Ti Iglesia Anglicano iti Australia—Nabingay a Balay
Babaen ti koresponsal ti Agriingkayo! idiay Australia
SAANEN a kabbaro ti debate no dagiti babbai ket rumbeng a maordinan kas papadi ti Iglesia Anglicano. Ngem daytat’ nabiit pay a nagbalin a dakkel nga isyu idiay Australia.
Idi Enero 1992, impakaammo ti obispo ti Canberra ken Goulbourn dagiti plano tapno ordinan ti adu a diakonesa kas papadi ti Iglesia Anglicano. Dinan inuray ti simmaganad a miting ti konsilio ti iglesia. Kinapudnona, namitlon a nangngeddeng ti konsilio ti iglesia maibusor kadagita nga ordinasion.
Kas ti ninamnama, sangapulo a babbai ti naordinan kas papadi ti Anglicano idi kattapog ti Marso idiay Perth, Australia, agpapan pay iti ibubusor. Di pakasdaawan ngarud, a naisentro ti atension iti simmaruno a miting ti konsilio ti iglesia. Awan pangngeddeng ti mitingda idi Hulio, isu a naituding a maangay ti “maysa a naisangsangayan a miting” idi Nobiemre 21, 1992.
Makalawas sakbayna, binutosan ti General Synod of the Church of England ti pannakaordin dagiti babbai. Ninamnama ti adu a daytoy a desision ket makaallukoy idiay Australia. Idi nagmimiting ti konsilio idiay Australia, inkomento ti maysa a diario: “Nakaro ti debate ken panagsusubang iti naisangsangayan nga aldaw a napnuan-tension.” Sakbay a naammuan ti resulta ti balota, kiniddaw ti presidente ti konsilio nga agulimekda koma bayat ti pannakaipakaammo ti resultana. Idi naipakaammo a naanamonganen ti pannakaordin dagiti babbai, impeksa ti dadduma idiay tallaong dagiti rikriknada. Idi nagsaknapen ti damag idiay ruar, adut’ nagdir-i, ket naiwagayway dagiti streamer.
Saan nga amin ket nagdir-i. Naadaw manipud The Sydney Morning Herald ti kinuna ti arsobispo ti Sydney: “Ditay mabalin a sangsangkamaysa nga agbiag a naragsak . . . Addanto dua a denominasion iti maymaysa nga Iglesia Anglicano.” Kinuna pay ti maysa a klero a ti pannakaordin dagiti babbai kas papadi ti pagilasinan a “ti Iglesia Anglicano ti Australia ket marmarpuogen.”
Mangted ti Biblia iti simple a pakaibatayan dagita a pannakaseknan. Kinuna a mismo ni Jesu-Kristo: “Marbekto ti tunggal pagarian a mabingaybingay a maibusor met la kenkuana; ket di makapagtakder ti ili, wenno balay a malasinlasin iti maibusor met la kenkuana.”—Mateo 12:25, The New English Bible.
Mangituggod daytoy iti saludsod a kasla naliwayan kabayatan ti panagsususik ti iglesia, Aniat’ kuna ti Biblia maipapan iti akem dagiti babbai iti kongregasion? Nupay pasingkedanna nga agpadpada nga ipatpateg ni Jehova a Dios dagiti dedikado a lallaki ken babbai, tinudinganna dagiti lallaki ken babbai iti nadumaduma nga akem iti kongregasion. (Galacia 3:28) Kastoy ti pannakailawlawagna idiay 1 Corinto 11:3: “Ti Panguluen ti isuamin a tao isu ni Kristo, ket ti panguluen ti babai isu ti lalaki, ket ti Panguluen ni Kristo isu ti Dios.” (NEB) Gapuna, no maipapan iti pormal a pammilin iti kongregasion, napaltiingan ni Pablo nga agsurat: “Ti babai agsursuro koma a sitatalna a buyogen ti amin a kinaannugot. Ta diak ipalubos a ti babai isurona wenno adda turayna iti lalaki, no di ket agulimek koma.”—1 Timoteo 2:11, 12, NEB.
Nupay kasta, di koma pakaupayan daytoy dagiti Kristiano a babbai, gapu ta siwayawayada a mangisuro iti ministerio iti publiko kas ti inaramid dagiti babbai a kas kada Loida, Eunice, Evodias, ken Sintique idi umuna a tiempo dagiti Kristiano.—Filipos 4:2, 3; 2 Timoteo 1:5.