Ti Panagsasalisal iti Edukasion iti Japan
Babaen ti koresponsal ti “Agriingkayo!” iti Japan
“AWANEN, kinapudnona, ti ad-adda pay a naipamaysa iti sosiedad a Hapones wenno ad-adda pay a kangrunaan iti balligi iti Japan,” kuna ti Propesor iti Harvard a ni Edwin O. Reischauer, “ngem ti sistema ti edukasion.”
Di pay nabayag, nupay kasta, dagiti eskuelaan iti Japan maat-atakeda. Ti manangipadamag a ni Yoshiko Sakurai kunaenna: “Ti sistema ti edukasion iti Japan napagbalinen a pagsasalisalan tapno makaruar iti eksamin imbes a maysa a pamay-an a sadiay dagiti estudiante masursuruanda.” Ni Sasuke Kabe, maysa a prinsipal a Hapones, kasta met ti makuna nga impudnona: “Gagangay impaganetgetmi ti pananggun-od iti pannakaammo a maibusor iti panangpataud iti adut’ paglainganna a tao.”
Adu a mannursuro ngarud ti agprotesta a dagiti eskuelaan iti Japan nagbalindan a pagsasalisalan iti edukasion—maysa a makabannog, mannakisalisal a pakasubokan iti panagibtur. Apay a timmaud ti kasta a kasasaad? Kangrunaanna gapu iti nangato a panangipateg dagiti tattao a Hapones iti panagraem kadagiti sabsabali ken iti balligi. Ti pannakaiyempleo iti maysa a mabigbigbig a kompania ngarud ti maipatpateg unay. Gagangay, tapno makagun-odka iti kasta a trabaho, nupay kasta, masapul nga aggraduarka manipud iti mabigbigbig nga unibersidad.
Nupay kasta, no saanka a nageskuela iti maysa a nalatak a high school, ti gundawaymo a sumrek iti maysa kadagitoy a napili nga unibersidad ket mammano. Ngem mabalin a saanka a makastrek iti umiso a high school no saanka a nakastrek iti umiso a junior high school, a saanto a mapasamak no ti eskuelaan nga elementaria a nageskuelaam awanan kadagiti nainkalintegan a bilang dagiti estudiantena a nakaruar iti eksamin tapno makastrek iti junior high school. Uray pay ti nagadalam a kindergarten ti mabalin a mangikeddengto iti maysa nga aldaw no kasano ti irarang-aymo iti maysa a kompania!
“Impierno ti Eksamin”
Di ngarud pagduaduaan, a ti kolumnista a ni Kimpei Shiba nagsurat a “dagiti inna nga agannayas iti edukasion . . . [rugianda] a padakkelen dagiti maladaga[da] a 2 años laeng tapno masanay a maipaay iti eksamin a sumrek iti kindergarten tapno mabaelandanto ti sumrek kadagiti nasaysayaat nga eskuelaan iti elementaria.” Nakaro unay ti panagsasalisal ta maysa laeng nga estudiante kadagiti siam ti makastrek.
Kalpasan ti panangrugi iti eskuelaan ti elementaria, ti sumaganad a 12 a tawtawen ti mabusbos nga agsagana a maipaay kadagiti agsasaruno nga eksamin a kasapulan tapno makastrek iti nangatngato a tukad iti panageskuela. Kuna ti kolumnista a ni Shiba, “Nakaro unay [ti] panagsasalisal ta ti ebkas nga ‘impierno ti eksamin’ napataud. No dagiti ubbing sumrekda iti maikanem a grado iti eskuelaan a primaria, agawidda nga addaan iti trabaho [homework] a makasapul iti agarup 2 oras a panagadal. Ngarud dardarasenda a kanen dagiti pangrabiida sakbay nga agturongda a dagus kadagiti pribado nga eskuelaan a maawagan ‘juku,’ isu a naipamaysa a mangisagana kadagiti estudiante a maipaay iti eksamin tapno makastrek iti junior high, a sadiay dagiti estudiante ti maikabil iti 3-oras a nainget unay a pannakasursuro iti 7 nga al-aldaw iti maysa a lawas.”
