Dagiti Karit ken Bendision ti Panangpadakkel iti Pito a Babbaro

Kas insalaysay da Bert ken Margaret Dickman

Naipasngayak idi 1927, idiay Omaha, Nebraska, E.U.A., ket dimmakkelak idiay South Dakota. Malagipko ti kinaubingko kabayatan dagidi naririgat a tawen ti Great Depression (1929-42). Kanayon idi nga agaramid ni nanang iti inawaganna a sopas ti sementerio gapu ta saan unay a nasustansia. Mangikabil iti sangkabassit a manteka iti pariok sana danuman, ket kalpasanna isawsawmi ti tinapaymi iti dayta. Narigat idi ti kasasaad ti adu a pamilia.

SAAN a relihioso dagiti miembro ti pamiliak​—nakitada ti nakaro a panaginsisingpet kadagiti Protestante a relihion iti lugarmi. Para kaniak, ti dua a tawen a kinasoldadok kabayatan ti Gubat Sangalubongan II ti nangtubay iti panunotko. Dita a nasursurok ti aginum ken agsugal.

Idi nagbakasionak manipud iti kinasoldadok, napanak iti salaan iti lugarmi ket naam-ammok ni Margaret Schlaht, balasang nga Aleman-Ukraniano ti pulina. Naginnayatkami, ket kalpasan ti tallo a bulan a panaginnarem, nagkasarkami idi 1946. Naaddaankami iti pito a babbaro iti unos ti walo a tawen, ket babaen ti narigat a kapadasan, nasursuromi ti karit ti panagbalin a nagannak.

Idi 1951, grabe ti pannakaaksidentek iti sawmill ket dandani naputed ti makimbaba a kannigid a takiagko. Kapilitan a nayospitalak iti dua a tawen tapno masukatan dagiti kudil ken tulangko. Kabayatanna, ni Margaret ti nakaammon a nangaywan iti lima a babbaromi. Babaen ti tulong dagiti gagayyem ken kaarruba, napagballigianna dayta a narigat a tiempo. Bayat a nayospitalak, adut’ tiempok a nagpanunot maipapan iti panggep ti biag. Pinadasko a binasa ti Biblia ngem diak unay naawatan dayta.

Kalpasan unay ti panagawidko manipud ospital, immakarkami idiay Opportunity, maysa nga ili idiay Estado ti Washington, ket nakisosioak ken bayawko iti negosio a panagibangon. Ita, palubosak met ni Margaret nga agestoria.

Makumikomak Unay!

Dimmakkelak iti taltalon a nagmulaanmi iti bukbukel, nangpadakkelanmi iti bassit a pangen dagiti magatasan nga animal, ken nagaramidanmi kadagiti de-lata a prutas ken natnateng. Estrikto ti kababalinko nga agtrabaho a nangsanay kaniak kadagiti masakbayan a karit iti biag, a nagadu gayam. Nasaysayaat ti ilulung-awmi idi Depression ngem iti kaaduan, tangay uray kaskasano, kanayon nga adda taraonmi.

Awan tiempo dagiti dadakkelko iti relihion, nupay pasaray tinabunuak ti Sunday school. Kalpasanna, nagkallaysakami ken ni Bert idi 19 ti tawenmi. Saankami a nagkasar iti simbaan​—kinasarnakami ti ministro ti Kongregasion iti simple laeng a seremonia iti salas ti balay dagiti nagannak kaniak. Iti panaglabas ti sumagmamano a tawen, impasngayko ti pito a babbaro​—da Richard, Dan, Doug, Gary, Michael, Ken sa, kamaudiananna, ni Scott, idi 1954. Talaga nga aduda!

Kalpasan nga immakarkamin idiay Opportunity, adda babai nga immay nakisarita idiay balay maipapan iti Biblia. Dinamagko no patienna ti umap-apuy nga impierno, maysa a doktrina a talaga a pagamkak. Anian a bang-arko idi inlawlawagna a saan nga isursuro ti Biblia ti umap-apuy nga impierno ket awan iti Biblia uray ti pannursuro a di matay ti kararua! Agbibiagak idi a mabutbuteng ken kaamakko ti matay ket diak mapagtunos ti umap-apuy nga impierno iti Dios ti ayat. Inkeddengko a pulos a diak isuro ti kakasta a kinaulbod kadagiti annakko.

Idi 1955, rinugiak nga inadal ti Biblia babaen ti tulong ti libro a “Mapapati Coma ti Dios.”a Agasenyo, apag-isu idi a kellaat a naginteres ti Pentekostal a manangaskasaba kaniak ket kayatna nga alawennak manipud kadagiti Saksi ni Jehova! Dakkel a kamalina​—nangrugi nga inkasabana ti umap-apuy nga impierno kaniak! Nangibaon pay iti tallo a Pentekostal a babbai tapno ikagumaandak nga upayen a makiadal kadagiti Saksi.

