Ipakaammoyo ti Nagan ken Dagiti Aramid ni Jehova
1 “Agyamankayo ken Jehova, umawagkayo iti naganna; ipakaammoyo kadagiti inilin-ili dagiti ar-aramidna. . . . Agragrag-o koma ti puso dagiti mangbirok ken Jehova.” (Sal. 105:1, 3) Ti salmista a nangisurat kadagita a sasao pagragsakanna unay nga ipakaammo iti dadduma ti maipapan ken Jehova ken iti “ar-aramidna.” Aniada nga ar-aramid? Awan duadua a dagidiay mainaig iti nadayag a kinaari ti Dios ken iti “naimbag a damag ti panangisalakanna.”—Sal. 96:2, 3, NW; 145:11, 12.
2 Bayat nga umad-adanitayo iti tiempo ti Memorial 2001, addaantayo iti adu a rason tapno agrag-o maipapan kadagiti gapuanan ni Jehova kadatayo. Kasano a kasta? Awan duadua a ti Pangrabii ti Apo isu ti kangrunaan a rambak iti tawen para kadagiti amin a pudno a Kristiano. Awanen ti sabali pay nga okasion a kas iti dayta no maipapan iti kinapateg, panggep, wenno iti pamay-an ti pannakaangayna. Gundawaytayo amin dayta a lagipen no ania ti naaramidan ni Jehova ken ni Jesus tapno maisalakantayo. Di pakasdaawan nga iti tiempo ti Memorial, natural a namnamaentayo a naruay ti trabaho iti panangasaba, bayat nga ipakaammotayo “ti naimbag a damag ti panangisalakan”!
3 Agserbikayo Kadi kas Auxiliary Pioneer? Idi napalabas nga Abril, adda 19,704 a nag-auxiliary pioneer. Idi Mayo, adda 13,775 a nagpasalista. Idi Marso, ti bilang ket 6,125. Iti daytoy a tawen, maaramidtayo kadi manen ti Marso, Abril, ken Mayo kas espesial a bulbulan ti naagawa a ministerio? Lima ti Sabado iti Marso, ken lima ti Domingo iti Abril. Babaen ti panangiplanoda a mangasaba iti agmalmalem kada ngudo ti lawas, adu nga agibumbunannag ti makapag-auxiliary pioneer uray no regular a mangmanggedda. Tapno maragpat ti kasapulan a 50 nga oras kada bulan, agarup 12 nga oras kada lawas ti nasken a busbosen ti maysa nga auxiliary pioneer. Utobenyo a siaannad dagiti naisingasing nga eskediul iti kahon iti panid 4. Maitutop kadi ti maysa kadagita iti kasasaadyo? No saan, mabalinyo ti mangaramid iti bukodyo nga eskediul tapno makapag-Auxiliary pioneer-kayo iti daytoy Marso, Abril, ken Mayo.
4 Rumbeng a rugian itan dagiti panglakayen a parayrayen ti gagar ken suporta para iti dakdakkel a pannakiraman iti ministerio. Idi Abril iti napalabas a tawen, nagpayunir ti 64 kadagiti 121 nga agibumbunannag iti maysa a kongregasion gapu ta nag-auxiliary pioneer dagiti amin a panglakayen ken ministerial nga adipen iti kongregasionda! Naragsakan met ti kongregasion a makakita iti innem a di bautisado nga agibumbunannag a nangrugi nga agreport idi Marso ken Abril. Gapuna, itan ti kasayaatan a tiempo tapno imtuoden dagiti ubbing ken kabbaro kadagiti panglakayen no makakualipikardan a makiraman iti panangasaba iti publiko.
5 Ti Panagregget Mangyeg Kadagiti Bendision: Adu a bendision ti tagiragsaken dagiti kongregasion a mangipasdek kadagiti espesial a kalat ken talaga nga agregget. Mabalin a ti dadduma a kongregasion ipaayanda iti naisangsangayan nga atension ti panangasaba kadagiti manmano a mawanas a teritoria, panangipamaysa iti nadumaduma a pamay-an ti panangasaba, wenno panangipaganetget iti panangasaba iti telepono, a maysa nga epektibo a pamay-an tapno makasarita dagiti saan a nadanon a bumalay ken dagiti agnanaed iti narigat a madanon a lugar.
6 Rumbeng kadi a malappedan ti siasinoman a makiraman iti panagserbi agingga a posible gapu iti nakapuy a salun-at wenno kinalakay? Saan nga iti amin a kasasaad. Kas pagarigan, nag-auxiliary pioneer idi napan nga Abril ti 86-anyos a kabsat nga addaan iti kanser nupay imbal dagiti gurongna. Babaen ti panangasaba iti telepono, nabaelanna ti nakiraman a naan-anay iti serbisio, isu nga ad-adda a naidaydayawna ni Jehova. Nakapabileg daytoy kenkuana ken iti kongregasion.
7 Agsagana a Naimbag Para iti Memorial: Agtinnag iti Abril 8 ti Memorial ita a tawen. Yantangay Domingo dayta, posible nga ad-adu ti makatabuno. Mabalin a maragpattayo ti kangatuan a bilang ti tumabuno no aramidentayo ti pasettayo babaen ti (1) itatabunotayo a mismo ken (2) panangawis iti dadduma a maki-Memorial. Siasino ti rumbeng nga awisentayo?
