Dua a “Milagro” iti Maysa a Kombension Idiay Georgia

ITI maysa a nakallalagip nga okasion idi 2006 iti pagilian ti Georgia, adda dua a “milagro” a napasamak. Naangay iti innem a lugar iti intero a pagilian ti tallo nga aldaw nga “Asidegen ti Pannakaisalakan!” a Kombension Distrito dagiti Saksi ni Jehova idi Hulio 7 agingga iti 9. Maysa dayta a naespirituan a padaya a tinagiragsak ti nasurok a 17,000 a timmabuno.

Idi Enero 2006, inkagumaanda ti nagsapul iti maitutop a pagtataripnongan ti rinibu a kombensionista iti siudad ti Tbilisi, ti kabesera ti Georgia. Maikonektar iti dayta ti dadduma a pagkombensionan babaen ti telepono.

In-inut a dumakdakkel ti wayawaya ti panagdayaw idiay Georgia kadagiti naglabas a sumagmamano a tawen. Nupay nakaro ti ibubusor, intultuloy latta dagiti Saksi ti nagbirok, a mangnamnamada a makakitada iti pagkombensionan iti kabesera. Gagangay a mannakigayyem ken managpadagus dagiti taga-Georgia. Ngem adda dagiti opisial a nakaro ti panangidumdumada iti relihion. Alimonendanto ngata ti kinatangsitda ket palubosanda dagiti Saksi a mangabang iti pasilidadda?

Dagiti kakabsat a kameng ti Komite ti Kombension sinurbeyda ti nagduduma nga istadium ken dadakkel a pasilio a pagay-ayaman. Inkari dagiti mangimatmaton nga ipausarda dagiti pasilidadda ngem awan ti maibagada a masinunuo a petsa no kaanoda a mabalin nga ipaabang. Ngarud, nasdaaw ti komite idi immanamong ti administrasion ti Tbilisi Philharmonic nga ipaabang ti pasilidadda kadagiti Saksi ni Jehova. Masarakan ti pagkonsiertuan iti tengnga ti siudad, a pakaang-angayan ti adu kadagiti kalalatakan nga okasion.

Gapu ta naparegtada iti nasayaat a resulta ti panangikagumaanda, inrugin ti komite nga inorganisar ti kombension iti Tbilisi, agraman dagiti kombension kadagiti ili ken siudad iti intero a pagilian, a pakairamanan ti Tsnori, Kutaisi, Zugdidi, Kaspi, ken Gori. Natrabaho ti panangikonektar kadagiti telepono kadagitoy a pagkombensionan tapno aggigiddan a mangngegan ti programa. Naisaganan ti amin para iti kombension. Ngem maysa laengen a lawas sakbay ti kombension, di ninamnama a kinanselar ti administrasion ti Tbilisi Philharmonic ti kontrata. Awan man la ti intedda a rason.

Ti Umuna a “Milagro”

Ania ngaruden ti aramiden dagiti kakabsat? Ti laeng mabalin nga aramidenda ket agsubli iti Marnueli, maysa a kataltalonan nga 40 kilometro iti ruar ti Tbilisi. Adu idin a kombension ti naangay iti dayta a daga a kukua ti maysa a pamilia a Saksi ni Jehova. Maysa dayta idi a naglawa a pagmulaan. Kadagiti naglabas a sangapulo a tawen, dayta laeng ti lugar a pagkombensionan dagiti kongregasion iti Tbilisi. Ngem ti Marnueli met ti nakapasamakan dagiti nakaro a panangraut kadagiti Saksi ni Jehova.

Napasamak ti maysa kadagitoy a panangraut idi Setiembre 16, 2000. Dagiti polis iti siudad ti Marnueli binangenanda ti kalsada tapno saan a makagteng dagiti Saksi iti pagkombensionan. Kalpasanna, simmangpet dagiti bus a napno iti naranggas a tattao nga indauluan ni Vasili Mkalavishvili, maysa a naikkat a padi iti Orthodox. Pinasardengda dagiti lugan nga agturong iti pagkombensionan iti Marnueli, inulod ken awanan asi a kinabkabilda ti dadduma a pasahero, bayat a rinabsutda ti sanikua ti dadduma, agraman dagiti Biblia ken literaturada a naibatay iti Biblia.