Kabayatanna, dimngeg ni Bert iti pannakiadalko iti Biblia iti salas. Idi agangay, rinugiannan a basaen ti New World Translation of the Christian Greek Scriptures, ket in-inut a limmawag dagiti bambanag kenkuana. Aginggat’ tengnga ti rabii ti batangna idi iti trabahona. Siempre, nakaturogakon no agawid. Naminsan a rabii, nagin-inayadak nga immulog ket nasukalak nga agbasbasa kadagiti librok! Nagin-inayadak a nagsubli iti iddak, a naragsakanak ta suksukimatennan a mismo dagiti bambanag. Idi agangay, nakipagadal metten iti Biblia, ket idi 1956, nabautisarankami kas Saksi.

Tangay naaddaankami iti pito a babbaro iti walo a tawen, naamirisko a maysa a karit ti panangaramid iti amin nga inaldaw a trabaho a panangpakan ken panangkawes kadakuada ken panangikagumaan a taginayonen ti kinadalus ken kinaurnos ti balay. Nasursuro dagiti babbarok ti tumulong iti trabaho iti balay. Masansan a kinunak nga awan automatiko a dishwasher-ko​—adda pito a babbarok! Adda batang ti tunggal maysa kadakuada iti daytoy napateg a trabaho. Siempre, dakkel a tulong ni Bert. Tinaginayonna ti agpapada a panangdisiplina ken pagannurotan iti balay ngem kanayon a silulukat ti komunikasion. Pagraeman dagiti babbarok ni tatangda ngem dida kaamak. Pulos a saan a naliwayan ni Bert ti rebbengenna a mangisuro kadagiti annakmi maipapan iti kaay-ayoda a lagipen a panangtukoyna “kadagiti billit ken uyokan.”

Nagserbi kas boluntario ti inauna a baromi a ni Richard iti hedkuarter ti Watch Tower Society idiay Brooklyn, New York, idi 1966. Talaga a maysa a pannubok kaniak ti nakitak nga ipapanaw ti inauna iti balaymi. Daydi bakante a tugaw iti lamisaan iti kada aldaw ti namagladingit kaniak. Ngem naragsakanak ta umad-adu ti nagun-odanna a naimbag a kapadasan ken pannakasanay.

Palubosak nga ituloy ni Bert ti agestoria.

Panangpadakkel Kadagiti Babbaromi iti Prinsipio ti Biblia

Nabautisarankami ken ni Margaret iti kombension idiay Spokane, Washington. Ita, addaankami iti karit a mangpadakkel iti babbaromi maitunos kadagiti prinsipio ti Biblia​—iti nalabit awaganyo a kadaanan a pamay-an. Diak pinanuynoyan ti aniaman a panagulbod wenno doble a pagannurotan, ket ammo dayta dagiti babbarok. Insuromi kadakuada a maikari ni Jehova iti kasayaatan.

Nupay kasta, ammoda a makapagpudnoda kaniak agsipud ta nadekket ti relasionmi ken adu dagiti banag nga inaramidmi a sangsangkamaysa. Kas maysa a pamilia, tinagiragsakmi ti mapan iti beach, mapan agpipiknik iti kabambantayan, ket agay-ayam iti softball. Adda taraken ken hardinmi, ket timmulong dagiti babbaromi iti amin a rumbeng a maaramid. Isu a nasursuroda ti agtrabaho ken agay-ayam. Inkagumaanmi ti agbalin a kanayon a natimbeng kadagiti aktibidadmi.

Nateokratikuan a Pannakigasanggasat

Iti naespirituan a dasig, tinabunuanmi amin dagiti Nakristianuan a gimong idiay Kingdom Hall, ket regular ti panagadal ti pamiliami iti Biblia. Idi 1957, tinabunuanmi ti kombension dagiti Saksi ni Jehova idiay Seattle, Washington. Kabayatan ti programa, naawis dagiti pamilia nga umakarda nga agserbi iti lugar a dakdakkel ti pakasapulan kadagiti Saksi tapno ikasabada ti naimbag a damag ti Pagarian ti Dios. Naamiris ti pamiliami a nasayaat dayta, ket rinugianmi nga implano ti iyaakarmi. Immuna a napankami idiay Missouri idi 1958 ken kalpasanna idiay Mississippi idi 1959.

