“Inton Nakapuyak, iti Kasta Nabilegak”
DIMMAKKELAK iti bassit nga ili a maawagan Petaluma iti amianan ti San Francisco, California. Medio relihiosa ni inangko, ngem saan a nasayaat ti panangmatmat ni tatang iti relihion. Kanayon a patiek nga adda namarsua—diak la ngamin ammo idi no asino.
Naragsakak nga ubing bayat a dimmakkelak. Anian a ragsakko a manglagip kadagidiay nga aldaw nga awan pakasiksikorak! Diak impagpagarup idi nga adda gayamen mapaspasamak iti uneg ti bagik a mangikkatto iti kasta unay a wayawayak. Dayta ket idi 1960, ti maudi a tawenko iti haiskul, a malagipko a kasarsaritak idi ti kasingedan a gayyemko maipapan iti panagut-ot ti sumagmamano a ramayko.
Di nagbayag, nangrugin a kimmaro ti ut-ot ti saksakak isu nga impannak ni inangko iti ospital idiay San Francisco, a nakaidalitak iti agarup innem nga aldaw. Agtawenak idin iti 18, ket impalgak dagiti panangeksamen nga addaanak iti rheumatoid arthritis. Nangrugiak a nagpaineksion iti gold sodium thiosulfate, kalpasanna prednisone, sa idi agangay maysa a kita ti cortisone. Tinomarko amin dagidiay nga agas iti 18 a tawen, ket iti tunggal kasasaad, inep-epda ti ut-ot iti sumagmamano a tawen ngem idi agangay, nagin-inut a saandan a nagkurri isu a nagusarak iti sabali manen. Saan a mabalin a di ikankano ti naynay nga ut-ot, ket inkagumaak ti nagbirok iti naiduma a kita ti panangagas. Nakasarakak iti sumagmamano a pagpilian a panangagas nga uray kaskasano ket nakatulong met. Agyamanak ta saanak unayen nga agpapaut-ot a kas idi panawen ti ikakaro ti sakit nga in-inut a nangapektar iti intero a bagik.
Maysa nga aldaw idi 1975, naiparna a nasarakan ti barok ti maysa a rekord a libro nga indulin ni inangko idi ubingak pay laeng. Natakuatak nga idi innem a bulanak pay laeng, rinugiannak nga agasan ti maysa a doktor babaen iti X-ray gapu iti dimmakkel a thymus. Patiek a ti pannakaagasko babaen iti radiasion idi ubingak pay laeng ti mabalin a nakaigapuan ti kasasaadko ita. No agpayso dayta, anian a terible daydi a kamali!
Nakiasawaak idi 1962. Idi 1968, kabayatan ti nasapsapa nga isesekken ti sakitko, agtartrabahokami ken ni lakayko a Lynn iti bukodmi a panaderia. Agriingkami iti agarup alas 4:00 t.b., ket ni lakayko ti agmasa ket kalpasanna rumidep no dadduma kadagiti sako ti arina bayat a malutluto ti tinapay iti urno. Iw-iwaenminto dayta sami isupot, kalpasanna itulod dayta ni Lynn. Sagpaminsan, adda ahente ti seguro a sumarungkar iti panaderia ket nasaona kadakami maipapan iti inkari ti Dios a Pagarian. Nagustuanmi ti nangngegmi, ngem makumikomkam unay idi. Umad-adu dagiti itulodanmi iti tinapay, ket ad-adda a napadagsenankami iti rumangrang-ay a sekular a panggedan. Naimbag laengen ta adda gimmatang iti panaderiami! Nagtrabaho ni Lynn kadakuada, ket nagtrabahoak iti maysa a beauty shop. Nupay kasta, bayat a kimmaro ti arthritisko, tallo la nga aldaw iti kada lawas a makapagtrabahoak ket kamaudiananna, nasken a sumardengakon nga unabes.
Kabayatan dayta a tiempo, kanayon nga adda umay idiay balay a maysa kadagiti Saksi ni Jehova ket paimaannak kadagiti magasin a Pagwanawanan ken Agriingkayo! Kanayon nga ikkak iti kontribusion sa alaek dagiti magasin, iti panangipagarupko a pakpakitaak iti kinaasi. No nakapanawen, ikabilko latta ida iti salansan a diak man la lukiben iti sumagmamano nga aldaw, sa kalpasanna addanto maysa kadakami a mangibelleng iti dayta. Talaga a nakalkaldaang daydi, agsipud ta ap-apresiarenmi itan ti naespirituan a kinapategda. Kadaydi a tiempo, nupay kasta, kasla saan unay a napateg dagiti narelihiosuan a banag.
