Naragragsak Kadi ti Pamilia No Awan ti TV?
IDI Pebrero daytoy a tawen, nangiparang ti The Wall Street Journal ti artikulo nga: “Awan Telebision: Rumang-ay ti Dadduma a Pamilia nga Awan TV.” Impadamag ti pagiwarnak: “Para iti bassit laeng a bilang dagiti pamilia nga Americano a nangisardengen a naan-anay ti panagbuya, agpatpatuloy ti biag kalpasan a naisardengen ti telebision—ket naragragsakda.”
Ti epekto ti telebision iti pamilia ket napagsasaritaan met itay nabiit idiay maysa a panagtitipon a mangrambak iti maika-40 nga anibersario ti umuna [a tao] a nakataray iti maysa a milia iti kurang nga uppat a minuto a ni Roger Bannister. Sigun ken Jim Ryun, kampeon a managtaray iti maysa a milia idi 1960’s, rimsua ti tema bayat iti pangmalem a kadua ni Roger sakbay ti Olimpiada idi 1968.
“Ti asawak, ni Anne, ken siak naitulagkamin nga agkasar iti daydi a tiempo,” inlawlawag ni Ryun, “gapuna imbaga ni Roger kadakami a nasarakanna ti maysa a banag a pudno a nangparang-ay iti kasasaad ti pamiliana. Siempre, dimngegkami a sigagagar. Kinunana a ti inaramidna ket inruarna ti telebision iti balay, tapno maikkanna ida iti ad-adu a tiempo nga agkakadua kas maysa a pamilia, agsasarita, agbasa a sangsangkamaysa.”
Insalaysay ni Ryun: “Adda dakkel nga epekto ti imbagana kadakami. Nangrugin a nabigbigmi, ‘Saanmi met a talaga a kasapulan ti TV.’”
Adu a tattao ti nakagteng iti kasta met laeng a konklusion. Apay? Gapu iti makaawis nga epekto ti TV, nangnangruna kadagiti agtutubo. Sigun iti maysa nga ina idiay Maryland, E.U.A., no agpaspasuso iti anakna a babai iti sanguanan ti TV, “kellaat nga italiaw [ti ubing] ti ulona ket mingminganna ti iskrin. Pinanunotmi a no ar-aramidenna dayta iti dayta nga edadna, anianto ti aramidenna inton tumataengan pay?” Isut’ gapuna nga inikkat ti pamilia ti TV-da.
No dikay ikkaten nga interamente ti TV, saan kadi a nasayaat ti panangkontrol? Ni Karen Stevenson, ti umuna a nangisit a babai a nakaawat iti Rhodes Scholarship agpaay iti panagadal idiay Oxford University idiay Inglaterra, kinunana maipapan iti panagbiagna idi ubing pay: “Saan a maipalubos ti telebision bayat ti lawas. No adda [idi] banag a naisangsangayan a kayatmi a buyaen . . . , masapul a makisaritakami ken [nanang] maipapan iti dayta iti Domingo sakbay ti plano a panangbuya iti dayta.”
Ti ngay panagbuya ti TV iti pamiliayo? Makitayo kadi ti pateg ti pananglimitar iti dayta, wenno uray ikkaten pay laeng dayta, iti sumagmamano a tiempo?