Paskua—Ti Namunganayanna
BABAEN TI KORESPONSAL TI AGRIINGKAYO! IDIAY ITALIA
TALLO la nga aldaw sakbay ti Paskua ti 1993, binigbig ni Papa Juan Paulo II a saan a namunganay iti Biblia ti panangrambak iti Paskua. Maipapan iti petsa a Disiembre 25, inamin ti papa: “Iti dayta nga aldaw idi tiempo dagiti pagano, narambakan ti kasangay ti ‘Di Maparmek nga Init’ tapno maitunos iti kalam-ekna.” Kasano, ngarud, a nangrugi ti Paskua? Intuloy ti papa: “Kasla nainkalintegan ken natural kadagiti Kristiano a sukatán dayta a piesta iti rambak ti kakaisuna ken pudno nga Init, ni Jesu-Kristo.”
“Iti sabali a pannao,” insurat ti periodista a ni Nello Ajello iti La Repubblica, “adda nangideklara a naipasngay ni Jesus iti pinartuat ti panunot, parbo, palso a petsa.” Kaano a naaramid daytoy a parbo? Kinuna ti maysa a nairuar a padamag manipud Vatican: “Nagparang ti piesta ti Paskua iti umuna a gundaway idi 354 [K.P.].”
Ti ngay Enero 6, Epiphany, a manglagip iti iyaay idi dagiti Mago a mangsarungkar iti kappasngay a ni Jesus? “Adu nga ebidensia ti manggutugot kadatayo a mamati nga inimpluensiaan met ti pagano nga anibersario ti pannakapili ti Enero 6, kas iti Disiembre 25 agpaay iti Romano a piesta a mangrambak iti pannakaipasngay ni Jesus,” intuloy ti nairuar a padamag. “Kinapudnona, idiay Alexandria, idi rabii ti Enero 5 ken 6, nakairuaman idi dagiti pagano a rambakan ti kasangay ti dios nga Aeon (dios ti tiempo ken kinaagnanayon). . . . Kasla kayat idi ti Iglesia a pagbalinen a Kristiano daytoy a piesta.”
Pulos a di inautorisaran ni Jesus dagiti pasurotna nga ilaok ti pudno a panagdayaw kadagiti pagano a kustombre. Imbes ketdi, imbagana kadakuada nga isuroda “dagiti isu amin a bambanag nga imbilinko kadakayo.” (Mateo 28:19, 20) Kanayonanna, idi sinalangad dagiti panguluen ti relihion idi kaaldawanna, dinamag ida ni Jesus: “Apay a salungasingenyo ti bilin ti Dios gapu iti tradisionyo?” (Mateo 15:3, New International Version) Dayta met la a saludsod ti mabalin nga iyimtuod kadagiti agkunkuna a Kristiano a mangtagtaginayon kadagiti pagano a kustombre ita.