Ụlọ Akwụkwọ Ije Ozi nke Afọ 2015 Ga-enyere Anyị Aka Ịna-ezi Ihe nke Ọma

¹ Eze Devid dere, sị: “Ka ihe ọnụ m na-ekwu na ihe m na-atụgharị n’uche bụrụ ihe na-atọ gị ụtọ, Jehova, Oké Nkume m na Onye Mgbapụta m.” (Ọma 19:14) Anyị chọkwara ka okwu anyị na-atọ Jehova ụtọ n’ihi na obi dị anyị ụtọ na anyị na-ekwu eziokwu si na Baịbụl ma n’ọmụmụ ihe ma n’ozi ọma. Ụlọ Akwụkwọ Ije Ozi Ọchịchị Chineke bụ otu n’ime ụzọ Jehova si akụziri anyị otú anyị ga-esi na-ezi ozi ọma. A na-enwe ya kwa izu n’ihe karịrị otu narị puku ọgbakọ na puku iri na otu n’ụwa niile. O nyerela ọtụtụ ụmụnna n’ụwa niile aka ịmụta otú e si eji akọ na obi ike ezi ozi ọma nke ọma n’agbanyeghị ihe ha na-arụ nakwa obodo ha si.—Ọrụ 19:8; Kọl. 4:6.

² Ihe omume ụlọ akwụkwọ nke afọ 2015 ga-esi na Baịbụl Nsọ—Nsụgharị Ụwa Ọhụrụ nke Akwụkwọ Nsọ, Ụlọ Nche, na Ihe Baịbụl Na-ekwu. Agbanweela nkeji ole e ji eduzi isi ihe ndị sitere n’ọgụgụ Baịbụl nakwa nke e ji eme ihe omume nke 1. Anyị ga-atụle mgbanwe ndị e mere na ntụziaka e nyere gbasara otú a ga-esi na-eduzi ụlọ akwụkwọ a na paragraf ndị na-esonụ.

³ Isi Ihe Ndị Sitere n’Ọgụgụ Baịbụl: Ụmụnna ndị a ga-ekenye ya ga na-eji nkeji abụọ atụle otu ihe ha mụtara n’ọgụgụ Baịbụl izu ahụ nke ga-agba ụmụnna ume. Ọ bụrụ na nwanna e nyere ya akwadoo nke ọma, ọ ga-enwe ike iji nkeji abụọ ahụ kwuo ihe ga-abara ọgbakọ uru. O kwuchaa, ụmụnna ga-eji nkeji isii kwuo ihe ha mụtara. Ihe onye ọ bụla ga-ekwu ekwesịghị ịgafe tịnkọm tịnkọm iri atọ. Anyị kwadoo nke ọma, anyị ga-ejili tịnkọm tịnkọm iri atọ kwuo ihe bara uru. Ime otú ahụ ga-eme ka anyị mụta ikwu ihe bara uru na tịnkọm tịnkọm ole na ole. Ọ ga-emekwa ka ọtụtụ ndị nwee ike ikwu ihe ha mụtara n’ọgụgụ Baịbụl izu ahụ.

⁴ Ihe Omume nke 1: Ihe a ga-ejizi na-eme ihe omume a bụ nkeji atọ ma ọ bụ ihe na-erughị ya. Ebe a ga na-agụ agaghịkwa ehi nne. Nwanna ọ bụla e nyere ihe omume a kwesịrị ịmụ ya nke ọma. Ọ mụwa ya, o kwesịrị ịgụpụta ya agụpụta, lekwasịkwa anya karịchaa n’ịkpọ okwu nke ọma na ịgụ ihe were were otú ụmụnna ga-aghọta ya. Anyị niile kwesịrị ịgba mbọ na-agụ ihe nke ọma n’ihi na ọ na-enyere anyị aka n’ofufe Jehova. Obi dị anyị ụtọ na ọtụtụ ụmụ anyị na-agụ ihe nke ọma. Anyị na-ekelekwa ndị nne na nna maka otú ha si enyere ụmụ ha aka ka ha na-agụ ihe nke ọma.

⁵ Ihe Omume nke 2: Ọ bụ nwanna nwaanyị ka a ga-ekenye ya. A ga-eji nkeji ise na-eme ya. Onye e nyere ya kwesịrị iji isiokwu e kenyere ya mee ya. Ọ bụrụ na ihe omume a esi n’akwụkwọ bụ́ Ihe Baịbụl Na-ekwu, e kwesịrị ime ya otú ọ ga-adaba n’ihe na-eme n’ókèala unu ma unu gaa ozi ọma nakwa otú ọ ga-abara ụmụnna uru. Ọ bụrụ na e deghị ebe ihe omume a si, nwa akwụkwọ ga-eji aka ya mee nchọnchọ n’akwụkwọ anyị chọta ihe ọ ga-ekwu. O nwere ike iwebata amaokwu Baịbụl ndị ọzọ dabara n’isiokwu ya. Onye nlekọta ụlọ akwụkwọ ga-ekenye ya otu onye nwe ụlọ.

⁶ Ihe Omume nke 3: E nwere ike ikenye ya nwanna nwoke ma ọ bụ nwanna nwaanyị. A ga-eji nkeji ise na-eme ya. Mgbe ọ bụla e kenyere nwanna nwaanyị ihe omume a, o kwesịrị ime ya otú e kwuru ka e si na-eme Ihe Omume nke 2. E kenye ya nwanna nwoke, o kwesịrị ikwu ya otú e si ekwu okwu ihu ọha. Ọ ga-eji aka ya chọta amaokwu Baịbụl ndị dabara adaba ọ ga-eji kwuo okwu n’isiokwu e kenyere ya.

