Panagtalek a Dinto Pulos Maliputan

“AGTALEKKA laeng iti bagim, ket ti sabali dinakanto liputan.” Nupay no daytoy a kapaliiwan iti kinamanagduadua ti naaramid 250 a tawtawenen ti napalabas, adu itatta ti mangiyebkas iti kasta met laeng a rikrikna. Ti espiritu iti kinaawan ti panagtalek nagsaknapen iti kaaduan iti sosiedad.

Ni Leo, isu a nagpanggep a mangasawa manen, ipapilitna a sakbay iti kasar ti nobiana masapul a mangpirma iti katulagan a mangibalabala iti panangsuportar no mapasamak ti panagsina iti masanguanan. Ti panagasawa napukawnan ti panagtalek.

Ni Larry, a mangiladawan kadagiti adu a saan a naiyempleo nga agtutubo, ti nagreklamo: “No ammo ti sosiedad a maalanakayo, ket ikabilnakayo iti maysa a bassit nga abut ket baybay-annakayo sadiay, dayta ti aramidenda.” Napukawna ti panagtalekna iti sosiedad nga interamente.

Kalpasan iti nabiit pay nga eskandalo a nakairamanan iti maysa a nalatak nga ebanghelista iti telebision, ni Juanita, maysa a dati a managkontribusion iti kuarta, ti nagsennaay: “Daytat’ panangallilaw, interamente a panangallilaw.” Uray pay dagiti relihiuso a papangulo saanda a kanayon a mapagtalkan.

Nainsiriban, mamakdaar ti Biblia a maibusor iti awan siribna a panagtalek kadagiti tattao ken kadagiti natauan nga institusion. Nagsurat ti salmista: “Dika agkammatalek kadagiti prinsipe, ken ti anak ti tao.” Ti isu met laeng a salmo, nupay kasta, mamalakad kadatayo nga agkammatalek iti maysa, maysa a pulos a saan a mangliput iti panagtalek, ti mannakabalin-amin a Dios.​—Salmo 146:3, 5.

Pudno, dagiti nasional a papangulo, uray pay ti intero a nasnasion, masansan a kunaenda nga agtalekda iti Dios. Kinapudnona, adu a kuarta ken sinsilio iti Estados Unidos bayat iti napalabas a ginasgasut a tawenen ti addaan iti replan nga: “AGTALEKTAYO ITI DIOS.” Ngem ipamatmat ti historia nga imbes nga agtalek iti Dios, kaaduanna ti sangatauan ti nangikabil iti panagtalekda iti ekonomia, militaria, ken ti napolitikaan a bileg.

Adda kadi ili a pudno a mangikabil iti panagtalekna iti Dios a masarakan itatta? Napateg kadi ti panangaramid iti kasta? Kasano a magunggonaanda?

Bayat ti kalgaw iti 1987, kadagiti ginasgasut a siudad iti intero a makin-amianan a hemispero, minilmilion ti nagtitipon a nangpatalged iti panagtalekda iti Dios. Ti tema ti kumbensionda, nga inorganisar dagiti Saksi ni Jehova, ket: “Agtalek ken Jehova.” Kas kunaen ti maysa a pagiwarnak idiay Norwich, Inglatera, daytoy a tema ti kumbension iti tawen iparangarangna ti nasaknap a saan a pannakaay-ayo iti lubong. Ngem imbes nga agsennaayda iti di panagballigi dagiti natauan nga institusion, nagtataripnong dagiti Saksi tapno usigenda dagiti pamay-an ti panangpabilegda iti panagtalekda ken Jehova ken panangrepaso kadagiti gunggona nga iyeg ti kasta a dalan.

Ania ti nangtignay kadagitoy a tattao nga agtataripnong? Ti panagtalekda iti Dios ken iti Saona, ti Biblia. Maysa nga artikulo iti pagiwarnak idiay Granada, España, inlawlawagna ti panggepda iti itatabuno iti kumbension: “Dagiti intero a pamilia nagbiaheda a napan idiay Granada, agtutubo nga annak, nagannak ken appo a lallakay ken babbaket, tapno umimdeng iti sao ni Jehova, agsipud ta dayta ti ibalakad ti Biblia. Daytoy ti agserbi a mamagkaykaysa kadagiti pampamilia ken mangpabileg iti singgalut iti pannakigayam.”

