Aldaw ti Panagturpos​—Makaay-ayo nga Aldaw

“NABENDISIONANTAYO iti makaay-ayo nga aldaw. Naraniag ti init. Asul ti langit. Berde ti karuotan. Agkankanta dagiti tumatayab. Nakasaysayaat ti kasasaad ita nga aldaw, ket sigurado nga agmalmalem a kasta. Ni Jehova ket saan a Dios ti pannakapaay. Isu ket manangbendision a Dios.”

Babaen dagita a kapaliiwan ni Kabsat Samuel Herd, kameng ti Bagi a Manarawidwid dagiti Saksi ni Jehova, nangrugi ti programa ti panagturpos para iti maika-117 a klase ti Watchtower Bible School of Gilead. Naangay dayta idi Setiembre 11, 2004. Iti dayta a nagsayaat a programa, adda makapabileg a balakad a naibatay iti Biblia, kasta met dagiti kapadasan dagiti estudiante ken dagiti aduan kapadasan a misionero. Wen, makaay-ayo dayta nga aldaw para iti amin a 6,974 a timmabuno iti Watchtower Educational Center idiay Patterson, New York, ken kadagiti patakder idiay Brooklyn ken Wallkill a nakaipabuyaanna babaen ti audio ken video.

Pammaregta Kadagiti Estudiante

Ni John Kikot, a kameng ti United States Branch Committee nangipaay iti makapabileg a palawag maibatay iti tema a “Taginayonen ti Rag-o kas Misionero.” Impaganetgetna nga agdinamag dagiti estudiante ti Gilead gapu iti rag-oda, kas makita iti dayta a panagturpos. Makaparag-o kadagiti estudiante dagiti instruksion manipud iti Kasuratan a naadalda kabayatan ti klase, ket nakabalanda itan a tumulong iti sabsabali a maaddaan iti kasta a rag-o. Kasano? Babaen ti panangipamaysada iti ministerioda kas misionero. Kinuna ni Jesus: “Ad-adu ti kinaragsak iti panangted ngem iti panangawat.” (Aramid 20:35) Mataginayon dagiti baro a misionero ti rag-oda no tuladenda ni Jehova a Dios, ti naparabur a “naragsak a Dios,” a mangipakpakaammo iti kinapudno iti sabsabali.​—1 Timoteo 1:11.

Simmaganad iti programa ti sabali pay a miembro ti Bagi a Manarawidwid, ni David Splane, a nangipalawag iti tema a “Kasanokayo a Makibagay?” Awan duadua a naimbag ken makaay-ayo ti makipagnaed a sangsangkatunos, nupay kalikaguman daytoy ti panagbalin nga “amin a bambanag iti amin a kita ti tattao.” (1 Corinto 9:22; Salmo 133:1) Dinakamat ni Kabsat Splane a makalangen dagiti agturpos nga estudiante ti dadduma pay a tattao bayat ti panagmisioneroda​—tattao iti teritoria, padada a misionero, kakabsat iti baro a kongregasionda, ken dagidiay agserserbi iti sanga nga opisina a mangimatmaton iti trabaho a panangasaba ken panangisuro. Nangipaay ti ispiker kadagiti praktikal a singasing no kasano ti posible a kasayaatan a pannakilangen: Panangadal iti lokal a lenguahe, panangikabilangan kadagiti lokal a kostumbre, panangraem iti pribado a biag dagiti pada a misionero, ken panagtulnog kadagiti mangiturturong.​—Hebreo 13:17.

Kalpasanna, inyimtuod ti instruktor ti Gilead a ni Lawrence Bowen, “Ania ti Panangmatmatyo?” Impalagipna kadagiti estudiante a dagidiay ‘nangukom iti makinruar a langa’ saanda nga inawat ni Jesus kas ti Mesias. (Juan 7:24) Kas imperpekto a tattao, kasapulantay amin ti agannad maibusor iti ‘panangpanunot iti pampanunot ti tattao’ imbes nga iti “pampanunot ti Dios.” (Mateo 16:22, 23) Uray dagiti tattao a naregta iti naespirituan masapul nga agtultuloy nga aturenda ti pampanunotda. Kas iti barko iti baybay, dagiti panagbalbaliw ita mabalin nga agbanag iti pannakaragpat ti kalat wenno naespirituan a pannakarba. Ti agtultuloy a panangadal iti Biblia sigun iti kontekstona tulongannatayo nga agpanunot sigun iti “pampanunot ti Dios.”

