na-ege ya ntị ma ruo ha n’obi. (Jọn 4:7-14) Anyị ga-eme nke ọma iṅomi ihe nlereanya ya ma chee ozi ọma ahụ n’ihu mmadụ n’ụzọ a pụrụ ịghọta ya ngwa ngwa.
3 ‘Ozi ọma nke alaeze’ bụ ozi anyị na-ezisa. (Mat. 24:14) Iji Alaeze ahụ eme isiokwu bụ́ isi i ji eme ihe ga-enye aka mee ka ụzọ i si eche ozi ọma n’ihu mmadụ dị mfe. Kwuo banyere ihe ndị na-emetụta ndị na-ege gị ntị. Ndị inyom na-enwekarị mmasị n’ezinụlọ ha karịa n’isiokwu ndị metụtara ndọrọ ndọrọ ọchịchị. Ihe kasị echegbu onye bụ́ nna bụ ọrụ ya na nchebe nke ezinụlọ ya. Ndị na-eto eto nwere mmasị n’ọdịnihu ha; ebe ndị agadi nwere mmasị n’ahụ ike na nchebe ha. Ndị mmadụ na-enwekarị nchegbu banyere ihe ndị na-eme n’ógbè ha karịa n’ihe ndị na-eme n’ala ndị dị anya. Mgbe unu kparịtasịrị banyere ihe ndị na-amasị mmadụ nile, dọrọ uche gaa ná ngọzi dị iche iche ihe a kpọrọ mmadụ ga-enweta n’ọchịchị Alaeze Chineke. Okwu ole na ole dị mfe a họọrọ nke ọma bụ́ ndị e jikọtara ha na otu akụkụ Akwụkwọ Nsọ pụrụ ịbụ ụzọ kasị mma isi kpalie mmasị nke onye na-ege gị ntị.
4 Ị pụrụ ịmalite mkparịta ụka site n’ịsị:
◼ “Obi abụọ adịghị ya na i kwetara na ọtụtụ ọrịa na-enweghị ngwọta na-eti ihe a kpọrọ mmadụ ihe otiti. Ma ị̀ maara na Chineke ekwewo nkwa na ya ga-ewepụ ụdị ọrịa nile na ọnwụ n’isi nso?” Nye ohere maka nzaghachi, mgbe ahụ gụọ Mkpughe 21:3, 4.
5 Jiri ụzọ iche ihe n’ihu doro anya ma dị mfe ruo n’uche na n’obi nke ọtụtụ ndị nọ n’ókèala unu, na-enyere ha aka ịmụta banyere Jehova na olileanya nke inweta ndụ ebighị ebi.—Jọn 17:3.