Manipud Managbasatayo
Panagulaw nga Agbiahe Agtawenak iti sangapulo ket kayatko ti agyaman kadakayo iti benneg a “Panagulaw nga Agbiahe” iti “Panangmatmat iti Lubong.” (Enero 22, 1996) Pinadasko dagiti singasing iti artikulo, ket nagkurrida! Pangngaasiyo ta itultuloyyo ti mangipablaak kadagiti kasta nga artikulo.
J. C. S., Brazil
Dandani nga Ipapatay Agsuratak maipanggep iti artikulo a “Nakasursuro Dagiti Doktor Manipud Dandani nga Ipapatayko.” (Disiembre 22, 1995) Saan kadi a maisagana ti erythropoietin babaen iti bassit a kantidad ti albumin, maysa a protina ti dara?
R. P., Estados Unidos
Iti dadduma a kasasaad, wen, ket masapul nga ikeddeng ti tunggal Kristiano no awatenna wenno saan dagiti panangagas a naglaon iti babassit a kantidad ti albumin. Agpaay iti detalyado a panangilawlawag, pangngaasiyo ta kitaenyo ti “Dagiti Saludsod Manipud Kadagiti Managbasa” iti Oktubre 1, 1994, ken Hunio 1, 1990, a ruar “Ti Pagwanawanan.”—ED.
Ginggined Nabasak ti artikulo a “Kellaat a Didigra Idiay Japan—No Kasano a Sinaranget Dagiti Tattao.” (Agosto 22, 1995) Kayatko a maammuan no apay nga impamaysayo dagiti panagreggetyo a mangsaranay kadagiti laeng Saksi? Ipagarup ti maysa a rumbeng koma nga ipakita dagiti Saksi ti ayat agpadpada kadagiti Saksi ken di-Saksi.
V. C. E., Nigeria
Kinapudnona, adu a di-Saksi ti natulongan. Masansan a ti panangipadalan iti suplay a pangsaranay kadagiti kongregasion dagiti Saksi ni Jehova ti napaneknekan a kapartakan a pamay-an tapno makagteng dagiti suplay kadagidiay agkasapulan. Iti maysa a gundaway, dua a van a napno iti suplay a taraon ti naitulod iti maysa a lokal a bakuitan. Adu nga umasping a pagarigan ti madakamat. Natural laeng nga ipangpangruna dagiti Saksi dagiti miembro ti kongregasionda, tangay iparparegta ti Biblia kadakami: “Aramidentayo koma ti naimbag kadagiti isuamin, ngem nangnangruna kadagidiay nainaig kadatayo iti pammati.” (Galacia 6:10)—ED.
Pannakisalip iti Isports Makariro unay kaniak ti artikuloyo a “Dakes Kadi ti Pannakisalip iti Isports?” (Disiembre 8, 1995), iti panangusarna iti Galacia 5:26. Aniat’ pakainaigan ti libro a Galacia iti isports ken ay-ayam? Sarsaritaen ni Pablo maipapan iti espiritu kontra iti lasag ken ti wayawaya kontra iti panangadipen. Ipaulog ti King James Version dayta a bersikulo kas: “Ditay koma tarigagayan ti barengbareng a dayaw, nga agsisinnulbog iti maysa ken maysa.”
P. O., Estados Unidos
Agpayso a saan nga espesipiko a pampanunoten idi ti apostol ti atletiko a pannakisalip idi insuratna dagidiay a sasao. Nupay kasta, nalawag a mangar-aramid idi ti sumagmamano a Kristiano iti di maiparbeng a panamagdidilig iti maysa ken maysa. Mangpataud daytoy iti ‘nainlasagan’ a kababalin a kas iti ‘guranggura, ringgor, imun, rinnupir, ken pannakabingbingay.’ (Galacia 5:20, 21; 6:3, 4) Pinakdaaran ngarud ni Pablo dagiti Kristiano a dida “mangsulsulbog iti panagsasalisal ti maysa ken maysa.” Sigun iti “The New Thayer’s Greek-English Lexicon,” ti Griego a sao a naipaulog a “panagsasalisal” kaipapananna “kariten ti maysa a makilaban wenno makisalip.” Sigurado nga agaplikar daytoy a prinsipio kadagiti aramid ti isports wenno iti aniaman nga aramid a pakaigapuan ti pannakisalisal dagiti Kristiano iti maysa ken maysa iti di makaay-ayo a pamay-an.—ED.
Aliteracy Nabasak ti artikulo nga “Agaluadkayo iti ‘Aliteracy’” (Enero 22, 1996) ket nagustuak unay dayta nga uray la natignayak nga agsurat ken agyaman iti makaisuro a pagbasaan nga ipapaayyo. Mangted ti panagbasa iti gundawaymi a mangammo iti Namarsua iti uniberso babaen ti nagpateg a Saona, ti Biblia. Adda ngarud pakainaigan ti naespirituan a kinakapuy ken aliteracy.
R. R., Estados Unidos
Nupay nabautisaranakon kas Kristiano iti 28 a tawen ken regular a managbasa kadagiti publikasion ti Sosiedad, itantantanko ken mariknak a mapukpukawko idin ti tarigagayko nga agbasa. Impabigbig ti artikuloyo ti parikutko! Ti pannakirinnasonyo iti daytoy a tema ti nangted kaniak iti insentibo nga agbasa tapno magunggonaak ti bagik.
A. O., Canada