Ị̀ Ga-achọ Ka Ọ Nọrọ Ya Mgbe Ị Na-amụrụ Mmadụ Ihe?

N’ọtụtụ ọgbakọ, e nwere ndị nkwusa na-anaghịzi eje ozi ọma otú ha si ejebu n’ihi na ahụ́ adịghị ha ma ọ bụkwanụ na ha akaala nká. (2 Kọr. 4:16) Ì nwere ike ịgwa ụdị ndị a ka ha nọrọ ya mgbe ị na-amụrụ mmadụ Baịbụl? Ọ bụrụ na ahụ́ onye nkwusa anaghị ekwe ya apụ apụ, gị na onye ị na-amụrụ ihe nwere ike ịga n’ụlọ ya ka o soro gị mụọrọ ya ihe. I nwekwara ike ịgwa onye ahụ́ na-adịghị ka o soro gị gaa nletaghachi ole na ole ma ọ bụ gaa ozi ọma ụlọ n’ụlọ n’ebe na-adịghị anya. Chetakwa na o teela ọtụtụ n’ime ndị nkwusa merela agadi malitere gawa ozi ọma. N’ihi ya, ị ga-erite uru n’aka ha, hanwa ga-eritekwa n’aka gị. (Rom 1:12) Jehova ga-agọzi gị ma ị gbalịa na-eme ihe gosiri na ị hụrụ ụmụnna ndị a n’anya.—Ilu 19:17; 1 Jọn 3:17, 18.