Dadduma nga Agtutubo Dida Kayat ti Agbiag
TI PANAGBEKKEL dagiti agtutubo ket nakaam-amak nga uso idiay India. Pattapattaen dagiti managsirarak dayta a pagilian nga iti tunggal dua a minuto gandaten ti maysa a kettelen ti biagna, ket tunggal sangapulo a minuto agbekkel ti maysa.
Bayat ti 1990 adda 60,000 a tattao a nagbekkel idiay India, ken “dandani kaguddua kadakuada ti agedad iti nagbaetan ti 18 ken 35,” kinuna ti magasin nga India Today. Dadduma nga agbekkel ket agedad laeng ti sangapulo. Ti pudno a bilang dagiti agbekkel idiay India ket di ammo agsipud ta adu a pamilia kaykayatda nga ipadamag dagiti panagbekkel kas aksidente tapno maliklikanda ti pannakaibabain.
Kunaen ti India Today a “nasurok a 2,500 nga agtutubo kinettelda ti biagda gapu iti di naragsak nga ayan-ayat” bayat ti 1990. Sigun kadagiti sikiatrista, ti sabali pay a makagapu ti umad-adu a panagbekkel dagiti agtutubo isu dagiti rigat ti pannakisalisal ken katan-ok ti magapuanan idiay eskuelaan, a mangrugi iti naganus nga edad.
Inayon ti magasin a “patien dagiti sikiatrista a ti pannakarba ti dua-kaputotan a sangakabbalayan dakkel a pakaigapuan ti panagleddaang ken liday a mangparissik iti tarigagay nga agbekkel” kadagiti ubbing. Kinuna ti maysa a sikiatrista, ni Dr. S. G. Dastoor: “No nangbusbos laeng koma dagiti nagannak ti ad-adu a panawenda a kadua dagiti annakda ken inammo no aniat’ mangburburibor kadakuada, naispal koma dagiti biagda. Masansan a mapanunotko a dagiti nagannak ti makasapul ti pammalakad.”
Paregtaen ti Biblia dagti Kristiano a nagannak a mangbusbosda ti panawen a kadua dagiti annakda ken iyukuok dagiti nadiosan a pagalagadan kadakuada. (Deuteronomio 6:4-9) Mamalakad met ti Kasuratan kadagiti nagannak a dida ruroden dagiti annakda no di ket padakkelenda ida iti “alagaden ken panangiturong-panunot ni Jehova.”—Efeso 6:4.
Kasta met, maparmek dagiti Kristiano nga agtutubo dagiti rigat ita babaen ti panangiyaplikar ti nainsiriban a balakad ti Biblia idiay Filipos 4:6, 7, nga agkuna: “Dikay madanagan iti uray ania, no di ket kadagiti isuamin, maipakaammo koma dagiti dawdawatyo iti Dios, gapu iti kararag ken araraw, agraman panagiaman; ket ti talna ti Dios, a daeganna ti amin a pannakaawat aywanannanto dagiti puspusoyo ken dagiti panunotyo ken Kristo Jesus.”