Manipud Managbasatayo

Panaginum ken Panagmaneho

Buyogen iti adu a rag-o a makapagsuratak ket kunaen iti deputy sheriff a mangay-aywan iti trapiko ditoy kinalikagumanna ti 100 a kopia iti ruaryo maipapan iti “Panaginum ken Panagmaneho.” (Agosto 8, 1986) Agdama a nairaman iti proyekto maipapan iti tema ket agpalawag iti managdengngeg a buklen dagiti makinkukua iti bar ken restaurant, a mangipagpaganetget iti rebbengenda a saanda nga ipalubos kadagidiay agmaneho ti panaginumda iti adu. Pagyamanan iti kanayon a kaaddayo sadiay nga addaan iti kasapulanmi, idi kasapulanmi dayta.

J. P., E.U.A.

Aggayyem Laeng

Anian a panagsiddaawko idi naawatko ti ruaryo nga addaan iti artikulo nga “Agimtuod dagiti Agtutubo . . . ‘Di Kadi Mabalin nga Aggayyemkami Laeng?’” (Agosto 22, 1986) Makitayo, iti dayta a kanito, addaanak iti daytoy met laeng a parikut. 20 ti edadko, ket ti agtutubo a katrabahuak mariknana nga agayat kaniak, ngem diak agayat kenkuana. Itan addaanakon iti sungbat iti nadakamat iti ngato nga artikulo.

M. W., Pederal a Republika ti Alemania

Addaan Lapped nga Annak

Ti artikuloyo a “Tallopulo a Tawen ti Ayat ken Kinapasnek” (Hulio 8, 1986) ket nakasaysayaat ken makaparegta kadagiti nagannak iti Down’s syndrome nga annak, ngem diak apresiaren ti grupo dagiti sasao a: “Dagiti taga ruar masansan a pagarupenda a ti panangaywan iti ubing nga addaan iti lapped ket maysa a rebbengen a bassit laeng ti gunggonana. Anian ti panagbiddutda!” Kas nagannak iti nakaro ti lappedna nga anak a babai, sipupudno a maibagak a mabalin a nagbiddutkayo iti panangikabilyo kadagiti amin nga addaan lapped nga annak iti maymaysa a kategoria. Ti anakko saan a makapagna, makasao, makakita, makapangan a bukodna, wenno di mabalin nga awan ti lampinna. Masapul a masipilio ti ngipenna, ket masapul a madigos iti inaldaw. Ti panangpakan ket agmalmalem a trabaho. Ti panagkonsulta kadagiti mangngagas, nutrisionista, pediatrician, ken dadduma pay, alaenna ti adu nga or-oras, ket kankanayon ti panangikagumaan a manggun-od iti umiso a tulong ken serbisio a kasapulan. Dagiti nagannak dagiti addaan lapped nga ubbing ay-ayatenda unay dagiti annakda, ngem padpadasek nga ibaga a dikay laeng maawatan ti kasasaad, dikay padasen a liwliwaen wenno ipabasol ti kasasaad babaen ti panagkuna: “Bueno, nakagun-odda iti adu a rag-o ken kinaragsak.”

J. B., Canada

Bayat dagiti adun a tawtawen, nangipablaakkamin iti adu a salaysay ti tao a mismo a nakapadas maipapan kadagiti nagannak a nangaywan iti addaan lapped nga anak. Mariknami nga adda adu a napapateg nga impormasion a makagunggona kadagiti dadduma nga adda iti kasta met laeng a kasasaad ket ti panangipablaak kadagita nga artikulo ti mabalin a makaparegta kadagiti dadduma. Sigurado a dikam kayat a nayonan ti rigat dagiti pampamilia nga addaan iti nakarigrigat a parikut. Iti salaysayna, ni Anna Field bigbigenna a ti tunggal kaso ket naiduma ken agduduma met dagiti kasasaad iti pagtaengan. Nupay no iti kasasaadda addada met dagiti narikut ken makapaladingit a tiempo, sipapasnek a mariknana a ti addaan lapped nga anakda a babai ti nakaipaay nga ad-adda iti rag-o ngem ladingit kadakuada. Maragsakankami ta kasta ti kasasaad. Maigiddato iti dayta, mabigbigmi nga adda met dagiti narikrikut a kaso a sadiay ti ubing pulos a di makatulong iti aniaman a pamay-an a makaipaay kadagiti dadakkelna iti ragsak. Dagiti dadakkel ti kasta nga ubing ti pudno a maikari iti mannakipagrikna a pannakaawat dagiti amin agraman ti mainugot a tulong dagiti nasinged a gagayyemda. Pudno a makipagriknakami kadagiti amin a nagannak nga adda iti daytoy a narikut a kasasaad.​—ED.