Karera a Panagkanta a Mangyeg Napaut a Ragsak

NASAPA pay iti panagbiagko, indedikarkon ti bagik maipaay iti karera a panagkanta. Kabayatanna naipasdekko ti pakasarsaritaan a kas maysa a kumakanta iti fado idiay Lisbon. Daytoy naisangsangayan, makapailiw a kita ti musika iti Portugal. Di nagbayag agkankantaakon kadagiti dadduma a siudad iti Portugal agraman kadagiti kangrunaan nga estasion iti radio iti pagilian, ti Emissora Nacional.

Kalpasanna ti direktorko nangurnos iti maysa a panagpasiar idiay España, isu a nangiraman kadagiti siudad ti Madrid, Barcelona, Zaragoza, ken Bilbao. Kalpasan ti panagkantak idiay Francia, binusbosko ti nasurok a dua a tawen idiay Angola, Africa. Sadiay nagkantaak iti agsasaruno a siudad, ket idi 1972, napiliak a kas “Reina iti Fado.”

Nupay kasta, agsipud ta sopranoak, ti klasikal a musika ti pudno a paginteresak. Gapuna idi nagsubliak idiay Lisbon, rinugiak ti panagadalko iti kastoy a kita ti musika. Kaskasdi, nupay no naipamaysaak iti karerak a panagkankanta, pudno a saanak a naragsak. Iti unegko adda ti kinakawaw iti naespirituan. Tarigagayak ti kinasinged iti Dios, ngem diak ammo no kasano ti umadani kenkuana.

Idi 1973 addaak idiay Brazil iti panagpasiar nga agkanta. Maysa a rabii, kalpasan ti panagpabuya iti TV, dakami a nagpabuya ti naawis iti maysa a coctail party. Di nagbayag ti direktorko a taga Brazil dinawatna ti panangiyebkasmi ti kapanunotanmi maipapan iti nariribuk a kasasaad ti kagimongan ken dagiti paspasamak iti lubong. Naawisak iti napasnek ken addaan panagtalek a panangisingasingna a ti Dios mabalin nga addaan iti sungbat a napateg nga usigentayo. Impakaammok a patiek ti Dios. Sakbay a mapalabas ti rabii, siaanus nga intukonna kaniak ti libro a napauluan iti Ti Kinapudno a Mangiturong iti Biag nga Awan Inggana. Iti laeng kamaudiananna a nabigbigko nga isut’ maysa a Saksi ni Jehova.

Ti Naudi a Rekordko

Di nagbayag kalpasanna, nagawidak idiay Portugal tapno aramidek ti maikatlo a rekordko, a naan-anay ti panggepko nga agsubli idiay tapno ituloyko ti panagpasiarko. Ket diak idi nabigbig a daytoyen ti maudi a rekordko.

Idi addaak idiay Lisbon maysa nga agtutubo a babai ti simmarungkar iti pagtaengak ket rinugianna ti nagsao maipapan kadagiti bendision nga iyeg ti turay ti Pagarian ti Dios ditoy daga. Dimngegak a naimbag bayat ti panangbasana manipud iti Biblia kadagiti nakaay-ayat ken maawat unay a panagbalbaliw nga inkari ti Dios kadagidiay agtarigagay iti kinalinteg.

Ti mangmangegak dakkel ti epektona kaniak. Tartarigagayak dagiti kasasaad a desdeskribirenna manipud Biblia. Makaliwliwa kaniak agsipud ta nupay ubingak pay laeng, naidiborsioakon, ti asawak ket nakitray iti sabali a babai.

Agaasenyot’ siddaawko idi iti sumaganad nga aldaw intukon daytoy a babai ti isu met laeng a libro nga inawatko idiay Brazil! Ti simmaruno a panagsasarita ti dagus a nangipabigbig kaniak nga adda pay napatpateg iti biag ngem ti kinatan-ok wenno kinabaknang. Determinadoak a makaammo iti ad-adu pay maipapan itoy a nakaskasdaaw a karkari a masarakan idiay Biblia.

Dakkel a Desision

Nakaay-ayat unay a kapadasan ti linawas a panagadalko iti Biblia. Dagus a pinataudko ti nasinged a personal a relasion iti Namarsuak, ni Jehova a Dios.