Ni Wallace Liverance, sabali pay nga instruktor iti Gilead School, ti naudi a nagpalawag iti daytoy a paset ti programa. Naibatay iti Isaias 55:1 ti temana nga “Ania ti Gatangem?” Imparegtana kadagiti estudiante a “gatangenda” ti bang-ar, rag-o, ken pannaranay nga ipaay ti naimpadtuan a mensahe ti Dios para iti kaaldawantayo. Iti padto ni Isaias, daytoy a sao ti Dios ket nayarig iti danum, arak, ken gatas. Kasano a magatang dagitoy nga “awan ti kuarta ken awan ti gatad”? Inlawlawag ni Kabsat Liverance a maaramid dayta babaen ti panangipaay iti atension kadagiti padto ti Biblia ken panangisukat kadagiti di naespirituan a pampanunot ken daldalan iti pampanunot ken daldalan ti Dios. (Isaias 55:2, 3, 6, 7) No aramiden dayta dagiti baro a misionero, makapagtultuloyda kadagiti pakaibaonanda a pagilian. Dagiti imperpekto a tattao masansan a panunotenda a ti kinaragsak agpannuray iti panangikagumaanda a maaddaan iti material a kinanam-ay. “Saanyo a gatangen dayta,” indagadag ti ispiker. “Saan a dayta a panagpampanunot ti gatangenyo. Siguraduenyo ti mangilatang iti panawen para iti naan-anay a panagadal iti naimpadtuan a Sao ti Dios. Dayta ti makaited kadakayo iti bang-ar, bileg, ken rag-o iti pakaibaonanyo kas misionero.”

Dagiti Makaparagsak a Kapadasan Dagiti Estudiante ken Interbiu

Regular a nakipaset dagiti estudiante iti panangasaba. Iti paset ti sabali pay nga instruktor ti Gilead a ni Mark Noumair, dadduma kadagiti estudiante ti nangyakto kadagiti kapadasan a nangitampok iti tema a “Saan nga Ibain ti Naimbag a Damag.” (Roma 1:16) Dagiti timmabuno tinagiragsakda nga inimutektekan dagitoy a nataengan a ministro, no kasano a nangasabada iti binalaybalay, iti lansangan, ken kadagiti pagtagilakuan. Dagiti estudiante a makaammo kadagiti sabali a lenguahe dinanonda dagiti tattao a mangus-usar kadagita a pagsasao iti teritoria ti kongregasionda. Ti dadduma epektibo nga inusarda dagiti naibatay iti Biblia a publikasion nga impablaak dagiti Saksi ni Jehova, nga inaramatda dagita kadagiti panagsarungkar ken panangirugi iti panagadal iti Biblia. ‘Dida nagbain’ a nangikasaba iti naimbag a damag.

Ni Kabsat William Nonkes iti Service Department ininterbiuna dagiti aduan kapadasan a misionero manipud Burkina Faso, Latvia, ken Russia. Nangipaayda iti praktikal a balakad a naisentro iti tema a “Siaayat a Gunggonaan ni Jehova Dagiti Matalek.” Ti maysa kadagiti napagsaludsodan a kabsat pinaregtana dagiti estudiante a laglagipenda ti buyot ni Gideon a 300 a soldado. Tunggal soldado ket addaan iti annongen a nakatulong iti balligi ti pannakigubat ni Gideon. (Uk-ukom 7:19-21) Umasping iti dayta, magunggonaan dagiti misionero a mangitultuloy kadagiti annongenda.