8 Babaen ti rekordyo iti tay-ak ti serbisio, kitaenyo dagiti nagan dagidiay nangipakita iti interes iti kinapudno, nupay saanyo a sarsarungkaran ida a regular. Dua wenno tallo a lawas sakbay ti Memorial, ipamaysayo a sarungkaran amin ida tapno awisen iti Memorial. No ipalubos ti kasasaadyo, itukonyo ti pagluganan para kadagidiay mayat a tumabuno.
9 Iti dadduma a kongregasion, saan a maus-usar dagiti amin a nayimprenta nga imbitasion para iti Memorial. Rumbeng a siguraduen dagiti sekretario ti kongregasion nga adda umdas a panawen a magun-odan ti amin dagiti imbitasion tapno maiwaras. Mabalin a kayatyo nga imakinilia wenno isurat a nalawag ti oras ken lugar a pakaangayan ti Memorial iti baba ti imbitasion. Wenno mabalin a mangiragpinkayo iti handbill a naglaon iti address ti Kingdom Hall no dita ti pakaangayan ti Memorialyo. Kas pammalagip, iti kaaduan a kasasaad rumbeng a personal a maipaima dagiti imbitasion para iti Memorial iti bumalay.
10 Laglagipenyo Dagiti Inaktibo: Makaparagsak no ti maysa nga estudiante ti Biblia ket idedikarna ti biagna ken Jehova ken isimbolona daytoy babaen ti pannakaitanebna iti danum. Nupay kasta, tunggal tawen adda dadduma a sumardeng a makitimpuyog kadatayo, ket saandan nga ipakpakaammo kadagiti dadduma ti maipapan iti nagan ken ar-aramid ni Jehova. Adda naimbag a rasontayo a maseknan. Nupay kaaduan nga inaktibo ti saan a nangpanaw iti kinapudno, mabalin nga insardengdan ti mangasaba gapu iti pannakaupay, personal a parikut, wenno dadduma a pakaringgoran iti biag. (Mat. 13:20-22) Agkasapulan iti tulong dagidiay kimmapuy iti naespirituan tapno makapagsublida iti kongregasion sakbay nga alon-onen ida ti sistema ni Satanas. (1 Ped. 5:8) Iti daytoy tiempo ti Memorial, kayattayo nga ikagumaan a tulongan dagiti amin a kualipikado nga inaktibo a makiraman manen iti panangikasaba iti naimbag a damag.
11 Ti sekretario ti kongregasion rumbeng a pakaammuanna dagiti konduktor iti panagadal ti libro no adda inaktibo iti grupoda. Ti Congregation Service Committee ti mangorganisar iti panagipastor nga isasarungkar kadagiti amin nga inaktibo. No makitada a makagunggona para iti inaktibo ti personal a panangyadal kenkuana iti Biblia, ikeddeng ti service committee no siasino ti kasayaatan a mangyadal kenkuana. Nupay nalabit saan a kasapulan nga agpaut ti panagadalna, daydiay nadutokan a mangyadal kenkuana ti mabalin a mangireport iti dayta kas oras, panagsarungkar, ken panagadal iti Biblia.
12 Idi napan nga Abril, maysa a kabsat a babai a mangaskasaba ti nangipaima iti magasin iti maysa nga agkabannuag a lalaki nga adda iti kalsada. Impudnona nga inaktibo a Saksi ti asawana. Dinamagna no sadino ti pakasarakan iti Kingdom Hall ken inawisna ti kabsat a bumisita kadakuada nga agassawa. Kas resultana, timmabuno ti agassawa iti simmaganad a gimong ken immannugotda nga agadal iti Biblia.
13 Saganaan ti Narayray a Ministerio! Ti salmista a nangideklara a rumbeng nga ipakaammotayo ti nagan ken ar-aramid ni Jehova ti nagkuna: “Kantaanyo, kantaanyo kadagiti panangidaydayaw; isaoyo amin dagiti nakaskasdaaw nga ar-aramidna. Pagpasindayawyo ti nasantoan a naganna.” (Sal. 105:2, 3) Ipakitatayo ti pannakaseknantayo iti naindaklan a nagan ken “nakaskasdaaw nga ar-aramid” ni Jehova babaen ti kinapingettayo iti ministerio, a pagbalinentayo daytoy a kasayaatan pay laeng a panangrambak ti Memorial!
[Kahon iti panid 4]
Nagduduma a Pamay-an Tapno Mabusbos ti 12 Oras Kada Lawas nga Ag-auxiliary Pioneer
Aldaw Oras
Lunes 1 2 − −
Martes 1 − 3 −
Mierkoles 1 2 − 5
Huebes 1 − 3 −
Biernes 1 2 − −
Sabado 5 4 3 5
Domingo 2 2 3 2
Dagup: 12 12 12 12
Bumagay kadi kadakayo ti maysa kadagitoy nga eskediul? No saan, apay a dikay agaramid iti bukodyo nga eskediul?