Agarup 60 a managderraaw ti nangraut met iti pagkombensionan idiay Marnueli. Dandani 40 a Saksi ti nadangran. Nabagkong ti barukong ti maysa a kabsat. Dadduma kadagiti managderraaw ti nangpanalbuong kadagiti paltogda a nakapaturong iti tangatang. Maysa kadakuada ti nangipaturong iti paltogna iti makinkukua iti daga tapno alaenna ti kuarta ken alahasna. Sinamsamda ti balayna nga adda iti pungto ti dagana. Kalpasan a dinadaelda amin a tawa ti balayna, pinuoranda dagiti literatura a naibatay iti Biblia ken dagiti bangko nga inaramidda agpaay iti kombension. Maysa ket kagudua a tonelada a literatura ti nadadael. Imbes a pasardengen dagiti polis ti krimen, nakiramanda pay ketdi iti panangranggas kadagiti Saksi.a

Saan laeng a ti pangta ti kinaranggas ti masapul a daeran ti Komite ti Kombension no di ket no kasano nga iremedioda tapno umanay ti 5,000 a kombensionista iti lugar a gagangay a makalaon iti agarup 2,500. Tangay kurangen ti tiempo, kasano a marisut daytoy a parikut? Kasla milagro ti napasamak idi dagiti makinkukua kadagiti dua a kabangibang a daga impaabangda ti talonda.

Dakkel a trabaho ti kasapulan tapno mapagbalin ti kataltalonan a maitutop a pagkombensionan. Nangnayon pay a nangparigat ti makalawas a panagtudtudona sakbay ti kombension. Namulaan iti patatas dagiti taltalon ket masapul a maapit dagitoy. Umuna, nagkalintuduan dagiti boluntario a nagkali iti patatas. Kalpasanna, inyakarda dagiti alad sa nagaramidda iti palapala tapno adda linong dagiti tumabuno. Ad-adu pay a bangko ti kasapulan a maaramid, maiplastar ti kanayonan nga alikamen a mangpapigsa iti timek (sound system). Nagragragadi, nagilanlansa, ken nagab-abut dagiti nagboluntario iti aldaw ken rabii, ket dadduma ti di payen natnaturog.

Pampanunoten ti dadduma, “No ngay agtultuloy nga agtudo kabayatan ti kombension? Mailumlumto ngata iti lubo dagiti delegado?” Gapuna, gimmatangda iti garami a mayap-ap iti nabasa a daga. Imbag ta naginit met laeng! Nagariwanas ti tallo nga aldaw ti kombension.

Idi simmangpet dagiti delegado, nagpintas a buya ti nakitada. Ti natalinaay a buya ket kasla panirpatan ti baro a lubong. Komportable a nakatugaw dagiti delegado a napalikmutan kadagiti kayo ti igos, agbungbunga a kayo, kamaisan, ken kakamatisan. Kasla nakurtinaan ti likudan ti entablado kadagiti agkalkalatkat nga ubas. Kabayatan ti programa, pasaray makangngeg dagiti timmabuno iti taraok dagiti kawitan ken kutak dagiti upa no maakas dagiti itlogda. Adda pay dadduma nga uni a gagangay iti away ngem para kadagiti timmabuno, kasla makaay-ayo a harana dagitoy. Imbes a masingada, saanda a madmadlaw dagita gapu ta atentiboda iti nagsayaat a programa a naibatay iti Biblia. Ngem saan laeng a dagitoy ti nakallalagip a pasamak iti kombension.

Ti Maikadua a “Milagro”

Iti ngudo ti sesion ti Biernes, di ninamnama dagiti delegado ti panangipakaammo ni Geoffrey Jackson, kameng ti Bagi a Manarawidwid dagiti Saksi ni Jehova, ti pannakairuar ti kompleto a Baro a Lubong a Patarus ti Nasantuan a Kasuratan iti Georgiano.b Nakalua ti adu gapu iti siddaawda. Siraragsak a kinuna ti maysa a pamilia: “Dimi malapdan ti agyaman gapu iti daytoy a milagro​—milagro ni Jehova. Nagdakkel la ketdi a gapuanan dayta iti nakaab-ababa a tiempo!