Mabalin a gagangay a pagarupenyo, a gaput’ nalasatanyo iti kasta unay a karit, dagiti sumrek iti unibersidad mabalin a sigagagarda nga agsuro, nga agbalin a Kangatuan nga estudiante. Saan a kasta, kuna ti mannurat a ni Kimpei Shiba. Deskribirenna ti gagangay nga estudiante iti unibersidad kas maysa a “manglaglag-an laeng kadagiti bambanag, a masansan nga agay-ayam iti mah-jongg iti kagudua ti aldaw bayat ti or-oras ti panageskuela gapu ta ammona a makaawatto iti diplomana. Ti laeng kasapulanna isu ti pananggun-od iti kasapulan a bilang dagiti kredito.” Kasla agparang a kaaduan a manangiyempleo bassit laeng ti pannakaseknanda no kasano kaadu ti pudno a nasursuro dagiti graduado. Dagiti trabaho ti basta maipaay kadagidiay a nagraduar iti umiso nga unibersidad.
Dagiti Bungbunga iti Panagsasalisal
Saan a nakaskasdaaw, amin a kita ti kinadakes ken parparikut timmaudda iti daytoy a mannakisalisal nga aglawlaw. Tinawen dagiti managpanunot a nagannak ti mangpasuksok tapno dagiti annakda makastrekda iti unibersidad, high school, ken junior high school. Dadduma a nagannak mangiyurnosda pay iti palso a diborsio tapno ti maysa a naganak ken ti maysa nga ubing ti mabalin a mangipalista iti direksion a pagtataenganda iti masakopan iti mabigbigbig nga eskuelaan. Ngem no rinibribo nga estudiante ti agsasalisal a maipaay laeng ti sumagmamano a gasut a bakante iti maysa nga eskuelaan, ti kaaduan ti maupayto. Daytoy ti nangiturong iti panagsusaid kadagiti dadduma. Dadduma ti nangiyebkas ti pannakaupayda babaen ti ar-aramid iti kinaranggas.
Nalabit ti ad-adda a makaupay kadagiti isuamin isu dagiti epekto daytoy pannakidangadang tapno magun-odan laeng ti tarigagayanda nga aglawlaw kadagiti estudiante. Makapainteres, ti Opisina ti Primero Ministro ti nangibilin iti maysa a grupo a mangidilig iti kababalin dagiti agtutubo nga agtawen iti 18 agingga iti 24, kadagiti 11 a pagpagilian. Maysa a saludsod ket, ‘Tarigagayanyo kadi ti agbalin a narang-ay iti pinansial?’ Ti Japan ti nangidaulo kadagiti pagpagilian a nagkuna iti wen. Iti kasumbangirna, dagiti agtutubo napagsaludsodanda met no tarigagayanda ti tumulong kadagiti tattao babaen ti panangaramid iti sosial a trabaho. Dagiti agtutubo a Hapones maudida iti listaan. Gapuna nupay no dagiti eskuelaan iti Japan ti mabalin a naballigi iti akademia, dadduma ti mangipaay kadakuada iti saan a makaruar a grado no maipapan iti panangpataud iti natimbeng, mangipateg, adut’ paglainganna a personalidad.
Ti kadi balligi aniaman ti mapasamak a pilosopia iti edukasion addaan pay kadagiti makadangran nga epekto kadagiti estudiante? Usigenyo ti parikut a napataud kadagiti eskuelaan nga Aleman.
[Blurb iti panid 5]
“Ti sistema ti edukasion iti Japan napagbalinen a panagsasalisal a makaruar iti eksamin imbes a pamay-an a pakagun-odan dagiti estudiante iti paglaingan”
[Ladawan iti panid 5]
Mangrugi a masapa ti panagsasalisal
[Credit Line]
Japan Information Center