Nagrag-oda Idiay Makindaya nga Europa
ITOY napan a kalgaw pinullo a ribo a tattao ti naguummong kadagiti kangrunaan a siudad ti Makindaya nga Europa. Nareprep dagiti kalye ti makaay-ayo a Budapest, Prague, Zagreb, ken ti nasurok a 20 a dadduma pay a siudad kadagiti tao a nakasuot iti asul ken puraw a badge. Daytat’ pakabigbiganda kas managayat iti nadiosan a wayawaya a tumabtabuno kadagiti kumbension dagiti Saksi ni Jehova.
Iti kaunaan a gundaway, siwayawaya a naangay dagiti kumbension kadagiti Europeo a republika ti Union Soviet, kasta met idiay adayo a Siberia ken ti Soviet Asiano a republika ti Kazakhstan. No pagtitiponen, nasurok a 370,000 a delegado ti nangtagiragsak iti nabara a panagtataripnong idiay Czechoslovakia, Hungary, Yugoslavia, Poland, Romania, ken ti Union Soviet.
Kadagiti di nakatabuno, nalabit a narigat a panunoten ti ragsakda idi 74,252 ti naguummong idiay tapno agdayaw ken Jehova a Dios a sipapanayag ken awan panagamak. Kaskasdi, ti napalaos a rag-oda dina lab-awan ti ragsak ti 74,587 idiay Prague ken 40,601 idiay Budapest a nagtitipon kadagiti kadakkelan nga estadium idiay Czechoslovakia ken Hungary, wenno ti 14,684 a nagtataripnong idiay Zagreb, Yugoslavia.
Nakaskasdaaw daytoy ta iti dua laeng a tawen a nasaksakbay, naparitan dagiti Saksi ni Jehova iti kaaduan a pagilian idiay Makindaya nga Europa. Naisinada iti Makinlaud bayat ti Cold War. Uray ti panagtaripnong kadagiti babassit a grupo ket maiparit. Di ngad pakasdaawan a kasta unay ti panagrag-oda iti gundawayda a makapagtataripnong a siwayawaya kadagiti dadakkel a kumbension!
Maysa a 59-años a Saksi a Czech, a naibalud iti walo a bulan nga agsolsolo agarup 40 a tawen ti napalabasen gapu iti pammatina iti Dios, kinunana: “Adu kadakami a nagnaed sadi Prague ti nagarapaap iti dakkel a kumbension a mabalin a maiyurnos iti daytoy nga estadium, ngem dimi pulos patien a matungpal daytoy nga arapaap iti kasta a nakaskasdaaw a pamay-an.”
Dua a lawas sakbay ti kumbension idiay Prague, Agosto 9 agingga iti 11, maysa a pagiwarnak ti siudad, ti Večerník Praha, kinunana: “Napabasol iti panangliput ken panangriribuk iti sosialismo, napupok dagiti Saksi ni Jehova kadagiti pagbaludan a Komunista iti adu a tawtawen.” Kalpasan nga inlawlawagna nga iti di agbayag mangsangaili ti siudad iti pinullo a ribo a Saksi, kinuna ti artikulo kas pangserra: “Awanen ti sabali pay a tiempo a pakakitaanyo iti nagadu a nasisingpet ken naisem a tattao ditoy Prague no di laeng iti maikadua a ngudo ti lawas ti Agosto.”
Nupay kasta, mabalin nga imtuodenyo: ‘Naidadanes kadi dagiti Saksi ni Jehova idi gapu iti nainkalintegan a rason? Nagserbida aya a pangta kadagiti napolitikaan nga agtuturay kadagiti pagilian a nagnaedanda? Naggapuan ti ginasgasut a ribo a delegado ti kumbension idiay Makindaya nga Europa? Naparitan ken naiputong iti 40 wenno ad-adu pay a tawtawen manipud iti nawaya a pannakipulapol iti Makinlaud a lubong, kasano a rimmang-ayda iti kasta a nagdakkelan a bilang?’