Sipapanunot Kadagiti Naespirituan a Kasapulanmi
Maysa a rabii, nagsaritaanmi ken ni lakayko no adda pay kadi ad-adu a kaipapanan ti biag ngem ti basta pannangan ken pannaturog ken panagtrabaho a sigagaget. Rinugianmi a sinapul ti espiritualidad nga awan idi iti biagmi. Nakimisakami iti bassit a simbaan iti ballasiw ti kalsada, ngem saanmi a nasarakan ti naespirituan a liwliwa nga in-inanamaenmi. Bin-ig a dagiti lokal a parikutda ti pagsasaritaan dagiti miembro ti iglesia.
Agmakatawenen ti pasaray iyaay ti Saksi a mangmangted kaniak kadagiti magasin, ngem di pay laeng nagbaliw ti ugalik a basta umawat iti magasin agingga a binasak met laengen ti ruar ti Agriingkayo! nga Oktubre 8, 1968 a “Ti Pagarupyo Adayo Pay Ngata?” Nagustuak ti nabasak, ket makaparagsak ta kasta met ti narikna ni lakayko. Nangrugikam a nagadal ket sipapardas nga inawatmi ti kinapudno. Sigagagar nga inawatmi amin dagiti nakaskasdaaw a banag a naadalmi. Nagbautisarkami idi 1969.
Bayat a naglabas ti panawen, marigatanakon a bumangon ken agtugaw ket ad-adda payen no magnaak. Masapul a puersaek dagiti tumengko nga ipilko tapno makastrek ken makaruarak iti kotse. Nasursurok ti agbiag a kakuykuyog ti limitasion ken ut-ot a kanayon a mamagsangit kaniak. Isu a masapul nga agmeyk-apak sakami mapan makigimong wenno rummuar iti tay-ak ti serbisio. Magnaak iti binalaybalay la ketdi no kabaelak. Inkagumaak ti rummuar iti tay-ak ti serbisio maminsan wenno mamindua iti kada lawas, agingga a linapdannakon ti isisikkil ken panagut-ot dagiti tumeng ken sakak. Masansan a madanaganak idi di la ket ta matumbaak ket diak makabangonen. Makatulong ti pannakisaritak ken Jehova. No dadduma, kasta unay ti panagsangitko kenkuana.
Nupay kasta, saan a mabalin nga agsangitak a kanayon. Mabalin nga agmaga ti matmata ti tao nga addaan iti rheumatoid arthritis. Addada tiempo a namagada unay isu a marigatanak nga agbasa. No mapasamak dayta, dumngegak kadagiti tape ti Biblia. Masansan nga agpagnapagnaak a nakakidem agsipud ta ti panagkiremko lidlidanna dagiti matak. Kaslaak bulsek no dadduma. Adda tiempo a masapul a mangikabilak iti artipisial a lulua iti matak iti kada lima minuto. Nakarkaro pay, masapul a pulagidak dagiti matak iti sapsapo sa bedbedak ida iti lima wenno innem nga aldaw agingga nga umimbagda. Narigat ti agtalinaed a siyayaman no ti tao ket makigubgubal iti agpaut a sakit a di nainkalintegan nga inanamaen nga umimbag iti daytoy a sistema.
Idi 1978, masapul nga agusarakon iti wheelchair. Nagrigat nga ikeddeng dayta. Intantanko bayat a maituredko pay, ngem awanen pagpiliak. Ammok idin a dumtengto met laeng ti aldaw, ngem in-inanamaek nga umun-una koman a dumteng ti baro a lubong ti Dios. Gimmatang ni Lynn iti natayag a silia ti draftsman nga adda nalawa a lima-pilid a lansadna. Babaen iti dayta, maiturongko ti bagik iti aglawlaw ti balay.
Maupayak no adda gaw-atek, tangay diak mayunnat ti takiagko ket saan a makapetpet a naimbag dagiti bakkaweng ken killon a ramramayko. Isu a mangusarak iti kayo a “para-gammat.” Babaen iti dayta, mapidutko dagiti bambanag iti suelo, malukatak ti estante ken mairuarko ti pinggan, wenno mangala iti aniaman iti refrigerator. Bayat a napatanorko dagiti baro a kinasigok babaen iti kayo a “para-gammat,” nabaelak nga aramiden ti sumagmamano a trabaho iti balay. Makalutoak, makainnaw, makaplansa ken makupinko dagiti lupot, ken makadalus iti suelo. Mariknak bassit ti agpannakkel bayat a rimmang-ay dagiti abilidadko, ket maragsakanak ta adda pay met laeng maitulongko kadagiti trabaho iti balay. Nupay kasta, ti maaramidak idi iti sumagmamano a minuto ti agkasapulan itan iti adu nga oras.
