Manipud Managbasatayo

Bagyo nga Andrew Anian a nagsayaat nga artikulo! (“Bambanag a Saan a Madadael ti Bagyo nga Andrew,” Enero 8, 1993) Gapu ta naaddaanak iti pribilehio a makiraman iti panangtulong, tinagiragsakko a nangnangruna dagiti nasao dagiti lokal a residente. Dagiti pito nga aldaw a binusbosko sadiay ti nangpabileg iti panagtalekko ken Jehova ken pinaregtanak nga ad-adda nga ayaten dagiti kakabsatko a Kristiano.

M. J., Estados Unidos

Panangidadanes Dagiti Nazi Pagyamanan iti artikulo a “Panangsalimetmet ti Kinatarnaw Idiay Nazi nga Alemania.” (Pebrero 8, 1993) Adu unay a suot ti linak-am dagiti kakabsattayo a Kristiano, ngem nagtalinaedda a matalek! No agsagabaakto iti nakaro a pakasuotan, sapay koma ta maaddaanak iti bileg ken kinatured ni Josef Rehwald ken ti pamiliana.

D. J., Estados Unidos

Nabasak ita ti pakasaritaan ti biag ni Josef Rehwald. Makaluaak a mangpampanunot no kasano a tinulongan ni Jehova dagiti adipenna kadagiti panawen ti rigat. Matignayak nga agyaman Kenkuana!

V. M., Italia

Panaglinglingay Dagiti artikulo ti “Kasano nga Apektaran ti Panaglinglingay ti Biagyo?” (Nobiembre 8, 1992) ket naintiempuan unay. Nangnangruna nga apresiarek ti impormasion maipapan kadagiti pelikula. Agtartrabahoak iti tiendaan a pagabangan iti video, ket ti pelikula a Basic Instinct a dinakamatyo iti artikuloyo ket maysa kadagiti kaaduan ti pannakaabangna iti dayta a tiendaan. Diak maawatan no kasano a nagbalin a dakkel a panguartaan dagita a naalas a pelikula!

D. M., Estados Unidos

Moderno nga Arte Ti panangbasa iti paset a ti “Moderno nga Arte Dina Nalasatan ti Panangsubok” (“Panangmatmat iti Lubong,” Nobiembre 8, 1992), ipasimudaagna nga awan serserbi dagiti pintura nga acrylic. Ngem saan a kasta. Kinapudnona, ad-adut’ pagsayaatanda ngem iti dadduma a kita ti pintura. Kas pangarigan, saanda nga agkupas. Kasta pay met a kasayaatan a kita ti acrylic ti nausar kadagiti mailaklako a naipinta a lamina. Ti panagkulatlat ti resulta ti di umiso a pannakaipinta ti acrylic, nalabit iti narugit wenno nagalis a banag. Mabalin a kastoy ti inaramid dagiti pintor a nadakamat.

J. W., Switzerland

Apresiarenmi daytoy a panangilawlawag.​—ED.

Nasukir nga Annak Pagyamanan iti artikulo a napauluan “Agimtuod Dagiti Agtutubo . . . Agbalinakto Aya a Kas ken Manongko?” (Disiembre 22, 1992) Apresiarek unay dayta. Payunir [amin-tiempo a managebanghelio] idi ni manangko, ket nasingedkam a dua. Kalatko met idi ti agpayunir, ngem kimmupas dayta a kalat. Uppat a bulan kalpasan a nabautisaranak kas maysa kadagiti Saksi ni Jehova, isut’ nailaksid [naparuar] manipud iti kongregasion. Narigat daytoy para kaniak, nangruna no damagen dagiti gagayyem ti maipapan kenkuana. Isut’ diak maipagpannakkelen. Impabigbig kaniak ti artikulo a mabalinko (ken ikagumaak) ti agbalin a naiduma!

L. S., Estados Unidos

Narigat idi ti tiempo kaniak idi nailaksid ni manongko. Ngem, diak timmulad kenkuana. Naggraduarakon iti high school ken kabaelakon ti agpayunir. Tumultulongak metten iti pannakaibangon dagiti Kingdom Hall dagiti Saksi ni Jehova. Kayatko ti agbalin a nagaget ken ikagumaan nga aramiden ti naimbag.

K. M., Japan

Dua a manongko ti nailaksid. No dadduma, maam-amakak nga agpabautisar gapu ta nalabit agbalinakto met a kas kadakuada. Sinungbatan ni Jehova dagiti kararagko babaen daytoy nga artikulo. Idi Enero, nabautisaranakon. Isu a nabaelak nga iparangarang iti publiko nga indedikarkon ti bagik ken Jehova, ken agannadak a diak makaaramid kadagiti kamali a kas kada manongko.

R. C., Italia