Otú Anyị Ga-esi Na-emekwu Nke Ọma n’Ozi Ọma—Inye Ndị Mmadụ Akwụkwọ Bible Na-akụzi

Ihe Mere O Ji Dị Mkpa: Akwụkwọ Bible Na-akụzi bụ akwụkwọ anyị kacha eji akụziri ndị mmadụ Baịbụl. Ma, tupu anyị ejiri ya mụwara mmadụ ihe, anyị kwesịrị inye ya onye ahụ. N’ihi ya, anyị niile kwesịrị ịgba mbọ mụta otú anyị ga-esi na-enye ya ndị mmadụ n’ozi ọma. (Ilu 22:29) E nwere ụzọ dị iche iche anyị nwere ike isi na-enye ya ndị mmadụ. Onye ọ bụla ga-ahọrọkwa nke ga-adịrị ya mfe.

Ihe Ị Ga-eme:

Jụọ onye ị na-ezi ozi ọma otu ajụjụ a zara n’otu isiokwu dị́ n’akwụkwọ a. Ajụjụ i nwere ike ịjụ ya bụ otu n’ime ajụjụ ndị ahụ na-adị ná mbido isiokwu ọ bụla. O kwuchaa ihe o chere, gị agụọrọ ya ihe Baịbụl kwuru. Ị gụchaa, gosi ya paragraf zara ajụjụ ahụ, gị na ya nwekwara ike iji nkeji ole na ole tụlee ya.
Ihe ọzọ i nwere ike ime bụ iji ihe ndị e dere ná mbido akwụkwọ a jụọ onye i nwetara n’ụlọ ajụjụ, gị egosikwa ya ebe a zara ajụjụ ahụ n’akwụkwọ a. Dị ka ihe atụ, i nwere ike ịgwa ya gbasara akụkọ ọjọọ a kọrọ n’akụkọ ụwa ma gwa ya na e nwere ụfọdụ ajụjụ ndị mmadụ na-achọ ịmata azịza ha. Gosi ya ajụjụ ndị ahụ dị na peeji nke atọ. Otú ọzọ i nwere ike isi jiri ya zie mmadụ ozi ọma bụ ịgwa onye ị gara na nke ya na o nwere ihe ọma ga-eme n’ọdịnihu ị bịara ịkọrọ ya. Gosi ya ihe ndị ahụ e sere na peeji nke anọ na nke ise, gị ajụọ ya nke ọ ga-achọ ka o mezuo. Ụzọ ọzọ i nwere ike isi nye ya mmadụ bụ ịgwa onye ahụ na o nwere ajụjụ dị iche iche ndị mmadụ na-ajụ kemgbe ndị ị ga-achọ ka i nyere ya aka chọta azịza ha. Gosizie ya ajụjụ ndị ahụ dị na peeji nke isii, gị agwa ya ka ọ họta nke ọ ga-achọ ka unu tụlee.
Jiri ya malitere mmadụ ọmụmụ Baịbụl n’ụbọchị mbụ ị hụrụ ya n’ozi ọma. I nwere ike ịgwa onye ị hụrụ n’ozi ọma, sị: “O nwere akwụkwọ anyị na ndị mmadụ na-eji amụ Baịbụl m ga-achọ igosi gị. Ị̀ hụtụla ya mbụ? [Chere ka ọ zaa.] M ga-achọ iji nkeji ole na ole gosi gị otú anyị na ndị mmadụ si eji ya amụ Baịbụl.”

Mee Ihe A n’Ọnwa A:

Unu nwewe ofufe ezinụlọ, meenụ ihe ngosi otú unu nwere ike isi nye ndị mmadụ akwụkwọ Bible Na-akụzi n’ozi ọma.
Ị nọrọ ozi ọma, gwa onye gị na ya so otú ị chọrọ isi nye ya ndị mmadụ. (Ilu 27:17) Ọ bụrụ na otú ị chọrọ isi nye ya mmadụ adịchaghị mma, gbaa mbọ gbanwee ya.