Ị̀ Na-akwado Maka Ncheta Ọnwụ Jizọs?

N’abalị iri na atọ n’ọnwa Naịsan afọ 33, Jizọs na ndị na-eso ụzọ ya nọ na-ejikere maka Ememme Ngabiga. Ọ ma na mgbede ụbọchị ahụ bụ mgbede ikpeazụ ya na ha ga-anọrị tupu e gbuo ya. Ha mechaa ememme ahụ, ya amalite Nri Anyasị nke Onyenwe Anyị. Ma, ha kwesịrị ịkwado ememme ahụ akwado tupu ha emewe ya n’ihi na ọ dị ezigbo mkpa. N’ihi ya, ọ gwara Pita na Jọn ka ha gaa dozie ebe ha ga-anọ eme ya. (Luk 22:7-13) Kemgbe ahụ, Ndị Kraịst na-akwado akwado tupu ha echeta ọnwụ Kraịst n’afọ ọ bụla. (Luk 22:19) Olee ihe ndị anyị kwesịrị ime iji kwadoo maka Ncheta Ọnwụ Kraịst a ga-eme n’abalị atọ n’ọnwa Eprel?

Ihe Ndị Okenye Ga-eme:

Ha ga-ekpebi ma à ga-anọ n’Ụlọ Nzukọ Alaeze ma ọ bụ n’ebe ọzọ dị mma eme ya. Ebe ahụ kwesịrị ịba ndị niile ga-abịanụ. Ọkụ kwesịrị ịdị ya, ikuku kwesịkwara ịna-abata ya nke ọma. Ndị okenye ga-ahụkwa na ebe ahụ dị ọcha.
Ha ga-ahọpụta nwanna ruru eru ga-ekwu okwu n’ụbọchị ahụ, onyeisi oche, na ndị ga-ekpe ekpere tupu e bugharịwa achịcha na mmanya.
Ọ bụrụ na ihe karịrị otu ọgbakọ ga-anọ otu ebe eme ya, ndị okenye ga-ekpebi mgbe ọgbakọ nke ọ bụla ga-eme nke ha nakwa mgbe ha kwesịrị ịhapụ ebe ahụ. Ha ga-ahazikwa otú ụgbọala ga-esi na-abata na-apụ.
Ha ga-ahọpụta ndị atendantị na ndị ga-ebugharị achịcha na mmanya, gwakwa ha ihe ha ga-eme.
Ha ga-ahụ na e nwetara achịcha na mmanya a ga-eji eme ya. Ha ga-ahụkwa na e nwetara efere, iko mmanya, tebụl dị mma, na ákwà a ga-atụ n’elu ya.

Ihe Ndị Nkwusa Ga-eme:

Ha ga-agba ezigbo mbọ kesaa akwụkwọ anyị ji akpọ ndị mmadụ òkù.
Ha ga-ede aha ndị ha ga-akpọ òkù n’akwụkwọ, ma ndị ha na-amụrụ ihe ma ndị ikwu ha ma ụmụ akwụkwọ ibe ha ma ndị ọrụ ibe ha ma ndị ọzọ.
Ha ga-agụ amaokwu Baịbụl ndị a na-agụ n’oge a na-echeta ọnwụ Jizọs ma tụgharịa uche n’ihe ha gụrụ.
Ha ga-agba mbọ bịa n’oge n’ụbọchị ahụ ka ha nwee ike ịnabata ndị a kpọrọ òkù.