Tapno masiguradok, addada dagiti narigat a kanito kalpasan ti panangdesisionko a mangidian iti adut’ masapulanna a karerak kas maysa a propesional a kumakanta. Adu a panangpilit ti naipaay kaniak nga agsubli idiay Brazil. Idin naitukon kaniak ti maysa a kontrata nga agkanta idiay Porto iti makin-amianan a Portugal. Ti kapanunotan ket babaen ti ipapanawko idiay Lisbon, mabalin a balbaliwak ti panunotko ket itultuloyko ti karerak a panagkanta.

Nupay kasta, naaramiden ti pangngeddengko. Inkeddengko ti mapan idiay Francia a makikabbalay iti naasawaan a kabsatko a babai tapno naan-anay a mawayawayaanak manipud kadagiti panangikagumaan a mangawis kaniak nga agsubli iti lubong ti pananglinglingay. Ngem nagbanag nga, isu ken ti asawana ket busorenda a naimbag iti kabbaro a pammatik. Didak pay palubosan a maaddaan iti linawas a panagadalko iti Biblia iti pagtaenganda. Awan panagbuteng, nagbiaheak iti 30 kilometros nga agpapan-agawid tapno diak malabsan ti panagadalko. Kamaudiananna, dinawatdan ti ipapanawko iti pagtaenganda.

Gaput’ agsolsoloakon, nakasarakak iti pagtrabahuan iti maysa a nabaknang a babai. Isut’ agpalplano iti tallo a bulan a bakasion iti pribado nga islana iti Grecia, ket naawisak a mangkuyog kenkuana. Ngem nakitak dagiti mabalin a peggad iti pannakaisinak iti ili ni Jehova, gapuna inkeddengko ti saan a kumuyog.

Imbes ketdi, iti dayta a kalgaw nagatenderak iti sesion a Portuguese iti 1974 a pandistrito a kumbension dagiti Saksi ni Jehova idiay Toulouse, Francia. Nasurok a 12,000 ti adda sadiay. Sadiay, nabautisaranak kas simbolo iti dedikasionko ken Jehova a Dios. Dayta ti umuna a kumbensionko, ket makapainteres, dayta ti naudi a kumbension nga inatenderan dagiti Portuguese iti sabali a pagilian gapu ta naparitan dagiti dadakkel a kumbensionda idiay Portugal. Kalpasan dayta a tawen napalubosanda a maaddaan kadagiti kumbensionda idiay Portugal.

Baro a Karera

Dagiti panagsagsagana iti kumbension a nakabulan idiay Toulouse dakkel ti epektona kaniak. Anian a naisangsangayan a pribilehio ti mangtagiragsak iti inaldaw a pannakilangen kadagiti natibker a Kristiano a kakabsat a lallaki ken babbai a nangsalimetmet iti kinatarnawda bayat dagiti adu a tawtawen iti kinadiktador ni Salazar idiay Portugal!

Ti resulta iti nasinged a pannakilangen kadagidiay adda iti amin-tiempo a ministerio pinataudna ti nabileg a tarigagay nga agbalin nga amin-tiempo a ministro a kas kadakuada. Gapuna, innem a bulan kalpasan a nabautisaranak, rinugiak dayta a ministerio idiay Portugal. Di nagbayag kalpasanna, naawisak nga agserbi iti naisangsangayan a destino. Ket siasino ti kaduak? Ni Maria Eulalia da Luz, ti met laeng Saksi a nangitukon kaniak iti libro a Kinapudno idiay Lisbon!

Teritoria a Rebolusionario

Ti makinabagatan a Portugal ti umuna a destinomi. Daytoy ket maysa a lugar nga inturayan ti Partido Komunista kalpasan ti rebolusion idi 1974. Maysa a naganat nga espiritu ti nakastrek kadagiti babassit nga ili a pangaskasabaanmi idiay Probinsia ti Baixo Alentejo. Di nagbayag dakamin ti puntiria ti nakaro a panangbusor.

