Usoro Ihe Omume Ọhụrụ Maka Mgbakọ Sekit

Ụwa a chọrọ ka anyị kwere na usoro ihe dị ugbu a ga-adịgide ruo mgbe ebighị ebi. Ma Okwu Chineke na-agwa anyị ihe dị iche na nke a. (1 Jọn 2:15-17) Ọ na-enyere anyị aka ịghọta na ‘ịkpakọba akụ̀ n’elu ala’ bụ ịchụso ihe efu. Iji wusie ndị Chineke ike, isiokwu ga-edu mgbakọ sekit nke afọ 2007 ga-abụ, ‘Na-akpakọba Akụ̀ n’Eluigwe.’—Mat. 6:19, 20.

Mmadụ ịhụ ihe onwunwe n’anya so n’ihe Ndị Efesọs 2:2 kpọrọ ‘ikike nke ikuku, bụ́ mmụọ nke na-arụ ọrụ ugbu a n’ime ụmụ nnupụisi.’ Dị nnọọ ka ikuku nkịtị si dị ebe nile, na-eche ka e kuru ya, otú ahụkwa ka “mmụọ nke ụwa” si jupụta ebe nile. (1 Kọr. 2:12) Ebe ọ bụ na ọ na-enwe nnọọ mmetụta n’ahụ́ ndị mmadụ, a pụrụ ikwu na o nwere “ikike.” Mgbakọ sekit a ga-enyere anyị aka izere ịhụ ihe onwunwe n’anya, nke bụ́ ihe e ji mara ụwa a, ma mee ka anyị lekwasị nnọọ anya n’ihe kachasị anyị mkpa ná ndụ. (Mat. 6:33) Mgbakọ a ga-enyekwara anyị aka ịdabere n’ebe Jehova nọ ka anyị na-ezi ozi ọma ahụ n’agbanyeghị nrụgide na ọnwụnwa ndị anyị na-ezute.

Hụ na ị nọ ya n’ụbọchị abụọ ndị ahụ, hụkwa na ‘i tinyere uche n’ihe ndị ị ga-anụ karịa otú ị na-adị etinye.’ (Hib. 2:1) Detuo isi ihe ụfọdụ ndị a ga-ekwu ná mgbakọ a bụ́ ndị ị ga-eji mee ihe ná ndụ gị nakwa n’ozi gị. Ị ga-enweta agbamume na ike ị ga-eji nọgide ‘na-akpakọba akụ̀ n’eluigwe’ ma ọ bụrụ na ị nọrọ ya malite n’isi ruo ná ngwụsị nke mgbakọ a a kwadebere iji mee ka mmekọrịta anyị na Chineke ka mma!