Igbe Ajụjụ

◼ Olee mgbe o kwesịrị ekwesị iguzobe ìgwè na-asụ asụsụ mba ọzọ?

Mgbe e nwere ọnụ ọgụgụ butụrụ ibu nke ndị na-asụ asụsụ mba ọzọ n’ókèala ọgbakọ, ndị okenye kwesịrị ime ihe ha nwere ike ime iji mee ndokwa maka ịrụ ọrụ ime nkwusa n’asụsụ ahụ. (km-IB 7/02 p. 1; km-IB 2/98 p. 3-4) Ọ pụrụ ịbụ na ndị ahụ na-asụ asụsụ mba ọzọ bisasịrị n’ókèala nke ọgbakọ abụọ ma ọ bụ karị ndị dịdewere onwe ha. Mgbe ọ dị otú ahụ, onye nlekọta sekit ga-enye nduzi dị mkpa, si otú a na-enyere ọgbakọ ndị o metụtara aka imekọ ihe n’ọrụ ime nkwusa. Site n’oge ruo n’oge, a pụrụ ime ndokwa ka e nwee okwu ihu ọha ma ọ bụ Ọmụmụ Ihe Ụlọ Nche iji chọpụta mmadụ ole ga-abịa nzukọ ndị ahụ a ga-eduzi n’asụsụ mba ọzọ.

A pụrụ iguzobe ìgwè na-asụ asụsụ mba ọzọ mgbe e mezuru ihe ndị na-esonụ a chọrọ: (1) E nwere ndị nkwusa ma ọ bụ ndị nwere mmasị bụ́ ndị na-aghọta ozi ọma ahụ nke ọma karịsịa n’asụsụ mba ọzọ ahụ. (2) E nwere onye okenye ma ọ bụ ohu na-eje ozi ruru eru ga-ebute ụzọ ma na-eduzi otu nzukọ kwa izu ma ọ dịkarịa ala. (3) Òtù ndị okenye dị njikere ịkwado ìgwè ahụ. Mgbe e mezuru ihe ndị a a chọrọ, ndị okenye kwesịrị ịgwa alaka ụlọ ọrụ ka e wee nwee ike ịmara kpọmkwem banyere ìgwè ahụ, ka e wee nweekwa ike inyekwu ntụziaka.

Ihe ka n’ọnụ ọgụgụ nke ìgwè dị iche iche na-amalite site n’inwe Ọmụmụ Akwụkwọ Ọgbakọ kwa izu. Ka oge na-aga, ndị okenye pụrụ ịkwado ka a na-enwekwu nzukọ ndị ọzọ, dị ka Nzukọ Ihu Ọha na Ọmụmụ Ihe Ụlọ Nche. A pụrụ ime Ihe Omume nke 2, nke 3, na nke 4 n’Ụlọ Akwụkwọ Ije Ozi Ọchịchị Chineke na klas ọzọ ma ọ bụrụ na e nwere onye okenye ma ọ bụ ohu na-eje ozi ruru eru nke maara asụsụ ahụ nke ọma, bụ́ onye pụrụ ije ozi dị ka onye ndụmọdụ. Otú ọ dị, ìgwè ahụ ga-esonyere ọgbakọ mgbe a na-atụle nkà okwu, mgbe a na-ekwu okwu izi ihe, mgbe a na-eme nchịkọta nke isi ihe sitere na Bible, na maka Nzukọ Ije Ozi. A pụkwara ime ndokwa iduzi nzukọ ije ozi ubi maka ìgwè ahụ.

Ndị nile so n’ìgwè ahụ ga na-arụkọ ọrụ ọnụ n’okpuru nlekọta nke òtù ndị okenye. Ndị okenye kwesịrị ịdị na-enye nduzi ezi uche dị na ya ma na-egosi ezi mmasị n’igbo mkpa ìgwè ahụ. Mgbe onye nlekọta sekit bịara ileta ọgbakọ nke na-ahụ maka ìgwè ahụ, ọ ga-emekwa ndokwa iso ìgwè ahụ rụọ ọrụ iji wulie ha elu n’ụzọ ime mmụọ. Site ná ngọzi Jehova, ka oge na-aga ìgwè ahụ na-asụ asụsụ mba ọzọ pụrụ ịghọ ọgbakọ.