Iti panangikagumaan a mangupay kadakami, masansan a dagiti lallaki batuenda ti ab-abanganmi a balay, a nagbanag iti dikam pannakaturog iti rabii. Sumaganad, bimtak ti maysa a bomba, a nangdadael iti panulbekan ti kangrunaan a ruangan. Di nakapapati, maysa a lalaki a nangbusor iti trabahomi ti nangipaabang kadakami iti nasaysayaat a balay, ta mabigbigna a napeggad para kadakami ti maiputputong. Maysa nga aldaw kimmatok dagiti bumusbusor iti makinsango a ruangan idi awankami. Agaasenyo ti siddaawmi idi nagsublikami a nasarakanmi ti baro a pagab-abanganmi a mangguguardia iti balay! Nagyamankami ken Jehova maipaay iti pannalaknibna.—Salmo 145:18, 19.

Nupay no adda ti pannakabusor, napaneknekan a nabunga ti trabahomi. Idi pimmanawkamin iti lugar, maragsakankamin a makakita kadagiti dua a baro a kongregasion dagiti Saksi ni Jehova a naporma, a tunggal maysa addaan iti nagpintas a Kingdom Hall.

Pudno a Karit

Idi 1977 nasukatan ti destinomi a nagbalin a Madeira Islands. Nupay no napintas ti mabuya ditoy a kasla tropikal a daga, nasarakanmi ti bagbagimi a mangsaranget kadagiti kabambantayan a makabannog iti pisikal.

Ditoy a destino makasabsabetkamin kadagiti tattao a pudno a kasungani ti napalabas. Ti debosionda iti relihion ket naisentro kadagiti “sasanto.” Nakaro ti kinakuneng, ken ti panagan-anito ti nabileg nga impluensia iti biag dagiti tattao. Pudno a makitkitami dagiti epekto ti naespirituan a “nadagsen nga awit” nga impabaklay dagiti ulbod a papangulo ti relihion kadagiti tattao. Daytoy ti nangpataud iti nabileg a pakatignayanmi a mangipaay iti naespirituan a pakabang-aran, iti aniaman a pamay-an, kadagidiay “nabannogan ken madagdagsenan” a kararua.—Mateo 11:28, 29; 23:4.

Masansan a mangngegmi dagiti tattao nga agkuna a gapu ta Katolikoda, didan kasapulan ti aniaman kadakami. Imtuodek no ikarkararagda pay laeng ti nakasaysayaat a kararag nga “Amami.” No sumungbatda ti wen, dakamatek a tartarigagayantay a maaramid koma ti pagayatan ti Dios ditoy daga, yantangay ti tao bassit laeng ti maar-aramidanna a naimbag kadagitoy nga al-aldaw. No umanamongda, imtuodek no pampanunotenda no ania ti pagayatan ti Dios para kadatayo. Masansan, daytoy a pamay-an ti makagun-od iti dumngeg a lapayag, ken ti nainggayyeman a panagsasarita.

Maysa nga aldaw makisarsaritaak iti maysa a babai a nangipakita iti interes iti mensahe ti Pagarian idi kellaat a nakigtotak iti bimtak a labintador iti aglawlawko. Ti lalaki a mangraraut kaniak isut’ napudot’ panagul-ulona nga anak a lalaki ti interesado a babai. Sipupungtot, imbarsakna ti libro kaniak, a nangtiro kadagiti sakak. Babaen iti panangiwasiwasna iti kompay a nausar iti panagpukan iti saba, butbutngennak a papatayennak, nga intag-ayna ti kompay iti ulok. Kellaat, manipud iti kasabaan, rimmuar ti sabali a lalaki, ti kakaisuna a tao a raemenna ken pagbutnganna. Pimmukkaw a buyogen iti timek nga addaan autoridad: “Aniat’ ar-aramidem?” ket linapdanna ti agmauyong a lalaki a mangatake kaniak.

Iti dua a sabali pay nga okasion iti daytoy a destinok, nagpeggad ti biagko, ket iti tunggal maysa nakitak ti salaknib ni Jehova kaniak. (Salmo 68:19, 20) Kinapudnona, daytoy a teritoria napaneknekan nga addaan panangawat iti naimbag a damag maipapan iti Pagarian ti Dios, ket idi pimmanawkami, ad-adu pay ti umat-atender kadagiti gimgimongmi.