Panangasaba Babaen iti Telepono
Kalpasan ti sumagmamano a tiempo, timmuredak met laengen a mangpadas iti panangasaba babaen iti telepono. Diak impagarup a maaramidak dayta, ngem ita talaga a matagtagiragsakko dayta ket naaddaanak iti sumagmamanon a balligi. Iti pakasdaawak unay, maipada met la gayam dayta iti panagbalaybalay, iti anag a kabaelak ti makisarita iti tattao maipapan ken Jehova ken dagiti panggepna.
Maysa kadagiti presentasion nga us-usarek mangrugi iti kastoy: “Hello, ni Mr.——kadi daytoy? Siak ni Mrs. Maass. Makisarsaritaak kadagiti tattao iti apagbiit laeng, ket no adda wayayo iti sumagmamano a minuto, mabalinkay kadi a kasarita? (Ti kadawyan a sungbat ket: “Maipapan iti ania?”) Makapadanag a makita ti mapaspasamak ita iti lubong, di ngamin? (Palubosak a sumungbat.) Kayatko nga iranud daytoy a teksto ti Biblia a mangted kadatayo iti napaypayso a namnama agpaay iti masanguanan.” Ibasakto metten ti Kararag ti Apo ken mabalin a ti 2 Pedro 3:13. Nakaitedakon iti sumagmamano a sasarungkaran kadagiti Kristiano a kakabsat a babbai wenno ni Lynn a mangsurnad para kaniak.
Iti adu a tawen, nagadun dagiti naimbag a nakasaritak ken nakaipatulodak metten kadagiti broshur, magasin, ken liblibro kadagidiay nangipakita iti interes. Daddumat’ nangrugi payen a nakipagadal iti Biblia babaen iti telepono. Maysa a babai a nakasaritak ti nagkuna nga umdasen ti panagadalna a bukbukodna. Ngem kalpasan ti sumagmamano a saritaan, immanamong nga umay idiay balaymi tapno agadal iti Biblia, tangay inlawlawagko ti kasasaadko.
Adda tiempo nga idi umaw-awagak, nangted ti telepono nga addaan para sungbat a makina, iti baro a numero. Nupay lokal dagiti kanayon nga awagak ken saan nga iti lokal nga aglawlaw daytoy, nagutugotak nga awagan man laengen ti nasao a numero. Kalpasan ti apagbiit a pannakisaritana kaniak, kinuna ti babai a simmungbat iti telepono a kayatda nga agassawa a maam-ammo dagiti tattao a pudno a Kristiano. Isu a napankam ken ni Lynn idiay balayda, agarup maysa nga oras a biahien, tapno iyadalan ida.
Marikriknak pay met laeng iti rag-o ken ragsak iti pannakisaritak iti sabsabali maipapan ken ni Jehova ken ti karina a baro a langlangit ken baro a daga, a pagtaenganto ti kinalinteg. Itay nabiit, kinuna kaniak ti maysa a babai a sumagmamano a bulanen a kaskasabaak: “Tunggal kasaritaka, maamirisko nga umad-adu ti pannakaammok.” Ammok a ti pannakaammo nga iranranudko iti sabsabali ti mangiturong iti agnanayon a biag ken mangparnuay iti rag-o nga agminar nupay lugpiak. No dadduma, ad-adu ti maaramidak iti serbisio ngem iti dadduma a tiempo, ngem tartarigagayak nga ad-adu pay koma ti kanayon a maaramidak! Patiek nga ammo ni Jehova ti kasasaad ti tunggal maysa ken ap-apresiarenna ti maaramidantayo, nupay kasla bassit. Sangkapanunotko ti Proverbio 27:11: “Anakko, agsiribka, ket paragsakem toy pusok, tapno masungbatak ti mangumsi kaniak,” ket talaga a kayatko ti makikadua kadagidiay mangpampaneknek nga ulbod ni Satanas.