Ti tema nga “Agbalin nga Amin a Bambanag iti Amin a Kita ti Tattao” ti naitampok iti simmaruno nga interbiu nga indauluan ni Samuel Roberson, maysa nga instruktor iti Patterson. Ininterbiuna ti uppat a miembro ti Branch Committee, manipud Senegal, Guam, Liberia, ken Madagascar. Agdagup iti 170 a misionero ti agserserbi kadagitoy a pagilian. Dagiti nagturpos nga estudiante naammuanda manipud kadagiti komento no kasano a dagiti Branch Committee tultulonganda dagiti kabbaro a misionero a mairuam kadagiti teritoriada. Masansan a kalikagumanna ti panangammo kadagiti kostumbre a naiduma iti Lumaud. Kas pagarigan, gagangay iti dadduma a pagilian ti pannakakita iti lallaki, agraman dagidiay kameng ti kongregasion Kristiano, nga agkibin kas aggayyem. Iti dadduma a lugar a sakup ti sanga nga opisina ti Guam, maidasar dagiti karkarna a taraon. Ngem nairuam dagiti dadduma, ket maaramidan met dayta dagiti baro a misionero.

Ni Guy Pierce, miembro ti Bagi a Manarawidwid, pinutarna ti palawag a napauluan “Agtalinaed a Nasungdo iti ‘Pagarian ni Apotayo.’” Impalagipna kadagiti agdengdengngeg: “Adda panggep ni Jehova no apay a nangparsua. Adda pampanunotenna agpaay iti sangaparsuaanna. Saan a nagbaliw ti panggepna iti daga. Agturturong dayta iti naan-anay a pannakatungpalna. Awan ti makabael a mangkeltay iti dayta.” (Genesis 1:28) Ni Kabsat Pierce pinaregtana ti amin nga agpasakup a sisusungdo iti soberania ti Dios iti laksid dagiti pakarigatan a rimsua gapu iti basol ti umuna a tao, ni Adan. “Agbibiagtayon iti oras ti panangukom. Ababan ti tiempo a nabatbati a mangbirok kadagiti nasingpet ti panagpuspusoda a tattao tapno matulonganda a mangammo iti kinapudno. Siiepektibo nga usarenyo ti tiempo a mangidanon iti naimbag a damag ti Pagarian,” indagadag ni Kabsat Pierce. Dagidiay sisusungdo a mangsupsuporta iti Pagarian ti Dios manamnamada ti pannaranayna.​—Salmo 18:25.

Iti pangserra a paset, binasa ti tserman dagiti kablaaw ken pammaregta dagiti sanga nga opisina iti sangalubongan. Kalpasanna, inyawatna dagiti diploma kadagiti nagturpos nga estudiante, sa maysa kadagiti nagturpos ti nangbasa iti surat ti klase, a mangyeb-ebkas iti naimpusuan a panagyaman gapu iti pannakasanay nga inawatda. Maitutop unay dayta a kas pangserra iti dayta a nakasaysayaat nga aldaw a dinto malipatan dagiti timmabuno.

[Kahon iti panid 23]

ESTADISTIKA TI KLASE

Bilang dagiti pagilian a nairepresentar: 11

Bilang dagiti pagilian a pakaibaonanda: 22

Bilang dagiti estudiante: 48

Promedio nga edad: 34.8

Promedio a tawen iti kinapudno: 18:3

Promedio a tawen iti amin-tiempo a ministerio: 13.4

[Ladawan iti panid 24]

Ti Maika-117 a Nagturpos a Klase ti Watchtower Bible School of Gilead

Iti listaan ditoy baba, nanumeruan dagiti intar manipud sango nga agpalikud, ken nailista dagiti nagan manipud kannigid nga agpakannawan iti kada intar.

(1) Thompson, E.; Norvell, G.; Powell, T.; Kozza, M.; McIntyre, T. (2) Reilly, A.; Clayton, C.; Allan, J.; Blanco, A.; Muñoz, L.; Rustad, N. (3) Guerrero, Z.; Garcia, K.; McKerlie, D.; Ishikawa, T.; Blanco, G. (4) McIntyre, S.; Cruz, E.; Guerrero, J.; Ritchie, O.; Avellaneda, L.; Garcia, R. (5) Powell, G.; Fiskå, H.; Muñoz, V.; Baumann, D.; Shaw, S.; Brown, K.; Brown, L. (6) Shaw, C.; Reilly, A.; Peloquin, C.; Münch, N.; McKerlie, D.; Ishikawa, K. (7) Münch, M.; Peloquin, J.; Kozza, T.; Avellaneda, M.; Allan, K.; Ritchie, E.; Norvell, T. (8) Cruz, J.; Baumann, H.; Clayton, Z.; Fiskå, E.; Thompson, M.; Rustad, J.