Jiri jw.org Na-ezi Ndị Mmadụ Ozi Ọma

Ebe anyị na-edebe ihe n’Ịntanet na-enyere anyị aka ikwusa ozi ọma “n’ebe kasị anya n’ụwa.” (Ọrụ 1:8) Ọtụtụ ndị anyị na-ezi ozi ọma amaghị otú ha ga-esi na-abanye n’ebe ahụ. Ọ bụ anyị ga-egosi ha otú ha ga-esi na-abanye.

O nwere otu onye nlekọta sekit tinyere vidio bụ́ Olee Uru Ịmụ Baịbụl Ga-abara Gị? n’ekwenti ya ma na-egosi ya ndị mmadụ. Dị ka ihe atụ, ọ na-aga ozi ụlọ n’ụlọ, hụ mmadụ, ya asị ya: “Ana m enyere ndị mmadụ aka ka ha mata azịza ajụjụ atọ ndị a: Olee ihe mere nsogbu ji jupụta n’ụwa? Olee otú Chineke ga-esi eme ka nsogbu ndị a kwụsị? Oleekwa otú anyị ga-esi na-edi nsogbu ndị a? Vidio a na-etoghị ogologo ga-aza ajụjụ ndị a.” Ọ na-akpọnye ya ozugbo ka ọ mara ihe onye ahụ ga-ekwu. Vidio a na-atọ ndị mmadụ ụtọ n’ihi ya, ọtụtụ ndị na-ekiriru ya n’isi. Onye ahụ lechaa ya, onye nlekọta sekit ahụ asị ya: “Ị nụrụnụ na i nwere ike idejupụta fọm ka a bịa mụwara gị Baịbụl. Ma, ebe ọ bụ na m nọ ebe a, ka m gosinụ gị otú anyị na ndị mmadụ si amụ Baịbụl.” Ọ bụrụ na onye ahụ ekweta, ọ na-eji broshọ bụ́ Ozi Ọma Si n’Aka Chineke! gosi ya otú anyị si amụrụ ndị mmadụ ihe. Ma, ọ bụrụ na onye ahụ enweghị ohere, ha eyie mgbe ọzọ ọ ga-abịa. Ọ bụrụ na ọ gaa ịzụrụ ihe, ọ na-egosikwa onye ọ bụla ọ hụrụ ebe ahụ vidio ahụ. Ì ji jw.org ezi ndị mmadụ ozi ọma?