OTÚ NDỊ KRAỊST SI EBI NDỤ
Otú Ọgbakọ Ndị Na-ezi Ozi Ọma n’Ebe A Na-asụ Ọtụtụ Asụsụ Ga-esi Na-emekọ Ihe Ọnụ
Ozi ọma na-aka eru ndị mmadụ n’obi ma e jiri asụsụ ha na-ezi ha ozi ọma. Ọ ga-abụ ya mere Jehova ji mee ka “ndị Juu si ná mba niile dị n’okpuru eluigwe” nụ ozi ọma ahụ ‘n’asụsụ nke ha’ na Pentikọst afọ 33, n’agbanyeghị na o nwere ike ịbụ na ha na-aghọta ma na-asụ Hibru ma ọ bụ Grik. (Ọrụ 2:5, 8) N’ebe ndị a na-asụ ọtụtụ asụsụ, ọgbakọ ndị na-eji asụsụ dị iche iche amụ ihe nwere ike ịna-ezi ozi ọma otu ebe. Olee otú ndị nkwusa nọ n’ọgbakọ ndị ahụ ga-esi emekọ ihe ọnụ ka ha nwee ike izi mmadụ niile ozi ọma ma ghara ịrụgbu ebe ahụ arụgbu, nke nwere ike ịkpasu ndị nwe ụlọ iwe?
Kparịtanụ otú unu ga-esi na-arụ ya (Ilu 15:22): Ndị nlekọta ije ozi ọgbakọ ndị ahụ kwesịrị ịnọkọ kwurịta otú ka mma ọgbakọ ha ga-esi na-arụ ebe ndị ahụ. Ọgbakọ ndị na-asụ asụsụ dị iche nwere ike ịgwa ọgbakọ unu ka ha ghara izi ndị na-asụ asụsụ ọgbakọ ha ji amụ ihe ozi ọma ma unu gaa ozi ọma ma ọ bụrụ na ebe ha ketara izi ozi ọma dị obere. Ma ọ bụrụ na ọ gaghị adịrị ha mfe ịna-ezi ozi ọma n’ebe niile ha ketara n’ihi na ha nọ n’ebe dị iche iche dị anya, ha nwere ike ịgwa unu ka unu na-ezi ozi ọma n’ụlọ niile, ma mee ka ha mara mgbe ọ bụla unu hụrụ onye nwere mmasị na-asụ asụsụ ọgbakọ ha ji amụ ihe. (od 93 ¶37) Ha nwere ike ịgwa unu ka unu nyere ha aka chọta ndị na-asụ asụsụ ha ji amụ ihe bi n’ebe ọgbakọ unu na-ezi ozi ọma, nakwa adres ndị ahụ, ka ha nwee ike ideba ha ná ndị ha ga na-ezi ozi ọma. (km 7/12, igbe dị na peeji nke 5) Chetakwa na o nwere ike ọ bụghị otu asụsụ ka ndị niile bi n’otu ụlọ na-asụ. Otú ọ bụla a haziri isi nweta aha na adres ndị nwere mmasị na-asụ asụsụ ọzọ kwesịrị ịdaba n’ihe iwu obodo unu kwuru gbasara ichekwa ihe mmadụ gwara gị banyere onwe ya, ma ọ bụrụ na unu nwere ụdị iwu ahụ.
Kwado mkpebi ọ bụla e mere (Efe. 4:16): Gbalịa mee ihe ọ bụla onye nlekọta ije ozi ọgbakọ unu kwuru. Ò nwere onye ị na-amụrụ ihe asụsụ na-eru ya n’obi abụghị asụsụ ọgbakọ unu ji amụ ihe? Ọ ga-aka mma ka i nyefee ya ọgbakọ ma ọ bụ ìgwè na-amụ ihe n’asụsụ ya ka ha mụwara ya ihe, n’ihi na ọ ga-aka eme ka o nwee ọganihu ngwa ngwa.
Kwadebe akwadebe (Ilu 15:28; 16:1): Ọ bụrụ na onye ị hụrụ n’ụlọ ị gara ozi ọma anaghị asụ asụsụ gị, gbalịa zie ya ozi ọma. I nwere ike ibu ụzọ chee banyere asụsụ ndị mmadụ nwere ike ịna-asụ n’ebe unu na-ezi ozi ọma, gị adanloduzie Baịbụl na vidio anyị dị iche iche n’asụsụ ndị ahụ. I nwekwara ike iji JW Language mụta otú e si ekele ekele n’asụsụ dị iche iche.