Ti Nakapimpintas a “Whooper Swan”
Babaen ti koresponsal ti Agriingkayo! idiay Britania
TI DANUM ti Danaw Grindon—nga adda iti nagtetengngaan ti agsalog a katurturodan ti Northumbria, saan nga adayo iti beddeng iti nagbaetan ti Inglaterra ken Scotland—iparangarangda dagiti lumabaga a kape ken nasudi a kape a kolor ti aglawlaw ti nasaknapan ti pakó a katurturodan. Bayat ti panagbuybuyak, kankanen dagiti ganso a greylag dagiti uggot ti ruruot iti danum a kadua dagiti arban dagiti snipe, lapwing, ken golden plover.
Pagam-ammuan, bayat a nagin-inut a napukaw ti angep, adda nangngegko a napigsa nga uni. Daytat’ nakapigpigsa a kanta dagiti whooper swan nga agtaytayab a nakababbaba kadagiti katurodan. Dagitoy ti ladawan iti kinapintas bayat ti panagalindayagda nga agdisso iti danum a nakaukrad dagiti payakda iti 2.5 metro. Iti agtengnga ti Oktubre tumayab nga agpaabagatan dagitoy a swan manipud Russia, Iceland, ken iti makin-amianan nga Europa no agbalinen a yelo dagiti danum iti amianan. Ditoy makasarakda iti taraon—mulmula ti danum, babassit a kappo, bukbukel, ken dagiti insekto.
Dagiti 29 a swan iti danaw, iti sangok nangiparangda iti nagpintas a ladawan bayat a pinagtalinaedko ti larga-bistak iti trianggulo a duyaw a batek iti puon ti sippitda. Nakapimpintasda no nakatingra ti tengnged ken uloda.
Idi naminsan umad-adu ti whooper idiay Britania ngem napukawen [dayta] ditoy idi maika-18 a siglo. Agingga ita dida pay nagsubli. Iti tiempo ti panagpessa dagiti whooper ket nauyong unay a billit, a sirurungsot a salaknibanda ti umokda nga addaan lima agingga iti pito nga itlog, ken kalpasanna dagiti urbon a swan, manipud kadagiti tumaud a kabusorda.
Agpadpada nga agtrabaho dagiti nagannak a whooper a mangsangal iti umok a naputputed a ruting, iti maysa nga isla wenno iti danum a mismo a sadiay mangibangonda iti tumtumpaw nga isla a kalalainganna ti kalagdana a maimetna ti maysa a tao. Sadiay a maukopan dagiti dumuyaw nga itlog iti las-ud ti 35 agingga iti 42 nga aldaw. Agpada met dagiti nagannak a mangaywan kadagiti urbon sakbay a tumayab dagiti annakda kalpasan ti agarup sangapulo a lawas.
Bayat a lumlumnek idi ti init a nakadaydayag ti kinalabagana iti likudan ti Romano a sarikedked a Vercovicium, a pampanunotek ti danaw ken dagiti adda iti dayta a swan a nakusnaw a rosa ti kolorda, nagsarimadengak a mangpanunot iti kinapintas ti biag ken ti pagsidsiddaawan iti kasta a nakatantan-ok a parsua.