Kaanonto ti Panagpatinggana?
TI PANANGARAMID iti makapabang-ar a pisikal a trabaho ket makaparagsak ken makapasalun-at. Ngem daksanggasat, ti pannakipaset wenno uray pay ti panagbuya iti maysa a panagay-ayam masansan a kaipapananna ti pannakaigamer iti nakaro ti kinaranggasna, ken masansan napno iti droga a lubong.
Ti moderno-aldaw a panagay-ayam ket maysa laeng nga ebkas dayta naranggas a lubong. Iti panagsarita maipapan kadagiti paspasamak idiay Belgium idi 1985 a nakagapu iti ipapatay dagiti 39 a tattao nga adda kadagiti pagtugawan iti estadium iti football, kinuna ti pilosopo a ni Emanuele Severino: “Napagnunumuan ti kaaduan a dagiti paspasamak a kas ti napasamak idiay Brussels ket mapasamakda gapu iti kinakurang ti panamati dagiti tattao kadagiti kangrunaan a pagalagadan iti kagimongan.” Kalpasanna innayonna pay: “Ti kinaranggas iti tiempotayo saan nga agtaud iti kinaawan dagiti ipatpateg no di ket iti kaadda dagiti baro nga ipatpateg.”
Baro nga Ipatpateg
Ania dagitoy a baro nga ipatpateg a dinakamat ni Propesor Severino? Ti maysa isu ti narcissismo dagiti atleta a mamagbalin kadagiti kampeon a “didios.”
Ken adda ti nasionalismo ken dagiti napolitikaan nga epektona. Kunaen ti magasin a L’Espresso: “Ti panagay-ayam nagbalinen a nagdakkelan a pakaitan-okan iti kagimongan. No ad-adu ti abakenna, ad-adda a mabigbig ti maysa a nasion.”
Ti kuarta ket maysa met kadagiti baro nga ipatpateg a nagbalinen a paset iti lubong ti panagay-ayam. Dagiti nakaad-adu a pinansial ken komersial a pagimbagan—dagiti kalintegan iti panagiyallatiw iti telebision, publisidad, dagiti loteria, ken ti panangesponsor—patalgedanna ti “awan konsiensiana a panagsasalisal,” uray pay kadagiti managay-ayam a mismo. Maysa a dati a managay-ayam iti soccer kinunana a ti soccer ket “saanen nga ay-ayam. Daytat’ basta negosio.”
Ti agsaksaknap a prinsipio isu ti panagballigi aniaman ti mapasamak, ket sigun kadagiti baro nga ipatpateg itatta, daytoy kaipapananna ti isuamin—manipud kinaranggas agpadpada iti tay-ak ken kadagiti pagtugawan agingga iti kinaranggas a patauden dagiti agrayo kadagiti managay-ayam sakbay ken kalpasan ti ay-ayam, manipud panagdroga ken dagiti makapapatay nga epektona agingga iti saan a kinanainkalintegan ken ti kinaawan konsiensia. Ti espiritu ti panagay-ayam, a makuna a nainkalintegan a panagay-ayam, kasla naglabasen. Agsublinto pay kadi dayta? Iti panangipato babaen iti naibagan, inanamaen dagiti tattao a kasta, ngem dagiti kinapudno ket saanda a makaparegta.
Droga ken Kinaranggas—Agpatingganto Pay Aya?
Kas inamin ni Propesor Severino, ti kinaranggas iti panagay-ayam ket maysa laeng a paset iti ad-adda a pangkaaduan a kinaranggas a mangtutuok iti moderno a sosiedad. Ania ti makagapu iti adu unay a kinaranggas? Maysa a padto ti Biblia tulongannatayo a mangawat iti parikut. Iti panagsaritana maipapan iti maudi nga al-aldaw daytoy dakes a sistema dagiti bambanag, inlista ni apostol Pablo dagiti sumaganad a kababalin: ‘Dagiti tattao agayatdanto kadagiti bagbagida, naagumda iti pirak, saanda a nasingpet, saanda a managparbeng, nauyongda, gumurgurada kadagiti naimbag, mangliliput, nasubeg, natangsit, managayat kadagiti ragragsak.’ Ket innayonna pay: “Ngem dagiti tattao a dakes ken dagiti managulbod dumakesdanto la a dumakes.”—2 Timoteo 3:1-5, 13.
Daytoy agdama a lubong, ilawlawag ti Biblia, “adda iti babaen ti pannakabalin ti dakes.” (1 Juan 5:19) Ni Satanas a Diablo isu ti “dakes” a mangpadpadakes kadagiti naimbag a bambanag, kas iti nasayaat a panagay-ayam. Isut’ makimbiang iti naranggas nga espiritu. Isu gargarienna ti nasionalismo, ti kinaagum, ken ti kinabuklis a nangdadael iti kagimongan ken ti panagay-ayam.
Ngem kas indibidual, saan a masapul a sumukotayo iti dayta a dinedemonio nga espiritu. Mabalintay, babaen iti panangiyaplikar kadagiti prinsipio iti Biblia, nga “uksoben” ti daan a personalidad agraman dagiti dakes nga ar-aramidna, agraman dagiti naranggas a kababalin, ket ikawestayo “ti baro a personalidad,” a mangpataud iti natalna a bunga.—Colosas 3:9, 10; Galacia 5:22, 23.
Ngem, addanto kadi panagpatingga ti kinaranggas ken ti panagdroga iti panagay-ayam? Pudno nga adda! Kaano? Inton ti kinaranggas ken ti panangabuso ti droga iti kagimongan agpatinggan. Ti agdama nga irarang-ay ti kinadakes ipamatmatna nga asidegen ti tiempo!—Salmo 92:7.