Piesta No Kalam-ekna Idiay Sapporo

Babaen ti koresponsal ti Agriingkayo! idiay Japan

KABAYATAN ti napaut a bulbulan ti kalam-ekna, agtalinaed a nayelo ti Sapporo, maysa a siudad iti amianan ti Japan. Iti lima aginggat’ innem a bulan iti kada tawen, bassit laeng idi ti gundaway dagiti umili nga agpalpaliwa agingga a ti konseho ti siudad nagsasaritaanda ti kasasaad ket nakapanunotda iti solusion: piesta no kalam-ekna a pakaipabuyaan dagiti dadakkel nga estatua a naaramid manipud yelo.

Idi 1950, nagtitinnulong dagiti estudiante iti high school a nangbangon iti innem nga estatua, a 3 aginggat’4 a metro ti katayagda. Ag-50,000 a tattao ti immay nangbuya iti “Venus de Milo” ken dadduma pay nga estatua. Nagsayaat idi ti pannakairugi ti Yuki Matsuri, wenno Piesta No Kalam-ekna.

Bayat ti panaglabas dagiti tawen, simmaknap ken nagdinamag ti piesta. Iti kada tawen itan, agdua milion a turista, agraman adu a naggapu iti ballasiw taaw ti sisisiddaaw nga umay mangbuya kadagiti ginasut nga estatua a naaramid manipud yelo ken niebe. Daytoy a pito-aldaw a naisalsalumina a piesta nga awan pakainaiganna iti relihion ti nagbalinen a kadakkelan kadagiti amin a kasta a piesta idiay Japan.

Panagpasiar Kabayatan ti Piesta

Iti tallo a pakaangayan dagiti piesta, idiay Ōdori Park ti kangrunaan. Daytoy a dati a pakaigabsuonan dagiti niebe a makolekta kadagiti kalsada ti siudad sakupenna ti 11 a bloke ti siudad agingga iti katengngaan ti Sapporo. Ditoy ken ti asideg laeng a kabangibangna a Makomanai, ti pakakitaan kadagiti nagpintasan a dadakkel nga estatua. Masmasdaaw dagiti ubbing kadagiti daddadakkel ngem tao a kaladladawan dagiti karakter a mabuybuyada kadagiti paboritoda a programa ti telebision ken komiks. Adda ti superman a ni Ultraman a kayat a tuladen dagiti babbarito. Ket iti asideg isu ni Chibi Maruko-chan ken dagiti gagayyemna, a naitampok iti maysa a nalatak a cartoon iti telebision.

Masdaaw met uray dagiti nataengan. Talaga a makaawis ti naisalsaluminat’ pannakaaramidna a Paris Opera House, a kompleto kadagiti diding a siaannad a naukitan ken uray dagiti estatua dagiti musiko iti atepna. Adda ti German Diet House, maysa nga estilo baroque a patakder a naaramid iti niebe. Nalaka a mailasin ti nagdakkelan nga Arabian Castle a mangitampok ken Aladdin ken ti ‘magic a silawna.’

Babbabassit ngem kadagiti daddadakkel nga estatua ken patakder isu dagiti adda idiay Citizen’s Square, a kaaduan adda espesial a mensaheda. Maysa nga ukit ti Brandenburg Gate ti agserbi kas maysa a palagip ti nabiit pay a panagkaykaysa ti Alemania. Dadduma kadagiti ukit iyanninawda ti pannakaseknan iti daga, iti ekolohiana, ken dagiti ayup.

Idiay pungto ti Ōdori Park, makitatayo ti International Square a sadiay ti yan dagiti agsasalisal a timpuyog manipud nadumaduma a pagilian. Propesional ti dadduma a managukit a kadawyan a marmol, bato, ken dadduma a materiales ti us-usarenda. Tunggal maysa kadakuada ti naikkan iti 3 metro kubiko a niebe ken tallo aldaw a plaso a mangiringpas kadagiti isalipda.

Ngem kasanoda a naaramid dagiti dadakkel nga iskultura, ken kasano a dagitat’ natulad a naimbag dagiti iskultor?