Idi 1958, inaramidmi ti kaunaan a dakkel a nateokratikuan a pannakigasanggasatmi. Nagaramidak iti pagkampo a trailer a guyodenmi babaen ti daan a modelo 1947 a tallo-tugawna, innem-cylinder-na a DeSoto. Iti dayta a tawen, dakam amin a siam ket nagbiahe a nagpa-New York iti dayta a lugan tapno tumabuno iti internasional a kombension. Sumagmamano a lawasmi iti dalan, a nagkampokami iti dalanmi a naggapu iti Spokane, iti West Coast, a nagpa-New York​—nasurok nga 4,200 a kilometro ti kaadayona! Pagay-ayat dagiti babbaromi a lagipen dayta a biahe kas de kalidad a tiempo ken panagragragsak.

Pannakasursuro iti Disiplina Manipud iti Cake

Iti dayta a kombension, nangalakami kadagiti kopiami iti libro a Manipud Paraiso a Napukaw Agingga iti Paraiso a Naisubli.b Dayta a libro agraman ti Biblia ti nagbalin a kangrunaan a teksto ti linawas a panagadal ti pamiliami iti Biblia. Ubbing pay dagiti amin a babbaromi idi nasursuroda ti agbasa. No agawidda idi manipud eskuelaan, mangbusbos ni Marge iti sumagmamano a tiempo a kaduana dagiti ubbing, a denggenna ida nga agbasa iti Biblia. Saanmi nga impalubos a ti TV ti mangdominar iti panunotda.

Adda disiplina ken panagraem iti pamiliami. Naminsan, nagaramid ni Margaret iti dakkel a cake​—maysa kadagiti paglainganna. Carrot ti maysa kadagiti taraon iti dayta nga aldaw. Kanayon a pinaregtami dagiti babbaromi nga uray kaskasano ket manganda iti nateng. Saan a kayat ni Doug ti carrot. Nabagaan a no saan a mangan iti carrot, awan cake a bingayna. Kaskasdi a dina inibus ti taraonna. Kinuna ni Margaret, “No saanmo a kanen dagita a carrot, ti aso ti mangan iti cake-mo.” Talaga a saan a namati ni Doug agingga a nakitana nga inalun-on ni Blackie ti naimas a cake-na! Dayta a kapadasan ti nagnakmanna, ken kasta met dagiti dadduma pay a babbaromi. Kas nagannak, pinaypaysomi dagiti imbagami.

Naragsak ti Biag

Nagpaiwanwankami ken ni Margaret iti imbaga ni Jesus a masarakan iti Mateo 6:33: “Itultuloyyo, ngarud, a sapulen nga umuna ti pagarian ken ti kinalintegna, ket isuamin dagitoy sabsabali pay a bambanag mainayondanto kadakayo.” Kas pamilia, inkagumaanmi nga inyun-una dagiti interes ti Pagarian. Tinagiragsakmi amin ti agkakadua a rummuar a mangasaba, ket nagsisinnublatan dagiti babbaromi ti nakikadua kaniak nga agbalaybalay. Tunggal maysa ket adda bukodna a bag, Biblia, ken literatura ti Biblia. Kinomendaranmi ida iti aniaman nga irarang-ayda. Masansan nga arakupen ida ni Margaret. Kinapudnona, regular nga impakitami kadakuada ti panangdungngo. Kanayon nga adda tiempomi kadagiti babbaromi​—naragsak ti biag!

Bayat a dimmakkel dagiti babbaromi, naaddaanda iti rebbengen kas ti panangdagas kadagiti dadduma a mapan makigimong, manglukat iti Kingdom Hall, ken tumulong iti dadduma pay a trabaho. Nasursuroda nga apresiaren ti Kingdom Hall kas lugar a pagdaydayawan ken tinagiragsakda a mantineren dayta.

Pinaregtami ida a makipaset kadagiti Nakristianuan a gimong. Nangiparangda kadagiti ababa a palawag dagiti estudiante iti Teokratiko nga Eskuelaan ti Panagministro, nga in-inut a nakasursuruanda nga agbalin a pumapalawag. Kanayon a di kayat ti maikalima a baromi a ni Michael ti agpalawag iti publiko ket marigatan a mangipalawag iti pasetna iti plataporma. No katengngaan ti palawagna, mangrugin nga agsangit gapu iti pannakaupay, tangay saanna a mairingpas. Idi agangay, naparmekna dayta, ket itan, kas kasado, agserserbin kas agdaldaliasat a manangaywan, a mangbisbisita iti nadumaduma a kongregasion ken agpalpalawag iti sumagmamano a daras iti kada lawas. Anian a panagbalbaliw!

