Sakit ti Puso—Pagpeggadan ti Biag
TINAWEN minilion a lallaki ken babbai iti sangalubongan ti maatake iti puso. Adut’ makalasat nga addaan iti sumagmamano a depekto. Dadduma dida malasatan. Kadagiti dadduma nakaro ti pannakadangran ti puso ta “pagduaduaan a makagunggonanto manen ti panagtrabahoda,” kuna ti cardiologo a ni Peter Cohn, ket innayonna: “Nasken, ngarud, a siguden nga agasan dagiti sintoma ti atake ti puso no mabalin.”
Ti puso ket maysa a piskel a mangibomba iti dara iti intero a bagi. No maatake ti puso (myocardial infarction), matay ti dadduma a piskel ti puso no maawanan iti dara. Tapno kanayon a nasalun-at, masapul ti puso ti oksiheno ken dadduma a sustansia nga awiten ti dara. Magun-odanna dagitoy babaen kadagiti coronary artery a nangbalkut iti puso.
Dagiti sakit apektaranna ti aniaman a paset ti puso. Ngem ti kadawyan unay isu ti di madmadlaw a sakit ti coronary artery, a maawagan atherosclerosis. No mapasamak daytoy, adda dagiti plaque, wenno maurnong a taba iti kulapot ti urat. Bayat nga aglabas ti tiempo, umadu ti plaque, tumangken ket pailetenna dagiti urat, ket lapdanna ti panagtaray ti dara iti puso. Daytoy a coronary artery disease (CAD) ti nangnangruna a pakaigapuan ti kaaduan nga atake ti puso.
Ti barado a maysa wenno ad-adu nga urat ti pakaigapuan ti atake no ti puso ad-adu ti kasapulanna nga oksiheno ngem ti suplay. Uray kadagiti urat a saan unay a nailet, mabalin a maburak ti naurnong a plaque ket pakaigapuan ti panagbalay ti dara (thrombus). Dagiti barado nga urat ad-adda met nga agbettedda. Mabalin nga agbalay ti dara iti lugar a nagbetted, ket mangiruar iti kemikal a lalo a mangpailet iti urat, a pakaigapuan iti atake.
No napaut bassit a maawanan ti oksiheno ti piskel ti puso, mabalin a maperdi dagiti kaasibayna a tisyu. Ti piskel ti puso saan nga agpabaro ti tisyu a kas iti dadduma a tisyu. No napapaut ti atake, ad-adda nga agsakit ti puso ket dakdakkel ti posibilidad a matay. No maperdi ti sistema ti panagandar ti puso, mariro ti normal a panagbitek ti puso ket saanen nga agpapada ti panagbitekna. No kasta nga agbaliw ti panagbitekna, kumapuy ti kapasidad ti puso a mangibomba iti umno a dara iti utek. Iti las-ud ti sangapulo a minuto matay ti utek ket dumtengen ti ipapatay.
Gapuna, nasken ti nasapa nga iyaarayat dagiti nasanay a kameng ti medisina. Masalbarna ti puso nga agtultuloy a maperdi, malapdan wenno makorehirna ti agbaliwbaliw a panagbitekna, ken maispalna pay ti biag ti tao.