Dagiti Misionero “Agingga iti Kaadaywan a Paset ti Daga”

Imbaga ni Jesus kadagiti adalanna: “Dakayonto dagiti saksik . . . agingga iti kaadaywan a paset ti daga.” (Aramid 1:8) Ita, nakaregregta dagiti Saksi ni Jehova a mangaramid iti dayta a bilin. Ngem adda pay dagiti saan a nakaskasabaan iti dadduma a paset ti daga, agraman dagiti dadakkel ti populasionna a lugar. Ken iti dadduma a nasion, manmano laeng dagiti Saksi. (Mateo 9:37, 38) Ania ti ar-aramidentayo tapno ad-adu pay a tattao ti makasabaantayo?

Tapno maaramidtayo ti imbilin ni Jesus, nang-assign ti Service Committee ti Bagi a Manarawidwid dagiti Saksi ni Jehova kadagiti field missionary kadagiti lugar iti intero a lubong nga agkasapulan kadagiti manangaskasaba. Iti agdama, adda 3,090 a field missionary iti intero a lubong.a Kaaduan kadakuada ket nasanay iti Bible school, kas iti School for Kingdom Evangelizers. Dagiti misionero ket sisasagana a mangpanaw iti lugarda ken maibaon iti sabali a nasion. Gapu ta nataenganda iti naespirituan, nasanay, ken adu ti kapadasan dagitoy a matalek a misionero, nakatulongda a mangisaknap iti naimbag a damag ken nakaipakitada iti nasayaat nga ulidan kadagiti baro nga adalan.

Natulongan Dagiti Misionero a Tumulong iti Dadduma

Iti tunggal sangay, ti Field Ministers Desk iti Service Department ket makitintinnulong iti Branch Committee tapno maaywanan ti salun-at dagiti misionero ken maipaay dagiti kasapulanda kas iti pagyanan. Adda met bassit nga allowance-da para iti dadduma pay a paggastuanda. Bayat ti 2020 a tawen serbisio, nakagastos dagiti Saksi ni Jehova iti dandani $27 milion (nasurok a ₱1.3 bilion) iti panangaywan kadagiti misionero. Gapu iti dayta, nakapagpokus ken nausar dagiti misionero ti pigsada iti ministerio ken napabilegda met dagiti kakabsat iti kongregasion.

Ania ti naitulong dagiti misionero iti trabaho a panangasaba? Imbaga ni Frank Madsen, nga agserserbi kas Branch Committee iti Malawi: “Gapu iti kinatured ken paglaingan dagiti misionero, natulongan dagiti kongregasion a mangasaba kadagiti narigat a teritoria, kas kadagiti guardiado nga apartment wenno subdibision ken kadagiti foreign-language a teritoria. Maparparegta met dagiti dadduma iti kinaanusda nga agsursuro iti lokal a lengguahe ken iti panag-adjust-da iti kultura. Matultulonganda met dagiti agtutubo a sumrek iti amin-tiempo a panagserbi. Agyamyamankami ken Jehova gapu kadagiti misionero.”

Imbaga ti maysa a miembro ti Branch Committee iti maysa a sangay: “Dagiti misionero ket pakakitaan nga agkaykaysa ti ili ni Jehova iti intero a lubong. Makitkita uray dagiti saan a Saksi nga agkaykaysatayo nga agkakabsat gapu kadagiti nasursurotayo iti Biblia uray agduduma ti kulturatayo.”

Kasano a natulongan dagiti misionero dagiti kakabsat iti kongregasion? Maap-apresiar ni Paulo, a taga-Timor-Leste dagiti misionero a nai-assign iti kongregasionda. Imbagana: “Nakapudpudot ditoy ayanmi ngem mangaskasaba latta dagiti misionero uray nairuamda iti nalamiis a lugar. Kanayon nga addada iti taripnong ti panangasaba iti agsapa. Uray timmingtingngaan ti aldaw ken nakapudpudot ken uray iti rabii, makitkitak isuda a mapan agsarungkar. Adu a tattao ti natulonganda nga umawat iti kinapudno, ket maysaak kadakuada. Nakaregregtada ken us-usarenda ti biagda nga agserbi ken Jehova. Isu a maparparegta ti intero a kongregasion nga ad-adda pay nga agserbi kenkuana.”

Inyestoria ni Ketti, maysa a regular pioneer idiay Malawi, no kasano a tinulongan ti agassawa a misionero ti pamiliana: “Idi nai-assign ti agassawa a misionero iti kongregasionmi, siak laeng ti Saksi iti pamiliami. Tinultulongandak ken nagbalinda a nadekket a gayyem ti pamiliami. Gapu iti nagsayaat nga ulidanda, nakita dagiti annakko a naragsak ti agserbi ken Jehova. Gapu iti panangparparegta dagiti misionero, agserserbi itan kas regular pioneer dagiti tallo a babbalasangko ken makigimgimong metten ni lakayko.”

Nangalaantayo iti pondo tapno maipaay dagiti kasapulan dagiti misionero? Nausar dagiti impaayyo a donasion para iti sangalubongan a trabaho a panangasaba babaen iti nadumaduma a pamay-an nga adda iti donate.jw.org. Pagyamanan iti kinaparaburyo.