No Kasano nga Aramiden Dagiti Naukit a Niebe

Narigat ti panangaramid iti kasta kadakkelna a proyekto. Iti maysa laeng a proyekto, ti aktual a panagbangon gistay abutenna ti makabulan, a saklawenna ti 1,500 nga al-aldaw ti panagtrabaho ti maysa a tao. Ti maysa a dakkel a pagserkan ket kaasping ti Flinders Street Station idiay Melbourne, Australia. Ag-35 metro ti kaatiddogna, 35 metro ti kaakabana, ken 15 metro ti kangatona. Kalikagumanna ti 1,400 a saglilima toneladat’ malaonna a trak a mangguyod iti 7,000 a tonelada ti niebe a nausar iti dayta. Isu met la gayam a nanipud 1955 ti kadakkel ti trabaho a mangaramid kadagiti dadakkel nga iskultura ket naipabiang iti militaria ti Japan, a tinulongan idi agangay dagiti masansanay a bombero. Kitaentayo no kasanoda a naibangon dagita a dadakkel a gapuanan ti arte manipud niebe.

Umuna, masapul a mapili ti matarigagayan a mabangon. Maurnong dagiti impormasion ken ladawan. Maibasar kadagitoy, maaramid dagiti modelo manipud iti pitak, papier-mâché, wenno dadduma pay a materiales. Kalpasanna, agarup makabulan sakbay ti piesta, maurnong ti nadalus a niebe ken maibiahe iti lugar a pakaibangonanna. Idiay a maidiskarga, masedsed a naimbag iti nagdakkelan a pagsukogan ken mapatangken babaen iti danum. Sumaganad maikkat ti nakasukoganna, mabangon ti andamio, sa mairugin ti napasnek a panagukit.

Dagiti managukit a masansan nga agtrabaho uray rabiin nupay makaketter ti temperatura, mangusarda kadagiti wasay ken pala iti damo sadanto mangusar kadagiti babbabassit nga alikamen a pagukit bayat a mairingringpas.

Mabalin met a makiraman dagiti indibidual ken babassit a grupo iti dayta a nakaay-ayat a trabaho. Maikkan ti agarup kakatlo kadagiti ginasut nga aplikante manipud ti intero a pagilian a napili babaen ti maysa a tambiolo kadagiti pagannurotan manipud ti maysa nga espesial a timpuyog dagiti eksperto. Maikkan ti tunggal aplikante iti 2 metro kubiko a timmangken a niebe ken lima nga aldaw a mangiringpas iti proyektona.

Dagiti Nakaay-ayat a Buya

Dagiti naukit manipud iti bin-ig a yelo ti sabali pay a napintas a paset ti piesta. Kaaduan kadagitoy ket inaramid dagiti iskultor a kameng ti Ice Carvers Union. Kaaduan ket kusinero manipud kadagiti agdindinamag a hotel a masansan a mangipabuya iti sagudayda kadagiti banquet rooms. Magagaranda a mapan idiay Sapporo, ket nakaay-ayat dagiti proyektoda.

Lallalo pay ti kinaragsak gapu kadagiti musikal a panagpabuya. Adda panagsasalip, agmartmartsa a banda, panagsasala, acrobatic ski jumping, ken dadduma pay. Maay-ayatan met dagiti ubbing gapu kadagiti naisaganan a nayelo a paguyasanda ken naaramid kadagiti mismo a naukit a proyekto.

Nasaysayaat a buyaen ti piesta no rabii. Dagiti nagadu a babassit a bombilia a naintar a naibitin kadagiti awanan bulong a sangsanga dagiti kayo iti parke, agraman dagiti nadumadumat’ kolorda a silaw nga agrimatrimat kadagiti nasileng nga estatua ti mangparnuay iti makaallukoy a buya ti lawag ken kolor iti nakaay-ayat a lugar bayat ti kalam-ekna. Kalpasan a mabuyayo ti piesta, di masaba la ketdit’ panangapresiaryo iti magapuanan ti inted-Dios a kinasaririt ti panunot ken kinasigo dagiti im-ima.

[Dagiti ladawan iti panid 23]

Dagiti nagdadakkelan a naaramid yelo nga iskultura a kas ti adda iti baba ket mabalin a 35 metrot’ kaakabada ken 15 metrot’ kangatoda, nga agkasapulan iti ag-7,000 a tonelada ti niebe tapno mabangonda