Kanayon a makaparegta ti makigimong, nupay marigatanak a makagteng sadiay. Nagadu a nagsasayaat a probision nga inaramid ni Jehova kadakami tapno mataraonankami a naimbag iti naespirituan isu a kayatko nga usaren ida a naan-anay. Anian a ragsakmi ta inabrasa ti dua nga annakmi ti kinapudno! Nakiasawa ti balasangmi a ni Terri iti nagsayaat a kabsat, ket adda uppat nga annakda a dungdungnguek unay. Anian a makaparagsak-puso a makita a dagiti appokok ay-ayatenda met ni Jehova! Pinili ti baromi a ni James, ken ni baketna a Tuesday ti agserbi ken ni Jehova idiay Bethel sadi Brooklyn, ti sangalubongan a hedkuarter dagiti Saksi ni Jehova, sadi New York.
Naindagaan a Paraiso Babaen iti Pannakabalin ni Jehova
Kanayon nga ikagkagumaak a panunoten ti nakaskasdaaw a kari ni Jehova a paraiso a daga. Uray ita, nagadu ti pinarsuana a pakaragsakan. Tagtagiragsakek ti nagpintas nga ilelennek ti init. Pagay-ayatko dagiti nadumaduma a sabong ken ti ayamuomda. Pagay-ayatko dagiti rosas! Diak makaruar iti balay a masansan, ngem no makaruarak, tagiragsakek a naan-anay ti bara ti init. Agkidemak ket iladawanko ti nagpintas nga aglawlaw iti kabambantayan, a kaduak ti pamiliak a maragragsakan met iti nalawa a karuotan a napno kadagiti atap a sabong. Adda agay-ayus a waig ken nagadu a natubbog, nasam-it a melon para iti amin! No mabaelak la ketdi, agpintaak kadagiti ladawan ti bambanag a tumulong kaniak a mangpanunot iti naikari a naindagaan a Paraiso a dumtengto. Bayat nga agpimpintaak, dardarepdepek nga addaak sadiay. Ammok a mapagbalin ni Jehova nga agpayso dagiti nagpapateg a ladawan iti panunotko nga ipatpategko ita.
Kayatko a lagipen a kanayon ti teksto a Santiago 1:12. Kunana: “Naragsak ti tao nga agtultuloy nga agibtur iti pannakasuot, agsipud ta iti pannakaanamongna awatennanto ti korona ti biag, nga inkari ni Jehova kadagidiay agtultuloy nga agayat kenkuana.” Indilig ni Pablo ti an-annayenna iti ‘maysa nga anghel ni Satanas, nga agtultuloy a mangtungpa kenkuana.’ Inkararagna ken Jehova nga ikkatenna ti sakitna ngem, nabagaan a ti pannakabalin ti Dios napagbalin a naan-anay gapu iti pagkapuyanna. Isu a ti balligi ni Pablo agpapan pay iti pagkapuyanna ket pammaneknek ti pannakabalin ti Dios nga adda kenkuana. Kinuna ni Pablo: “Inton nakapuyak, iti kasta nabilegak.” (2 Corinto 12:7-10) Patiek a ti bassit a maaramidak ita agpapan pay kadagiti limitasionko ket gapu laeng iti pannakabalin ti Dios nga adda kaniak.
Insurat ni Juan ti maysa a pakasaritaan a talaga a mangparparegta kaniak. Maipapan dayta iti maysa a lalaki a naidalit iti langkapi iti 38 a tawen. Isu, agraman ti dadduma pay a masaksakit, ti nagidda a manginanama iti abay ti ban-aw, ta kayatna unay a mabang-aran ti bagina iti dayta. Di makatapog iti danum, a patienna a makaagas kenkuana. Maysa nga aldaw, nakita ni Jesus ket inyimtuodna: “Kayatmo kadi ti sumayaat ti salun-atna?” Anianto ketdin a panagarubos ti luluak gaput’ rag-o a mangsungbat iti dayta a saludsod! “Ni Jesus kinunana kenkuana: ‘Bumangonka, bagkatem ta langkapim ket magnaka.’” (Juan 5:2-9) Adu kadatayo ti mangsegsegga a dumngeg iti kasta nga awis!—Insalaysay ni Luretta Maass.
[Ladawan iti panid 25]
Idi naganaygayak, nadarepdepko ti maysa a mannakigasanggasat a barito a nakakadang nga adda iti sakaananna ti asona
[Dagiti ladawan iti panid 26]
Panangilista kadagiti numero ti telepono agpaay iti tay-ak ti serbisio
Panang-dial iti telepono