Pakasaritaaan ti Biag
Ababa a Surat a Nangbalbaliw iti Biagko
KAS INSALAYSAY NI IRENE HOCHSTENBACH
Rabii idi ti Martes, 1972. Agtawenak idi iti 16. Intugotdak dagiti nagannakko iti maysa a narelihiosuan a gimong idiay Eindhoven, maysa a siudad iti probinsia ti Brabant, idiay Netherlands. Alusiisenak, kayatko ti mapan iti maysa a lugar. Kalpasanna, adda dua nga agkabannuag a babbai a nangted kaniak iti ababa a surat nga agkunkuna: “Patgenmi nga Irene, kayatdaka a tulongan.” Diak ammo a dayta a surat ti mangbalbaliw iti biagko. Ngem sakbay nga isalaysayko no ania ti simmaganad a napasamak, ipalubosyo nga estoriaek ti nalikudak.
NAIPASNGAYAK iti isla ti Belitung, idiay Indonesia. Malagipko pay ti dadduma nga uni iti dayta a tropikal nga isla—ti karasakas ti kaykayo a palma no agangin, ti ayus ti karayan iti asideg, ti katawa dagiti ubbing nga agay-ayam iti aglikmut ti balaymi, kasta met ti uni ti musika iti pagtaenganmi. Idi 1960, idi agtawenak iti uppat, immakar ti pamiliami idiay Netherlands manipud Indonesia. Nagdaliasatkami iti naunday babaen ti barko, ket nangruna a malagipko ti uni ti intugotko a paboritok nga ay-ayam—maysa a bassit a bulbullagaw nga addaan kadagiti tambor. Idi agtawenak iti pito, nagbalinak a tuleng gapu iti sakit. Sipud idin, saanakon a nakangngeg iti aniaman nga uni. Aginggaak laengen iti pananglagip kadagita.
Dimmakkel a Tuleng
Gapu iti naayat a panangaywan dagiti nagannakko, diak narikna a dagus dagiti rigat ti agbalin a tuleng. Kas maysa nga ubing, impagarupko a maysa nga ay-ayam ti us-usarek a dakkel a hearing aid, nupay bassit ti maitulongna kaniak. Tapno makasaritadak dagiti kaarrubami nga ubbing, isuratda iti igid ti kalsada ti intero nga estoriada babaen ti tisa, ket sungbatak ida, nupay diak mangngeg ti ibagbagak.
Bayat ti panagdakkelko, nabigbigko a naidumaak iti sabsabali. Madlawkon nga adda dagiti tattao a pagang-angawanda ti kinatulengko, ken di kayat ti dadduma ti makilangen kaniak. Nangrugi a mariknak ti pannakaiputong ken ladingit. Nangrugi a mariknak ti rigat ti panagbalin a tuleng, ket bayat a dumakdakkelak, ad-addan a kaamakko dagiti tattao a makangngeg.
Tapno makastrekak iti espesial nga eskuelaan para kadagiti tuleng, inyakar dagiti nagannakko ti intero a pamiliami iti siudad ti Eindhoven manipud iti maysa a purok iti probinsia ti Limburg. Sadiay, nagsapul ni Tatang iti trabaho ken immakar ti adingko a lalaki ken dagiti manangko iti sabali nga eskuelaan. Agyamyamanak kadagiti amin nga inaramidda a panagbalbaliw maigapu kaniak. Iti eskuelaan, insurodak a mangtimbeng iti pigsa ti timekko ken agbalikas iti nalawlawag. Ken nupay saan nga agusar dagiti mannursuro iti sign language, insuro dayta dagiti kaeskuelak.
Panagbiag a Tuleng
Bayat ti panagdakkelko, inkarigatan dagiti nagannakko ti makisarita kaniak, ngem adu ti diak matarusan. Kas pagarigan, diak matarusan a dagiti nagannakko makipagad-adalda iti Biblia kadagiti Saksi ni Jehova. Ngem malagipko a maysa nga aldaw, binisita ti pamiliami ti maysa a lugar a sadiay nagadu a tao ti nakatugaw. Kumitkitada amin iti sango, no dadduma agpalakpakda, ken adda kanito a tumakderda—ngem diak ammo no apay nga ar-aramidenda dagita. Nabayag pay sakbay a naammuak a kombension dagiti Saksi ni Jehova ti napananmi. Itugotdak met dagiti nagannakko iti bassit a pasdek iti siudad ti Eindhoven. Magustuak sadiay agsipud ta naasida amin ken makitak a naragsak ti pamiliami, ngem diak ammo no apay a kanayonkami a mapan sadiay. Idi agangay, naammuak a ti bassit a pasdek ket maysa a Kingdom Hall dagiti Saksi ni Jehova.
Isuna laeng ta awan kadagiti nakigimong ti mangipakaawat iti programa kaniak babaen ti senias. Ita, naammuak a dagiti presente tinarigagayandak a tulongan ngem saanda nga ammo no kasano ti tumulong iti maysa a tuleng. Kadagitoy a gimong, nariknak a naiputputongak isu a napanunotko, ‘Kayatko nga addaak iti eskuelaan imbes a ditoy.’ Ngem idi mapampanunotko dagitoy, dua nga agkabannuag a babbai ti sidadaras a nagaramid iti ababa a surat ket inyawatda kaniak. Dayta ti surat a dinakamatko itay. Saanko nga ammo a dayta a surat ti pangrugian ti nasayaat a panaggagayyem a namagpatingga iti panagmaymaysak.