Panagtalek iti Dios Naiparangarang Dagidiay Timmabuno

Para kadagiti adu, ti kaadda laeng iti kumbension isu ti pammaneknek iti panagtalekda ken Jehova. Daytoy ket pudno iti kaso ni Simone Grijmonprez, isu nga adda iti kumbension idiay Kortrijk, Belgium, iti inaldaw nupay addaan iti nakaro a sakit a makasapul ti pannakaipaay ti oksihena kenkuana iti innem nga oras iti inaldaw.

Adda met iti kumbension idiay El Ferrol, España, isu ni Roberto González a maysa a quadriplegic wenno naan-anay a paralitiko ken maysa met nga amin-tiempo a ministro. Nupay kankanayon nga isut’ adda iti wheelchair ken maidalitak iti pagiddaan iti dua wenno tallo a bulan iti tinawen, isut’ mangbusbusbos iti agarup 90 nga oras iti binulan iti panangasaba kadagiti kalkalsada kadagiti gagayyem ken kakaarruba maipapan iti kinapateg iti panagtalek iti Dios. Isut’ makapagsarita manipud iti kapadasan agsipud ta ti panagtalekna a mismo ken Jehova ti namagbalin kenkuana a nakapagballigi iti pannakaadikto iti droga, maysa nga ugali a nangipaay iti polis iti rekord a pito a pannakaaresto ken ti di maagasan a paralisis idi agedad iti 18. Isut’ nakatulongen kadagiti dati a kakaduana nga agtalek iti Dios imbes nga iti narkotiko tapno agbalin a napateg ti panagbiag.

Dadduma ti masapul a mangaramid kadagiti panagsakripisio iti ekonomia tapno makatabunoda. Pudno daytoy kadagiti adu a Saksi kadagiti isla iti Azores a masapul nga agbiahe iti sabali nga isla tapno tumabuno iti kumbension idiay Angra do Heroísmo. Maysa a pamilia iti lima ti nangbusbos iti sumagmamano a bulbulan a nangpalukmeg iti dua a baka isu nga inlakoda tapno mabayadan ti pasahe.

Panagtalek iti Dios Kaipapananna ti Panagtalek kadagiti Pagalagadanna

“Agtalekka ken ni Jehova ket agaramid iti naimbag,” kuna ni salmista David. (Salmo 37:3) Patien dagiti Saksi, ngarud, a ti napasnek a panagtalek iti Dios ti masapul a mapaneknekan babaen iti naimbag nga aramid. Gapuna, ti panagserbi iti mapagtalkan a Dios ti nangtignay kadakuada nga agbalin a mapagtalkan a tattao. Daytoy ket maysa a banag nga inapresiar dagiti adu a nakapaliiw.

Idiay kumbension idiay Le Havre idiay Francia, maysa nga inheniero iti telepono ti mangikabkabit iti maysa a kable iti telepono iti pasilidad iti stadium ket nangiyebkas iti pannakaseknan maipapan iti panangibatina iti alikamenna nga awan ti agbambantay. Maysa nga opisial iti ili ti nangipanamnama kenkuana: “Saanka nga agdanag maipapan kadagiti Saksi. Ti kadadaksan a mapasamak isu ti pannakasarakmo nga addaankanton iti ad-adu nga alikamen ngem sakbayna.”

Iti maysa a kumbension idiay Sweden, ti makinkukua iti motel ti nangibati kadagiti amin a master keys iti motelna kadagiti Saksi a mangor-organisar iti kumbension. Pinalubosanna ida a mangimaton iti motel nga awan ti asinoman a kameng ti motel nga adda sadiay. “Dikam pay inar-aramid daytoy idi,” kuna ti makinkukua, “ngem agtalekkami kadakayo.” Kalpasan ti kumbension, inyebkasna ti pannakapnek iti pamay-an ti panangaywan dagiti Saksi iti arubayan.

Naiyebkas ti Panangapresiar iti Kababalin dagiti Saksi

Ti panagtalek iti Dios tignayenna met dagiti tattao a mangiyaplikar kadagiti pagalagadan iti kinadalus ken kinaurnos. Dayta ti mangtignay kadakuada a mangipaay iti serbisioda kas boluntario ken tumulong kadakuada nga agtrabaho a sangsangkamaysa nga agtutunos. Daytoy a paset iti kumbension ti pudno a saan a napalabas a di nadnadlaw.

