Ole Ndị Na-eme Uche Jehova Taa?
1. Olee mgbe anyị ga-amalite ịmụ broshọ bụ́ Ole Ndị Na-eme Uche Jehova Taa? Oleekwa uru ịmụ ya ga-abara anyị?
1 Anyị ga-amalite ịmụ broshọ bụ́ Ole Ndị Na-eme Uche Jehova Taa? n’Ọmụmụ Baịbụl Ọgbakọ n’izu na-amalite n’Ọktoba 28. E wepụtara broshọ a ná mgbakọ distrikti afọ gara aga. Ihe mere e ji wepụta ya bụ ka anyị jiri ya na-enyere ndị anyị na-amụrụ Baịbụl aka ịmata ọgbakọ Jehova. Ịmụ akwụkwọ a ga-eme ka anyị hụkwuo ọgbakọ Jehova n’anya. Ọ ga-enyekwara anyị aka ịma otú anyị ga-esi jiri ya na-akụziri ndị mmadụ ihe.—Ọma 48:13.
2. Olee otú a ga-esi mụọ broshọ a n’ọgbakọ?
2 Otú A Ga-esi Amụ Ya: Onye na-eduzi Ọmụmụ Baịbụl Ọgbakọ kwesịrị ịhazi oge a ga-eji mụọ isiokwu ndị ahụ nke ọma ka e nwee ike iwepụtacha ihe ndị dị mkpa n’isiokwu nke ọ bụla. Mgbe ọ bụla ọ na-amalite isiokwu ọhụrụ, ọ ga-agụpụta isiokwu ya. Ọ gụpụtachaa ya, ya agwa onye na-agụ ihe ka ọ gụọ paragraf nke mbụ. A gụchaa ya, ya ajụọ ndị na-ege ntị ajụjụ ga-esi na paragraf ahụ. Ha zachaa, a gụpụta paragraf na-eso ya, kọwaa ya nke ọma, kwuokwa otú o si zaa ajụjụ ahụ bụ́ isiokwu a na-amụ. A ga-agụ paragraf nke ọ bụla iche, kọwaakwa ya tupu a gụọ nke na-eso ya. E kwesịkwara ikwu otú foto ndị dị n’isiokwu ahụ si gbasa ihe a na-ekwu. Gụọ amaokwu Baịbụl ndị dị ezigbo mkpa. Tupu a gafee n’isiokwu ọzọ, onye na-eduzi Ọmụmụ Baịbụl Ọgbakọ kwesịrị ịjụ ajụjụ ndị dị n’ala. Ha ga-enyere mmadụ niile aka icheta ihe a tụlere n’isiokwu ahụ. Ọ bụrụ na ebe e dere “Ihe Ọzọ Ị Ga-eme” dị n’isiokwu ahụ, a ga-agụpụta ya. A gụchaa ya, nwanna na-eduzi ọmụmụ ihe ga-ajụ ndị na-ege ntị otú ihe ahụ ga-esi baara onye a na-amụrụ Baịbụl uru. Ọ bụrụ na oge ka dị, nwanna na-eduzi ọmụmụ ihe nwere ike ịgụpụta isiokwu a na-amụ. Ya gụpụta ya, ya echere ka ndị na-ege ntị zaa ya n’ihi na ọ bụ ya ka ọ ga-eji mere ajụjụ a ga-eji tụleghachi ihe a mụrụ. Ọ bụghị iwu na ọ bụ otú a ka anyị na onye anyị na-amụrụ ihe ga-esi na-amụ broshọ a.
3. Gịnị ka anyị kwesịrị ime ka anyị nwee ike irite ezigbo uru mgbe a na-amụ broshọ a?
3 Ịmụ akwụkwọ a n’ụlọ tupu anyị abịa ọmụmụ ihe ga-eme ka anyị rite uru mgbe a na-amụ ya n’ọgbakọ. Gbaa mbọ na-etinye ọnụ ma a na-amụ ya. A na-amụ akwụkwọ a, chọpụta otú ihe a na-amụ ga-esi baara ndị ị na-amụrụ ihe uru. Ekpere anyị bụ ka ịmụ broshọ a nyere anyị aka ịma otú anyị ga-esi jiri ya nyere ndị ọzọ aka ime uche Chineke. Nke a ga-eme ka ha nwee ike ịdị ndụ ebighị ebi.—1 Jọn 2:17.