Pannakaadda ti Nasayaat a Panaggagayyem
Agtawen iti nasurok la a 20 da Colette ken Hermine, dagiti nangted kaniak iti surat. Naammuak a nakitimpuyogda iti tabtabunuak a kongregasion dagiti Saksi ni Jehova tapno agserbida kas regular pioneer, wenno amin-tiempo a ministro. Nupay saan nga ammo da Colette ken Hermine ti agsenias, basaek ti panaggaraw dagiti bibigda, ket nasayaat ti panagsasaritami iti kasta a pamay-an.
Naragsakan dagiti nagannakko idi kiniddaw da Colette ken Hermine nga iyadalandak iti Biblia, ngem saan laeng a dayta ti inaramid dagitoy agkabannuag a babbai. Pinagreggetanda nga impakaawat kaniak babaen ti senias dagiti maipalpalawag kadagiti gimong iti Kingdom Hall ken inramandak iti panaglalangen iti kongregasion. Kaduadak no ensayuenda dagiti presentasionda iti Biblia a mausar iti panangasaba, ken tinulongandak met a mangisagana kadagiti paset ti estudiante iti Teokratiko nga Eskuelaan ti Panagministro. Agasenyo, naturedak pay itan nga agsao iti sango ti grupo dagiti makangngeg a tattao!
Kanayonanna, imparikna da Colette ken Hermine a mabalinko ti agtalek kadakuada. Naanus ken dumngegda kaniak. Nupay masansan nga agkatawakami no agkamaliak, didak pulos pinagang-angawan; dida met pulos imbain ti pannakikaduak kadakuada. Inkagumaanda a tarusan ti riknak ken patas ti panangtratoda kaniak. Impaayandak dagitoy a babbai iti nagsayaat a sagut—ti ayat ken pannakigayyemda.
Kangrunaan iti amin, insuro da Colette ken Hermine a masapul a maam-ammok ti Diostayo, ni Jehova, kas maysa a mapagtalkan a gayyem. Inlawlawagda a maragsakan ni Jehova iti pannakigimongko iti Kingdom Hall ken maawatanna dagiti pakarigatan ti maysa a tuleng. Anian a yamanko a naggagayyemkami a tallo gapu iti panagayatmi ken ni Jehova! Natignayak iti pannakaseknan kaniak ni Jehova, ket gapu iti panagayatko kenkuana, insimbolok ti dedikasionko kenkuana babaen ti bautismo iti danum idi Hulio 1975.
Pannakiasmang iti Naisangsangayan a Gayyem
Immadu dagiti naam-ammok a Kristiano a kakabsat bayat dagiti naglabas a tawtawen. Maysa a kabsat ti nagbalin a naisangsangayan unay a gayyemko, ket nagkasarkami idi 1980. Di nagbayag, nangrugiak nga agserbi kas payunir. Idi 1994, naibaonkami ken lakayko, ni Harry, nga agserbi kas special pioneer iti tay-ak ti Dutch Sign Language. Iti simmaganad a tawen, naipasangoak iti makakarit nga annongen. Kaduaak ti makangngeg a lakayko bayat a bisitaenna dagiti nadumaduma a kongregasion kas suno ti manangaywan iti sirkito.
Kastoy ti pamuspusak. No damomi ti bumisita iti maysa a kongregasion, iyam-ammok a dagus ti bagik kadagiti kakabsat. Ibagak kadakuada a maysaak a tuleng ken kiddawek a kumitada kaniak bayat a siiinayad a makisaritada. Inkagumaak met ti sumungbat a dagus kadagiti gimong ti kongregasion. Damagek met no adda ti situtulok a mangipakaawat kaniak babaen ti senias dagiti mapagsasaritaan bayat dagiti gimong ken panangasaba iti dayta a lawas.
Nakatulong unay kaniak daytoy a pamay-an nga uray la adda dagiti gundaway a malipatan dagiti kakabsatko a maysaak a tuleng, nga agresulta iti panagkakatawami. Kas pagarigan, ibagada a binosenaandak kas pangkablaaw idi makitadak a magmagna iti ili, ngem siempre, saanko a nangngeg. Malipatak met no dadduma dagiti limitasionko, kas idi inyarasaasko iti lapayag ni lakayko ti maysa a kompidensial a banag. Idi makitak a limmabbasit, ammok lattan a napigsa unay ti “arasaasko.”
Timmulong dagiti ubbing kadagiti di ninamnama a pamay-an. Iti maysa a kongregasion a damomi a binisita, nadlaw ti maysa nga agtawen iti siam nga ubing a lalaki a bumdeng a makisarita kaniak dagiti dadduma nga adda iti Kingdom Hall, ket adda napanunotna nga aramiden. Immasideg kaniak, kinibinnak, sanak inturong iti tengnga ti Kingdom Hall, sana inriaw, “Iyam-ammok man kadakayo ni Irene—maysa a tuleng!” Gapuna, immay kaniak dagiti nakangngeg ket inyam-ammoda ti bagbagida.
Immadu dagiti gagayyemko bayat a kinaduaak ni lakayko iti panagbisitana iti sirkito. Anian a naiduma unay ti biagko ita no idilig kadagiti tawtawen a naipaspasuliak ken naiputputong! Uray sipud iti daydi kanito nga inyawat kaniak da Colette ken Hermine ti ababa a surat, nariknak ti nabara a panaggagayyem ken naam-ammok dagiti tattao a nagbalin a naisangsangayan unay kaniak. Kangrunaan iti amin, naam-ammok ni Jehova, ti kapatgan a Gayyem. (Roma 8:38, 39) Anian ti panangbalbaliw dayta nga ababa a surat iti biagko!
[Ladawan iti panid 24]
Malagipko ti uni ti paboritok nga ay-ayam
[Ladawan iti panid 25]
Iti ministerio ken dakami ken ni Harry a lakayko