Ti mayor iti Terni, Italia, nangipatulod iti sumaganad a telegrama kadagiti delegado iti kumbension a nagtataripnong iti dayta a siudad: “Kayatko nga ipaay ti panagraem ken panangapresiar ti intero a siudad iti natan-ok a sibiko a pamay-an a naiparangarang iti panangusar ken panangisagana iti pasilidad a naipaay kadakayo. Naimpusuan a kablaaw kadagidiay amin a makipaset iti kumbension.”

Maysa a kapatas iti Ice Hall idiay Mikkeli, Finland, a nakapaliiw iti espiritu dagiti Saksi a nagboluntario a mangorganisar iti kumbension, ti nangilawlawag: “Diak nakasarak iti aniaman a negatibo ditoy, dagiti laeng positibo! Ti espiritu dagiti boluntario a trabahador ket nagsayaatan. Makaparagsak ti makakita kadagiti nararagsak a tattao a mangtagtagiragsak iti trabahoda.”

Maysa a tsuper iti bus nga adda idiay kumbension idiay Nancy, Francia, ti nagkuna: “Diak am-ammo idi dagiti Saksi ni Jehova, ngem itan nasaysayaaten ti pannakaammok kadakuada. Idi napalabas kankanayon a makangngegak kadagiti negatibo a komento maipapan kadakuada. Ngem ita makitakon dagiti naiduma a bambanag. Diak mailadawan ti kasta unay a kinatalingenngen ditoy. Awan ti agiduron, awan ti marurod, ket isuamin ti agandar a kankanayon.”

Idiay Pergusa, Italia, maysa a pagiwarnak ti nangipablaak iti maysa a surat nga insurat ti maysa a grupo dagiti lokal nga umili nga agyamyaman kadagiti Saksi iti nagsayaatan a kababalinda, nangnangruna ti kinadalusda, ken ti pamay-an ti panangaywanda kadagiti pasilidad ti estadium. “Tunggal maysa ti masapul koma nga agtignay a kas kadakuada,” kuna ti surat, “ngem daksanggasat ta naiduma dagiti bambanag no dadduma a panagtitipon ti maaramid.”

Sumagmamano a palawag idiay kumbension ti nangipaganetget iti pannakasapul iti panangtulad kadagiti nadiosan a kualidad. Ikagkagumaan dagiti Saksi ni Jehova ti mangaramid iti kasta. Dadduma ti naparegta iti irarang-ay a naaramidanen iti daytoy a pagturongan.

Maysa nga ahente ti pagiwarnak, a ti shopna ti adda iti asideg ti pagkumbensionan idiay Edinburgh, Scotland, ti nagkuna: “Kankanayonak a maragsakan no umay dagiti Saksi ditoy Murrayfield! Nakaay-ayatda ken nadayawda no umayda iti shopko​—awan ti agdidinnuron, awan ti agreklamo, awan ti agiinnuna tapno umuna a maserbian. Pagragsakan ti kaaddada ditoy, ket inanamaek ti pannakakitak kadakuada iti tinawen.”

Maysa a mannurat iti pagiwarnak idiay Belgium ti nagkuna: “Dikam pay nakakita iti sadinoman iti kastoy.” Kuna pay ti sabali a manangipadamag: “Iti kaaldawantayo, narigat a panunoten, iti naan-anay a natauan a panangmatmat, a ti kasta a nagdakkelan a panagtitipon ti mabalin pay laeng a maorganisar iti kasta nga atmospera iti panagkakabsat.”

Ni Tomas Bresky, maysa a Sueko a managsaludsod iti telebision, ti adda idiay kumbension idiay Lulea, Sweden. Ginupgopna ti impresionna iti kastoy a pamay-an: “Maragsakanka . . . kalpasan ti pannakilangenmo kadagitoy a tattao bayat ti sumagmamano nga al-aldaw. Nakatibtibkerda iti pammatida, saanda a pulos a makikompromiso, nakabilbileg iti panagtalekda iti Biblia. Sino ti saan a maawis iti maysa nga organisasion a kasta ti panagandarna? No serbian ti 10,000 iti taraon, dayta ti kasla laeng panangiyawat iti sumagmamano a tinapay ken ikan. Siasino ti di mangayat a maaddaan iti kasta a naulimek ken naanus nga annak? Ditoy makasarakka iti pudno a disiplina ken urnos.”

