Manipud Managbasatayo

Panangpadakkel iti Annak Kas maysa a mannursuro iti elementaria, inapresiarko unay dagiti artikulo maipapan iti “Dagiti Annakyo​—Panangaramid ti Kasayaatan Agpaay Kadakuada.” (Setiembre 22, 1992) Ti pannakilangen kadagiti ubbing a dagiti nagannakdat’ awanan umdas a panawen kadakuada, ti maysa kadagiti kangrunaan a karit a sangsanguen ita dagiti mannursuro. Iti nabiit pay a tinawen a Parents’ Night idiay eskuelaanmi, inranudko ti dadduma kadagiti impormasion manipud iti artikulo. Naamiris dagiti nagannak a ti panagsasaritami ket makagunggona ken makatukay-panunot.

M. P., Estados Unidos

Nagsayaat unay ti nagapuananyo. Dagiti artikulo ti kasayaatan pay laeng kadagiti nabasak. Saanyo laeng nga impaawat dagiti parikut no di ket inlawlawagyo met dagiti solusion.

M. R., Alemania

Nagsayaat ti pannakaisurat dagiti artikulo, malaksid laeng iti nabatad a panangdakamatyo iti panangabuso kadagiti ubbing. Naklaatak iti dayta.

F. M., Canada

Pudno a nakaal-alinggaget a basaen dagiti panangabuso dagiti nataengan kadagiti inosente, awan gawgawayda nga ubbing. Ket bayat a maawatanmi a masarakan dagiti dadduma a ti panangbasa kadagita ket makasair, nasken a mapakaammuan dagiti nagannak maipapan kadagiti peggad a sangsanguen ita dagiti ubbing. (Idiligyo ti 2 Corinto 2:11.) Gapuna, nabigbigmi a rumbeng ti agbalin nga espisipiko kadagita a banag, a no mabalin, aramidenmi dayta iti makaay-ayo a pamay-an.​—ED.

Dagiti Prom Naamirisko a ti artikulo nga “Agimtuod Dagiti Agtutubo . . . Mapanak Aya Umatender iti Prom?” (Marso 8, 1993) ket makaisuro ken makagunggona. Nupay kasta, parparegtaenyo kadi dagiti Kristiano a mangangay iti dadakkel, pormal a panagtataripnong?

N. P., Estados Unidos

Saan nga iparparegta ti artikulo ti panangiyurnos iti dadakkel a sosial a pasken. Impaawatmi laeng a ti panagraduar iti high school ket maysa a naisangsangayan nga okasion. Mabalin ngarud a pilien ti dadduma a Kristiano nga agtutubo ken dagiti nagannakda nga iranud iti sabsabali ti rag-oda iti daytoy nga okasion. Naipaay ti pammaregta a taginayonen ti aniaman a sosial a panagtitipon iti ‘kalalainganna, maaywanan a grupo, ken nasayaat ti pannakaiyurnosna.’​—Kitaenyo “Ti Pagwanawanan” nga Agosto 15, 1992.​—ED.

Lana ti Olibo Pagyamanan iti nagsayaat nga artikulo a ti “Ti Adut’ Usarna a Lana ti Olibo” iti Oktubre 8, 1992 nga isyu. Agtartrabahoak iti maysa nga ospital kas maysa a dietician, ket mangbalbalakadak maipapan kadagiti taraon a bassit ti taba ken nababa ti kolesterolda. Umiso unay daytoy nga artikulo ken makatulong iti panangisurok.

D. S., Estados Unidos

Panagtabbaaw Ti nganngani 15 ti tawennan a balasangko ket nagawid manipud eskuelaan ket kinunana a mariribukan gapu ta kanayon nga agsao iti dakes ti kaaduan kadagiti kaeskuelaanna. Kayatna a maammuan no ania a talaga ti dakes iti panangusar iti panagsapata iti inaldaw a panagsao. Inkagumaanmi nga inlawlawag ngem nariknami a di umdas ti naaramidanmi. Idi kinitak ti Disiembre 8, 1992 a ruar ti Agriingkayo! iti dayta a rabii, nasdaawak unay a nakakita iti artikulo a “Ti Panangmatmat ti Biblia​—No Apay a ti Panagtabbaaw Saan nga Agpaay Kadagiti Kristiano.” Dagus nga innalak dayta idiay siled ti balasangko ket binasami a dua. Nariknana nga adda turednan a mangilawlawag iti mangimtuod ti gapu ti saanna a panagsapata.

P. P., Inglatera

Baro a Lubong Dagiti serie ti “Maysa a Baro a Lubong a Mangpennek Kadagiti Amin” (Oktubre 22, 1992) ti maysa kadagiti kasayaatan maipapan iti daytoy a suheto [a naipablaaken] iti kallabes a tawen. Kasta unay ti panangapresiarko kadagiti naisitar a kasuratan ken dagiti nagpintas nga ilustrasion. Patiek nga adu a managbasa ti mangapresiarto met iti dayta.

I. Z., Italia