Panangtulong iti Dadduma Idiay Tay-ak ti Serbisio
1 Manipud pay idi punganay ti Kristiano a kongregasion, personal a sinanay ni Jesus dagiti disipulona iti trabaho a panangasaba ken “rinugianna nga imbaon ida a sagdudua.” (Mar. 6:7; Luc. 8:1) Nadakamat ni apostol Pablo dagiti “katrabahona” idiay Filipos isuda a ‘nakipagbannog kenkuana iti naimbag a damag.’ (Fil. 4:3) Nupay saan a kanayon a kasapulan nga adda kadua iti ministerio, kaaduan kadatayo ti mangipateg iti panangkuyog dagiti dadduma kadatayo. (Ecl. 4:9) Kasano, ngarud, a makaparegta ken makatulongtayo kadagiti dadduma bayat ti panangasabatayo?
2 Maysa kadagiti panggep iti taripnong sakbay ti panangasaba isut’ pannangted iti tulong kadagiti agdadamo nga agibumbunannag. (om p. 77, 97) Uray dagiti baro laeng a nadutokan a regular payunir ket mabalin a kayatda met ti makikuyog kadagidiay mas eksperiensiado nga agibumbunannag wenno panglakayen ken ministerial nga adipen, iti kasta makaipaayda “ti panagsisinnukat iti pammaregta.”—Roma 1:12.
3 Maipaay iti rason ti kinatalged, maidagadag kadagiti agibumbunannag ti panagkukuyog iti dadduma a luglugar. Wenno no dadduma mabalin a makiddaw ti panangikuyog kadagiti saan pay unay a nasanay a timmabuno iti taripnong sakbay ti serbisio idiay tay-ak. No maawagantayo a mangaramid iti dayta, maysa a kurso ti ayat no “tulongan dagidiay a nakapoy,” nupay nairuamtayon a makikadkadua iti sabali a kakuyog.—Ara. 20:35.
AGDADANGGAYKAYO NGA AGTRABAHO
4 No makikuyogtayo kadagiti sabsabali, kayattayo ti agdadanggay nga agtrabaho. (Maidilig iti 1 Corinto 3:6, 9.) Mabalin ti panagririnnaman iti panangasaba, a nalabit nga adda panagsusublat a makisao. Kasapulan ti naimbag nga urbanidad babaen iti atentibo a panagimdeng bayat nga agsasao ti kaduatayo.
5 Nupay maiparbeng no dadduma ti bumallaet iti saritaan no ti kakuyog isut’ agsasao, kasapulanna daytoy iti panangitiempo. Ditay kayat ti sumampataw a masinga iti maysa a linea ti panagrason nga epektibo iti maysa a bumalay. Siempre, no ti maysa nga agdadamo nga agibumbunannag ket marigatan a mangsungbat iti maysa a pangontra, awan duadua a patgenna unay iti aniaman a maibadang kenkuana.—Ecl. 4:12.
6 Ikagumaantayo nga usaren ti tiempo iti nagbabaetan dagiti balbalay wenno ruruangan a pagsaritaan dagiti wagas no kasano a maparang-ay iti panangiparangtayo, a nalabit a mausar ti maysa nga introduksion iti Panakirinnason a libro. Ti panagkukuyog a mangasaba ket tumulong met kadatayo nga aga-ammo a naimbag iti maysa ken maysa, a mapairutan iti singgalut ti Kristiano a panagkakabsattayo.
7 Bayat nga agbibinnuligtayo iti maysa ken maysa iti serbisio, mapabilegtayo ti maysa ken maysa iti napasnek a panangipateg iti gamengtayo a ministerio. (2 Cor. 4:1, 7) Kabayatanna makasagraptayo met iti pammaregta, panagiinnadal iti maysa ken maysa, ken mapaerteng iti reppet ti panagkaykaysa iti panagkakabsat.