⁷ Ihe Ọhụrụ Ụmụnna Nwoke Ga Na-eme n’Ihe Omume nke 3: Ọ bụrụ na ihe omume e kenyere nwanna nwoke si n’akwụkwọ bụ́ Ihe Baịbụl Na-ekwu, ihe ọ ga-eme ga-abụ ihe ngosi ebe ọ na-eduzi ofufe ezinụlọ ma ọ bụ ebe ọ na-ezi mmadụ ozi ọma. Onye nlekọta ụlọ akwụkwọ ga-ekenye ya ọnọdụ okwu nakwa onye ga-emere ya onye nwe ụlọ. Onye ga-emere ya onye nwe ụlọ kwesịrị ịbụ onye ezinụlọ ya ma ọ bụ nwanna nwoke ọzọ n’ọgbakọ unu. O nwere ike iwebata amaokwu Baịbụl ndị ọzọ dabara n’isiokwu ya. Mgbe ụfọdụ, e nwere ike ikenye okenye ihe omume a. Okenye e kenyere ihe omume a nwere ike iji aka ya họrọ ọnọdụ okwu ọ ga-eji eme ya, chọtakwa onye ga-emere ya onye nwe ụlọ. O doro anya na anyị niile ga-amụta ihe n’aka ndị okenye maka na ha ga-egosi anyị ụzọ dị iche iche e si ezi ihe.

⁸ Ndụmọdụ: Nwa akwụkwọ nke ọ bụla mechaa ihe omume, onye nlekọta ụlọ akwụkwọ kwesịrị iji nkeji abụọ jaa ya mma, nyekwa ndụmọdụ nke ga-esi n’akwụkwọ bụ́ Rite Uru ná Mmụta A Na-enweta n’Ụlọ Akwụkwọ Ije Ozi Ọchịchị Chineke. Mgbe onye nlekọta ụlọ akwụkwọ na-akpọpụta onye ga-eme ihe omume, o kwesịghị ikwu ebe onye ahụ ga-arụ ọrụ. Ma, nwa akwụkwọ ahụ mechaa ihe omume, ọ ga-aja ya mma, kwuzie ebe ọ rụrụ ọrụ na ebe o mere nke ọma. O nwekwara ike iji obiọma kwuo uru nwa akwụkwọ ahụ ga-erite ma ọ rụkwuo ọrụ n’ebe ahụ.

⁹ Fọm ndụmọdụ dị na peeji nke 79 ruo nke 81 n’akwụkwọ Ụlọ Akwụkwọ Ije Ozi. Nwa akwụkwọ nke ọ bụla mechaa ihe omume ya, onye nlekọta ụlọ akwụkwọ ga-ede ihe n’ebe nwa akwụkwọ ahụ rụrụ ọrụ n’akwụkwọ nke nwa akwụkwọ ahụ. Mgbe naanị ya na nwa akwụkwọ ahụ nọ, o kwesịrị ịjụ ya ma ò mere ihe omume dị n’isiokwu a gwara ya rụọ ọrụ. A gbasaa ọmụmụ ihe ma ọ bụ n’oge ọzọ, onye nlekọta ụlọ akwụkwọ nwere ike ịja nwa akwụkwọ ahụ mma ma ọ bụ gwa ya ihe ga-enyere ya aka ịna-emekwu nke ọma. Nwa akwụkwọ ọ bụla kwesịrị ile aro ọ bụla onye nlekọta ụlọ akwụkwọ tụụrụ ya anya ka ihe ga-enyere ya aka ịna-emekwu nke ọma.—1 Tim. 4:15.

¹⁰ Ọ bụrụ na nwa akwụkwọ erie oge, onye nlekọta ụlọ akwụkwọ ma ọ bụ onye ọzọ kwesịrị iji akọ mee ka ọ mara na oge ya ezuola. O nwere ike ịkụ ihe ga-eme mkpọtụ ma ọ bụ ihe ọ bụla ọzọ ga-eme ka ọ mara na oge ya ezuola. Nwa akwụkwọ kwesịrị ịpịachi ihe ọ na-ekwu ozugbo ma si n’elu ikpo okwu pụọ ma a gwa ya na oge ya ezuola.—Gụọ akwụkwọ Ụlọ Akwụkwọ Ije Ozi, p. 282, para. 4.

¹¹ A na-agba onye ọ bụla ruru eru ume ka o deba aha ya n’Ụlọ Akwụkwọ Ije Ozi Ọchịchị Chineke. (Gụọ akwụkwọ Ụlọ Akwụkwọ Ije Ozi, p. 282, para. 6.) Ụlọ akwụkwọ a enyerela ndị Jehova aka ịmụta ihe ha na-akụziri ndị mmadụ ma ha gaa ozi ọma. Ihe ha na-amụtakwa na ya na-eme ka ha na-akwanyere ndị ha na-ezi ozi ọma ùgwù, hụkwa ha n’anya. Obi na-atọ Jehova ezigbo ụtọ n’ihi na ndị na-erite uru n’ihe ndị ọ na-akụziri anyị na-enye ya otuto.—Ọma 148:12, 13; Aịza. 50:4.