Maysa a kabsat a babai iti ili ti Tsalendjikha a dimngeg iti programa babaen ti telepono ti nagkuna: “Diak mayebkas ti rag-ok idi naawatmi ti kompleto a Biblia. Kayatko ti agyaman kadakayo gapu iti daytoy tallo nga aldaw a kombension. Talaga a nakallalagip daytoy nga okasion.” Maysa a pamilia iti kongregasion iti makinlaud a Georgia nga adda iti pagbeddengan ti Nangisit a Baybay ti nagkuna: “Dati, maymaysa ti Biblia iti pamiliami ngem ita, saggagaysakamin iti kopia ti Baro a Lubong a Patarus. Ita, mabalinen nga adalen ti tunggal maysa kadakami ti bukodna a Biblia.”

Ngem saan nga ammo dagiti timmabuno nga adda met dagiti parikut. Nupay nasapa a nayimprenta ken naipatulod idiay Georgia ti kompleto a Baro a Lubong a Patarus, saan nga impalubos dagiti opisial ti Departamento ti Aduana ti pannakaisanglad dagitoy idiay Georgia. Nagapelar dagiti kakabsat iti opisina ti Ombudsman. Nakaala ti Ombudsman iti pammalubos sakbay la unay ti kombension distrito. Imbaonna pay ti katulonganna iti kombension idiay Marnueli tapno mangala kadagiti kopia ti baro a Biblia nga agpaay iti opisinada.

Nabara a Panangabrasa Sigun iti Pamay-an Dagiti Georgiano

Ti kombension distrito idiay Marnueli ket naisangsangayan nga okasion kadagiti Saksi ni Jehova gapu iti sabali pay a rason. Timmabuno ti maysa a kameng ti Bagi a Manarawidwid dagiti Saksi ni Jehova. Magagaran ti amin a timmabuno a mangipakita iti nakairuamanda a panangabrasa. Masapul nga agtakder ni Kabsat Jackson tapno kablaawanna ida iti adu nga oras sakbay, bayat, ken kalpasan ti kombension, ngem maragsakan a nangaramid iti dayta.

Idi nagngudo ti maysa a kombension idi 1903, kinuna ti maysa a kabsat: “Diak isukat iti sangaribu a doliar dagiti nagunggonak iti daytoy a kombension, nupay nakurapayak laeng.” Nasurok a maysa a siglo kalpasanna, kasta ti narikna dagiti Saksi a timmabuno iti nakallalagip a kombension a naangay iti kalgaw ti 2006 iti pagilian ti Georgia.

[Footnotes]

[Kahon iti panid 19]

Immadu ‘Daydiay Bassit’

Pimmudno idiay Georgia dagiti sasao iti Isaias 60:22: “Daydiay met laeng bassit agbalinto a sangaribu, ket daydiay nagbassitan maysa a mannakabalin a nasion. Siak, ni Jehova, papardasekto dayta iti bukodna a tiempo.” Awan pay 20 a tawen, ngimmato iti agarup 16,000 dagiti awan pay 100 nga agibumbunannag iti Pagarian idiay Georgia. Dagitoy a naregta a ministro ti Sao ti Dios ket mangikonkonduktada iti dandani 8,000 a panagadal iti Biblia iti kada lawas​—maysa a dakkel a potensial para iti kanayonan a panagrang-ay idiay Georgia.

[Diagram/Dagiti Mapa iti panid 16]

((Para iti aktual a pannakaurnosna, kitaem ti publikasion))

RUSSIAN FEDERATION

GEORGIA

⇨ Zugdidi

⇨ Kutaisi

Marneuli ⇨ Gori

⇨ Kaspi

⇨ Tsnori

TBILISI

TURKEY

ARMENIA

AZERBAIJAN

[Credit Line]

Globo: Naibatay iti naretrato ti NASA/Visible Earth

[Ladawan iti panid 16]

Estatua idiay Tbilisi

[Dagiti Ladawan iti panid 17]

Ti kombension idiay Marnueli ket naikonektar kadagiti lima a dadduma pay a pagkombensionan babaen kadagiti telepono

[Dagiti Ladawan iti panid 18]

Naragsakan dagiti delegado iti pannakairuar ti kompleto a “Baro a Lubong a Patarus” iti Georgiano