Dagiti Kandidato iti Bautismo Ipakitada ti Panagtalek ken ni Jehova

Iti tunggal kumbension, naipaay ti gundaway kadagiti delegado a mangisimbolo iti dedikasionda babaen iti bautismo iti danum. Ti palawag a sinaruno daytoy a seremonia ti namagbalin a nalawag a ti kasta a pangngeddeng iparangarangna ti panagtalek ken ni Jehova. Adu a nangiparang kadagiti bagbagida a maipaay iti bautismo ti nakapadasen iti gunggona ti kasta a panagtalek.

Idiay kumbension idiay Navan, Ireland, nabautisaran ni Noel Donaghue. Di pay nabayag iti napalabas, isut’ nabaybay-an, nga agnanaed iti maysa a napanawan a balay idiay Liverpool, Inglatera, ket dina pay ay-aywanan ti bagina a naimbag gapu iti panagliday ken ti nakaro a ladingit maipapan iti kasasaad ti lubong. Kimmapuy ti salun-atna, ket kayatnan ti matay. Kamaudiananna, idi Pebrero 1984 masapul a maputed dagiti saksakana gapu iti nakaro a pannakaisarang iti lamiis.

Iti naladaw a paset dayta a tawen isut’ nagawid iti pagtaenganna idiay Ireland ket isut’ nasarakan dagiti Saksi. Di nagbayag isut’ tumabtabunon kadagiti gimgimong, ket nasukatanen ti ladingitna iti pudno a namnama iti masanguanan. “Ti umuna a kagudua dayta a tawen ket nakarigrigat,” kinunana, “ngem ti maikadua a kagudua ket nakaskasdaaw.” Itan addaanen iti optimistiko a panangmatmat, isu a maiparangarang iti sungbatna no mapagsaludsodan no kasano ti panangasabana iti balaybalay nga addaan kadagiti artipisial a saksaka. “Bueno,” kunana, “siempre saanak a mariribukan iti nalamiis a saka iti panawen ti kalam-ekna!”

Mairaman kadagiti kandidato iti bautismo isu ti maysa a baket a nakasuro met nga agtalek iti Dios. Idiay kumbension distrito idiay Colombes Stadium iti asideg ti Paris, ni Claudine Adolphe, maysa a babai a 91 años, ti nabautisaran. Ti anakna a babai nagbalin a Saksi sumagmamano a tawen sakbayna, ket ni Claudine, nupay baketen, nangrugi a napaliiwna ti pammati ken ti wagas ti panagbiag dagiti Saksi ni Jehova. Gaput’ napukawnan ti sumagmamano a miembro ti pamiliana iti ipapatay, isut’ naliwliwa iti kasta unay babaen ti namnama iti Biblia a panagungar a nailawlawag kenkuana. Rinugiannan ti nagadal iti Biblia ket naammuanna ni Jehova ken nagtalek kenkuana, ti Dios a nangikari a mangisubli kadagiti natay iti biag.

No José Benito, a nabautisaran idiay El Ferrol, España, mapaneknekanna met ti pateg iti panagtalek ken ni Jehova. Bayat iti uppat a tawen isut’ nakidangadang a mangparmek iti pannakaadiktona iti droga ngem saan a nagballigi. Kalpasanna rinugianna ti nakipagadal iti Biblia kadagiti Saksi ni Jehova, ket ti umiso a pannakaammo iti Sao ti Dios, agraman ti bileg nga ipaay ti Dios, ti namagbalin kenkuana a nabaelanna ti limmapsut iti daytoy nga ugali. Kankanayon nga isut’ addaan ti panangapresiar kadagiti naespirituan a bambanag, ket no isut’ adda iti impluensia iti droga, isut’ mangasaba kadagiti bar ken kadagiti kalkalsada iti bukodna a doktrina maipapan ken ni Jesus ken ti pannakasapul iti talna. Isut’ ang-angaw a panaganan dagiti tattao “ti apostol” iti ilina. Itan naitunosnan ti panagbiagna kadagiti kalikaguman ti Dios ken nasursuronan ti mangasaba iti natan-ok a pamay-an, iti nainkalintegan a pamay-an.

Panangapresiar kadagiti Programa ti Kumbension ken dagiti Nairuar a Pagbasaan

Dagiti Saksi, a timmabuno manipud kadagiti adu a dagdaga, naragsakanda iti makaisuro a programa ken ti pannakilangen a tinagiragsakda. Maysa nga amin-tiempo a manangasaba, a nagserbi a Katoliko a madre iti 43 a tawtawen, ti nagkuna: “Ti nagsayaatan a sangalubongan a panagkaykaysa ti agtultuloy a mangpasiddaaw kaniak. Masansan a kunaek iti bagik: ‘Ni laeng Jehova ti Manangorganisar kadagita a paspasamak, naisangsangayan iti lubong a kasta unay ti panagsisinasinana iti amin a kasasaad ti panagbiag!’”

