Otú Anyị Ga-esi Na-emekwu nke Ọma n’Ozi Ọma—Iji Akwụkwọ Bible Na-akụzi Egosi Otú Anyị Si Amụrụ Ndị Mmadụ Baịbụl

Ihe Mere O Ji Dị Mkpa: Anyị kwuo na anyị na ndị mmadụ na-amụ Baịbụl n’anaghị ha ego, ọtụtụ ndị anaghị aghọtacha ihe ọ pụtara. Ụfọdụ na-eche na e nwere ebe ha ga-edeba aha ka a kụziwere ha ihe ma ọ bụ na a ga na-ezitere ha akwụkwọ ha ga na-agụ otú ahụ ụfọdụ ndị na-aga mahadum si eme. N’ihi ya, kama ịgwa ha ya n’ọnụ, ọ ga-aka mma ma i gosi ha otú anyị na ndị mmadụ si amụ Baịbụl. I nwere ike iji nkeji ole na ole gosi mmadụ otú anyị si eme ya ka onye ahụ ghọta na o sighị ike nakwa na ọ ga-abara ya ezigbo uru.

Ihe Anyị Ga-eme:

I kelechaa onye ị bịara na nke ya, jụọ ya ma ọ̀ na-adị na-eche ihe echi ga-abụ.
Kwuo na ọtụtụ ndị na-echekwa ụdị ihe ahụ. Gosi ya isiokwu ndị dị n’akwụkwọ Bible Na-akụzi. Kọwaara ya na e dere isiokwu ndị dị n’akwụkwọ a otú ha ga-esi dịrị mmadụ mfe ịghọta ihe Baịbụl na-akụzi banyere ọdịnihu nakwa isiokwu ndị ọzọ. Jụọ ya isiokwu nke ọ ga-achọ ka unu tụlee.
Nye ya akwụkwọ Bible Na-akụzi, gosi ya peeji ebe isiokwu ọ họọrọ dị. Kọwaara ya na a zara ajụjụ ndị ahụ dị ná mmalite n’ime paragraf ndị dị n’isiokwu ahụ.
Ọ bụrụ na ọ ma agụ ihe, gwa ya ka ọ gụọ paragraf nke mbụ. A gụchaa ya, gụpụta ajụjụ ya. Tụleenụ azịza ya. Gụọkwanụ amaokwu Baịbụl ndị kwadoro ihe unu na-ekwu, tụleekwanụ ya. Gosi ya otú i si kaa azịza ihe n’akwụkwọ gị.
Gụpụtanụ paragraf nke abụọ. A gụchaa ya, jụọ ya ajụjụ ya, gbaa ya ume ka ọ ghara ịgụpụta ya agụpụta kama ka ọ zaa ihe ọ ghọtara.
Jaa ya mma. Yiekwanụ mgbe ọzọ ị ga-abịa ka unu mụchaa isiokwu ahụ.
I nwekwara ike imepe jw.org/ig gosi ya vidio bụ́ Olee Otú Anyị na Ndị Mmadụ Si Amụ Baịbụl?

Mee Ihe A n’Ọnwa A:

Rịọ Jehova ka o nyere gị aka ịmalitere mmadụ ọmụmụ Baịbụl.—Fil. 2:13.
Ị gaa ozi ọma, gbaa mbọ jiri akwụkwọ Bible Na-akụzi gosi ndị mmadụ otú anyị na ndị mmadụ si amụ Baịbụl, ma ọ bụkwanụ gị egosi ha vidio bụ́ Olee Otú Anyị na Ndị Mmadụ Si Amụ Baịbụl?