Dagiti Misionero​—Ania Koma ti Pagbalinanda?

MAKATUKAY unay iti rikna ti sao a “misionero.” Iti dadduma a tattao, tignayen dayta ti panagdayaw, nga ipalagipna dagiti indibidual a kas kada Mother Teresa wenno ti pimmusayen a ni Albert Schweitzer.

Maisupadi iti dayta, mangidumduma, marurod, wenno makaunget pay dagiti dadduma no mapagsasaritaan ti maipapan kadagiti misionero. Kadakuada, isingasing ti sao ti panangbalbaliw iti isip ken ipalagipna ti kolonialismo.

No maipapan kadagiti misionero, ti maitutop a saludsod ket, Nagbalinda kadi nga ahente ti lawag wenno ahente ti sipnget?

Ania ti Misionero?

Ti misionero ket madepinar a kas “tao a mangibanag iti mision,” kayatna a sawen, mangibanag iti “maysa a ministerio nga intuding ti maysa nga organisasion ti relihion tapno isaknapna ti pammatina wenno ibanagna ti trabaho a panangtulong iti tao.”

Impaay ni Jesu-Kristo ti pakaibatayan ti Nakristianuan a trabaho a kinamisionero idi imbagana kadagiti pasurotna: “Inkayo ngarud ket mangaramidkayo kadagiti adalan a tattao iti isuamin a nasnasion.” Daytoy sapulenna ti pannakaikasaba ti Nakristianuan a mensahe iti intero a lubong.​—Mateo 28:19.

Ni Jesus a mismo ket maysa a misionero, nga imbaon ni Amana, ni Jehova, manipud langit a napan iti ganggannaet a destino, ti daga. (Filipos 2:5-8) Nainkalintegan, ti maysa a Kristiano a misionero rumbeng a surotenna a sisisinged ti ulidan nga impasdek ni Jesu-Kristo. Maysa a misionero idi umuna a siglo a nangaramid a mismo iti dayta isu ni apostol Pablo, a nagbalin a maysa a paguadan a tuladen dagiti sumaruno a Kristiano a misionero.​—1 Corinto 11:1.

Nupay makipagrikna kadagiti parikut ti kagimongan a mangsapsaplit iti sangatauan, saan nga impangpangruna ni Jesus ti panangsolbar kadakuada idi adda ditoy daga. No inaramidna dayta mabalin a ti kasayaatan nga inyeg dayta isu laeng ti temporario a pannakabang-ar. (Juan 6:26, 27; 12:8) Adda pay napatpateg a banag. “Maigapu itoy a naiyanakak, ken maigapu itoy nga immayak iti lubong,” imbaga ni Jesus ken Pilato, “tapno saksiak ti kinapudno.” Rumbeng a maipaganetget ti kinapateg ti maaddaan iti kasta a pannakaammo iti kinapudno, kas kinuna ni Jesus a nasaksakbay iti kararagna: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.”​—Juan 17:3; Juan 18:37.

Sinurot kadi a naimbag dagiti misionero ti Kakristianuan ti ulidan nga impasdek ni Jesus? Napaneknekanda kadi nga ahente ti lawag a kas kenkuana, nga imparangarangda ti lawag ti Sao ti Dios, ti pannakaammo a mangiturong iti agnanayon a biag? Wenno binaybay-anda dagiti tattao iti kasipngetan? Makapainteres koma kadatay amin ti sungbat dagitoy a saludsod agsipud ta dagiti bunga a pinataud dagiti agkunkuna a Kristiano a misionero iti adun a siglo ti tumulong kadatayo a mangilasin iti pudno a relihion, agraman ti ulbod a relihion. Ngarud, ti Agriingkayo! maay-ayo a mangyanunsio a mangipaayto iti daytoy a tema ti nasaknap a panangsaklaw kadagiti sumaganad a lima a ruar.

Kasano a Timmulad Dagiti Misionero?

Adu a napateg a kontribusion ti inaramid dagiti misionero iti panangisaknap iti mensahe ni Kristo. Kas pagarigan, dadduma ti nangipatarus iti Biblia kadagiti lokal a pagsasao, isu a namagbalin a posible a mabasa a mismo dayta dagiti tattao.

Nupay kasta, itatta, agparang a marikna ti dadduma a misionero a masapul a maipangpangruna ti panangipaay kadagiti kasapulan ti kagimongan imbes a ti panangikagumaan a mangikasaba wenno mangipatarus. Kinuna ti maysa nga artikulo ti magasin a Time a napauluan “Ti Baro a Misionero”: “Kadagiti Protestante, padpadasen dagiti misionero a suroten ti panagbalbaliw iti ad-adda a pannakiraman kadagiti kangrunaan a parikut ti tattao iti ekonomia ken kagimongan.” Para kadagiti Katoliko, kinuna ti pangulo dagiti mision a Jesuita a naibaon a naggapu idiay Estados Unidos a ti panangiraman kadagiti Nakristianuan a pammati “basbassit ti pategna ngem ti panagserbi kadagiti tao.” Ket inkalintegan ti sekretario ti mision a Katoliko: “Idi napalabas, adda makuna a panggeptayo a mangisalakan kadagiti kararua. . . . Itan, gapu iti Dios, mamatitayo nga amin a tao ken amin a relihion agbibiagdan iti parabur ken ayat ti Dios ket maisalakanda babaen iti kaasi ti Dios.”

Kaipapanan kadi daytoy a din kasapulan ti aniaman a panangisuro iti Sao ti Dios kas inaramid ni Jesus?

Masapul Pay Kadi?

Idi 1985 agarup 18,000 a sangakabbalayan idiay Hamburg, Alemania, ti tineleponuan ti sumagmamano a gasut a boluntario iti awagan ti pagiwarnak a “kasaknapan a trabaho a panagmisionero babaen iti telepono.” Nalawag a bassit laeng ti imbungana. Idi napan a Disiembre, insurat ti The European: “Ti iglesia Protestante idiay Alemania . . . nakitana ti panagbaba dagiti tumabtabuno a nasurok a 500,000 nanipud idi 1991.”

Ti bumasbassit nga arban saan laeng a mapaspasamak kadagiti iglesia nga Aleman. Minilion a tattao iti sangalubongan ti nanglaksiden iti relihion, didan ibilang a mainaig pay dayta iti pudpudno a biag iti dekada ’90. Ngem nasken ti pannakaammo iti Kinakristiano tapno sibaballigi a masarangettayo ti kinasipnget ti lubong itatta ken tapno mataginayontayo babaen iti namnama ti nasaysayaat a lubong agpaay iti masanguanan. Ti bilin ni Jesus a mangaramid kadagiti adalan a tattao iti isuamin a nasnasion ket maysa a nainkalintegan a pamay-an a panangtungpal iti naganat a kasapulan.

Pinanggep ni Jesu-Kristo nga agbalin dagiti Kristiano a misionero nga ahente ti lawag, saan a dagiti ahente ti sipnget. Kasano a timmulad dagiti misionero ti Kakristianuan? Ania a pagtuladan ti sinurotda?

[Picture Credit Line iti panid 3]

Culver Pictures