Maysa nga ama iti tallo nga annak manipud Stoke iti Trent, Inglatera, ti nagsurat: “Tunggal palawag ti kasla addaan iti maysa a punto a nangnangruna a maipaay kadatayo. Tunggal rabii bayat ti panagawidmi, agyamankami ken ni Jehova iti panangaramidna iti kasta a probision a maipaay kadakami.”

Kadagidiay kumbension nga Español, maragsakan dagiti nagdengngeg a makaawat iti libro nga Aid to Bible Understanding iti Español. Maysa a kabsat a lalaki idiay Granada, España, ti nakagun-od ti maysa a kopia ket uk-ukagenna bayat ti panagurayna iti estasion ti gasolina iti batog a mismo ti pagkumbensionan. Maysa kadagiti katulongan ti nakadlaw iti paulo ti libro ket kinunana: “Dayta ti kasapulan, maysa a banag a tumulong kadagiti tattao nga umawat iti Biblia. Pudno a diak maawatan dayta.” Ti kabsat ti nangitukon a tumulong kenkuana, ket narugian ti maysa a panagadal iti Biblia iti daytoy a lalaki iti lawas kalpasan ti kumbension.

Kangrunaan ngem amin, ti programa ti kumbension ti nangipaganetget iti pannakasapul iti panagtalek iti Dios ken iti Pagarianna imbes a kadagiti natauan nga institusion. Idiay Italia, maysa a nalatak a mannurat ti nakadlaw iti daytoy naisangsangayan a paset iti pammati dagiti Saksi ni Jehova. Inlawlawagna iti maysa a telebision brodkas iti intero a nasion: “Dagitoy sititibker a patienda daytoy a mensahe . . . iti naballigi a panagsubli ni Kristo, isu a pudno a linaon ti sursurat ti Baro a Tulag. Kunaek a dagitoy a tema ti inlaksid saan laeng a ti Iglesia Katolika no di ket dagiti pay amin a dadakkel a Nakristianuan a relihion. Dayta ti inikkatda manipud iti tengnga dayta orihinal a Nakristianuan a pammati, ket dagitoy a movimiento [dagiti Saksi] ti nakasarak kadakuada. Iti kastoy a kaipapanan dayta ti pudpudno a pannakasarak, maysa nga umiso a pannakasarak.”

Daytoy a “pannakasarak” kadagiti kangrunaan a Nakristianuan a doktrina ti namagbalin kadagiti Saksi a mangsukat iti kinamanagduadua iti pammati, ti pannakaupay iti namnama, ken ti kinaawan ti panagtalek iti panagtalek. Ammoda a pulos a saanto a liputan ti Dios ti panagtalekda kenkuana. Daytoy a serie a mismo dagiti kumbension ti nangipakita a napateg ti panagtalek iti Dios ken ti agbiag a maitunos iti dayta a pammati. Iti pagnguduan iti programa, dagiti delegado nagsublida iti pagtaenganda a determinado ken ad-adda pay nga ‘agtalek ken ni Jehova iti amin a pusoda.’​—Proverbio 3:5.

[Tsart iti panid 21]

DAGITI REPORT A NAAWATEN KADAGITI 1987 A KUMBENSION

Austria 5 24,686 360

Belgium 7 31,121 319

Britania 15 155,743 1,212

Denmark 5 23,029 200

Finland 6 26,144 284

France 19 138,683 2,705

Alemania 24 159,361 1,455

Greece 5 28,811 418

Ireland 2 4,326 61

Italia 34 221,227 5,496

Luxembourg 1 1,458 8

Malta 1 674 13

Netherlands 9 43,510 231

Norway 4 12,703 218

Portugal 12 55,057 1,102

España 15 105,591 2,394

Sweden 10 30,099 312

Switzerland 5 19,459 261

NAKAGUPGOPAN 412 2,948,557 40,319

[Ladawan iti panid 17]

Ti drama ni Rahab

[Ladawan iti panid 17]

Ni Roberto González, España

[Dagiti ladawan iti panid 18]

Ngato: Claudine Adolphe, Francia

Tengnga: Crystal Palace, National Sports Centre, Inglatera

Bautismo a mangisimbolo iti dedikasion