Na-egosi Mmasị n’Ebe Ndị Ọzọ Nọ—Site n’Ikwusara Ụdị Mmadụ Nile Ozi Ọma
1 Jọn onyeozi hụrụ otu mmụọ ozi n’ọhụụ ka ọ na-efegharị n’etiti eluigwe, na-ekwusara ndị si “mba na ebo na asụsụ na ndị ọ bụla” ozi ọma. (Mkpu. 14:6) Ànyị na-agbaso ihe nlereanya nke mmụọ ozi ahụ site n’ikwusara ụdị mmadụ nile ozi ọma? E nwere ike anyị agaghị ama na anyị nwere àgwà na-egosi na anyị na-akpa ókè. Otú anyị si ele ndị anyị na-ezi ozi ọma anya pụrụ imetụta otú anyị si ezi ha ozi ọma. N’ihi ya, ọ dị anyị mkpa igosi na anyị nwere ezigbo ịhụnanya n’ebe ndị anyị na ha na-esighị otu ebe nọ mgbe anyị na-ezi ha ozi ọma.
2 Chọpụta Ndị Bi n’Ókèala Unu: È nwere ndị si mba ọzọ kwabata ma ọ bụ ndị gbatara ọsọ ndụ n’ókèala unu? Ọ pụrụ ịdị mfe ileghara ndị dị otú ahụ anya. Gbaa mbọ ịchọpụta ebe ha bi, gbalịakwa ịmatakwu ha. Olee ihe ndị na-akpa ha na ihe ndị na-eche ha uche, ihe ndị na-amasị ha na ihe ndị na-adịghị amasị ha, ihe ndị na-atụ ha ụjọ na ihe ndị ha kpọrọ asị? Gbalịa ime ka ozi gị kwekọọ n’ihe ndị ị chọpụtara. (1 Kọr. 9:19-23) Dị ka Pọl onyeozi, anyị kwesịrị iwere ya dị ka ọrụ dịịrị anyị izi ndị nile nọ n’ókèala anyị ozi ọma, ndị ụfọdụ n’ime ha bụ ndị si mba ọzọ, ndị omenala ha dị iche na nke anyị, ndị na-asụ asụsụ ala ọzọ, na ndị bara nnọọ ọgaranya.—Rom 1:14.
3 Ma, olee otú ị ga-esi zie onye na-asụ asụsụ ala ọzọ ozi ọma? Jiri akwụkwọ bụ́ Good News for People of All Nations mee ya. I nwekwara ike iji traktị ma ọ bụ broshuọ ndị e dere n’asụsụ ndị a na-asụkarị n’ókèala gị. (Lee Ozi Alaeze Anyị nke July 2003, p. 8, para. 2-3.) Tụkwasị na nke ahụ, ụfọdụ ndị nkwusa etinyela mgbalị iji mụta ikele ndị na-asụ asụsụ ọzọ ekele n’asụsụ ha, nakwa iji ya zie ha ozi ọma n’ụzọ dị nkenke. Obi na-adịkarị ndị mmadụ ụtọ ma ha nụ ka mmadụ na-agwa ha okwu n’asụsụ ha, ọbụna ma a sị na onye ahụ anaghị asụtacha ya, nke a nwekwara ike ime ka ha gee ntị n’ozi ọma ahụ.
4 Ṅomie Jehova: Site n’ikwusara ụdị mmadụ nile ozi ọma, anyị na-eṅomi Chineke anyị bụ́ Jehova, onye na-adịghị ele mmadụ anya n’ihu, “onye ọ bụ uche ya ka a zọpụta ụdị mmadụ nile na ka ha bịaruo ezi ihe ọmụma nke eziokwu.”—1 Tim. 2:3, 4.