Iti sabali pay a lugar idiay Madeira Islands, rinugiak ti nangiyadal iti Biblia iti maysa a babai a ti asawana di nasayaat ti pannakilangenna kadakami. Ngem isut’ mangraem iti kasta unay iti Biblia. Isut’ panadero nga agtartrabaho iti rabii, ket dikam pagaammo, no mariingen, allingagenna ti linawas a panagadalmi. Kimmaro ti interesna iti tunggal panagadal, ngem isut’ mariribuk maipapan iti Jehova a nagan ti Dios.

Inkeddengna nga usigen daytoy a banag a mismo iti bukodna a Biblia ngem dina masarakan dayta iti Bibliana. Kayatna a maammuan ti kinapudno maipapan iti nagan ti Dios ket sigagagar a mangsapul iti “daan, pudno a Biblia[na] tapno marisot dagiti bambanag. Di nagbayag, bayat iti naan-anay a panagdalus iti panaderia, nasarakanen ti napateg a Bibliana. Sigagagar sinukimatna dagiti sumagmamano a reperensia, ket adda sadiay. Awan biddut, ti personal a nagan ti Dios ket pudno a Jehova! (Salmo 83:18) Iti ababa a tiempo, nangaramid iti naisangsangayan nga irarang-ay ket nabautisaran. Itatta isut’ agserserbin a simamatalek iti kongregasion.

Kaudian a Destino

Ita agdama, agserserbiak idiay makin-amianan a Portugal iti siudad ti Braga. Iti adu a tawtawen daytoy ket maysa a sentro a relihiuso nga addaan iti nalatak a templo a Katoliko ken unibersidad. Ngem siasino ti nangpanunot nga iti maysa nga aldaw dumtengto ti tiempo nga adu a simsimbaan ti makasarak a bumasbassit dagiti miembroda? Ket, mapaspasamak daytoyen.

Makasabsabettayo kadagiti adu a tattao a mamati iti ebolusion ken pudno nga agkunkuna nga agnostiko. Ti publikasion a Life—How Did It Get Here? By Evolution or by Creation? nga addaan kadagiti kinapudno a mangsuportar iti panamarsua ket maysa a nabileg nga instrumento a “mangbaliktad kadagiti panagrason ken natatan-ok a bambanag a naibangon a maibusor iti pannakaammo iti Dios.”—2 Corinto 10:5.

Ti Kasayaatan a Karera

No subliantay ti napalabas a 15 a tawen, diak agduadua a pinilik ti kasayaatan a karera, ti panangusarko iti timekko saan a maipaay a mangliwliwa no di ket maipaay iti pannakisarita kadagiti dadduma maipapan kadagiti nakaskasdaaw a karkari ti Dios. Ti nabara nga imbitasion a mangusar iti timek ti maysa a mangiwaragawag ti “naimbag a damag” agtaud ken Jehova a mismo ket silulukat kadagiti amin nga umawat iti dayta.—Mateo 24:14; Roma 10:13-15.

Anian a naindaklan a gundaway a naited kadatayo tapno padasen a danonen ti puspuso dagidiay a mabambanogan ken madagdagsenan, a paregtaen ida nga ‘umay ket uminum ti danum ti biag nga awan baybayadna’! (Apocalipsis 22:17) Ti mensahe a mismo manipud iti Sao ti Dios ti mangtignay iti puspuso dagiti napakumbaba a tattao. Ti kaduak iti amin-tiempo a ministerio ken siak mariknami a dakkel ti pribilehiomi a mangitultuloy a mangusar kadagiti timtimekmi, saan a maipaay iti kinatan-ok wenno kinabaknang, no di ket iti panangidayaw iti Dios ken mangiyeg iti agnanayon a bendision kadagiti dadduma.

Mariknak a ti karerak a “panagkanta” itatta ket natantan-ok ngem ti immuna a karerak a panagkanta, ta ar-aramidek ti kinuna ti salmista: “Kantaanyo ni Jehova, bendituenyo ti naganna. Iparangarangyo ti panangisalakanna nga inaldaw-aldaw.” (Salmo 96:2)—Kas insalaysay ni Madalena Ferraz Martins.

[Ladawan iti panid 24]

Ni Madalena Ferraz Martins ken ti kaduana iti amin-tiempo a ministerio, ni Maria Eulalia da Luz (kannigid)