No Kasano a Minatmatan Dagiti Babbaro ti Disiplina

Kinasarita ti koresponsal ti Agriingkayo! ni Michael tapno maammuan ti kapanunotanna iti pannakapadakkelna iti kadaanan a pamay-an. “Matmatanmi ni Tatang kas nalaing a manangdisiplina. Malagipko nga idi tin-edyerak, napanak nagtrabaho iti maysa nga estasion ti radio. Kayatko nga adda kotsek tapno mabalinak met ti makipaset iti amin-tiempo a ministerio kas payunir. Intukon ti manedyer ti estasion ti dua-ridawna a Ford Mustang-na a mapagbalin nga sporty car a nalatak kadagiti agtutubo. Talaga a nagustuak ti kotse, nupay ammok a saan a praktikal unay a kotse a pangiluganak kadagiti kakaduak a mangasaba. Medio maam-amakak nga immasideg ken ni Tatang. Idi nasaok kenkuana ti tukon, kinunana, ‘Pagsaritaanta dayta.’ Ammok idin ti kayatna a sawen! Nakirinnason kaniak ket impakitana dagiti pagimbagan ti mas praktikal a kotse. Isu a gimmatangak iti uppat-ridawna a sedan, ket kalpasan ti panangusarkon iti dayta iti nasurok a 160,000 a kilometro iti nakaidestinuak a mangasaba, ti laeng maibagak ket, ‘Husto manen ni Tatang.’

“Ti panagakar-akar idi ubbingkami​—manipud Washington a nagpa-Missouri sa idiay Mississippi​—ket naragsak a kapadasan. Tinagiragsakmi dayta. Uray no siamkami a nagnaed iti 2.5 a metro por 11 a metro a trailer iti makatawen, makaparagsak daydi ken sinursuruannakami nga agbalin nga organisado ken agtutunos, uray no nailet ti pagyanan. Siempre, iti ruar ti ad-adu a nagay-ayamanmi.

“Ti maysa pay a malagipko ken apresiarek ket ti wagas ti panangidaulo ni Tatang iti inaldaw a panagtekstomi. Idi 1966, tinabunuanna ti eskuelaan dagiti panglakayen idiay Kingdom Farm, sadi South Lansing, New York, ket nakitana nga agsirsirarak ti pamilia ti Bethel tapno makapagkomentoda maipapan iti teksto iti kada aldaw. Inyaplikarna dayta a sistema iti rutina ti pamiliami. Natudingan ti tunggal maysa kadakami a pito a babbaro nga agkomento iti kada agsapa maipapan iti nasirarakmi. Nupay dumayamudomkami no dadduma, sinursuruannakami nga agsirarak ken agkomento. Agpaut dagiti ugali a kas iti dayta.

“Apresiarek dagiti sakripisio da Nanang ken Tatang para kadakami. Idi mangged koman ti dua a manongko a da Richard ken Dan para iti pamilia, pinaregta ida dagiti nagannak kadakami a mapan idiay Brooklyn, New York, tapno agboluntario idiay sangalubongan a hedkuarter ti Watch Tower Society. Nagurnong met dagiti nagannak kadakami iti kuarta tapno makapageroplano ti uppat kadakami a mapan idiay New York tapno makitami a mismo ti hedkuarter. Dakkel ti naitulong dayta kaniak. Pinarayrayna ti apresasionko iti organisasion ni Jehova.

“Ita palubosandak nga ituloy ni Tatang ti saritaan.”

Addada Nagkonsumisionanmi

Kas iti dadduma a pamilia, naaddaankami kadagiti problema ken konsumision. Idi nakagtengen dagiti babbaromi iti edad a mabalindan ti agarem, masapul a balakadak ida a saanda nga ikallaysa a dagus ti umuna a balasang a makursunadaanda. Siniguradomi met nga adda maitutop a chaperonda. Kayatmi a maaddaanda iti sumagmamano a kapadasan iti biag sakbay a pilienda ti agpaut biag a kasimpungalan. No dadduma, nagsangit ken nasairda iti apagbiit, ngem idi agangay, nabigbigda ti kinasirib ti balakad ti Biblia​—nangnangruna ti makiasawa “iti Apo.” Kinomendaranmi ida iti kinasiribda.​—1 Corinto 7:39.

Adda inaramid ti maikapito a baromi a ni Scott a nagsangitanmi. Intulokna a dakes dagiti nakikaduaanna idiay pagtrabahuanna. Kamaudiananna, nailaksid manipud iti kongregasion. Nakasasaem dayta kadakami amin, ngem rinaemmi ti hudisial a pangngeddeng dagiti panglakayen. Masapul a masursuro ni Scott babaen ti nasaem a kapadasan a ti panagserbi ken Jehova ti kasayaatan a dalan ti biag.

Pulos a dikam naawanan iti namnama nga isut’ agsubli iti kongregasion. Makaparagsak ta kalpasan ti lima a tawen, isut’ naisubli iti kongregasion. Iti pananglagipna, kunana, “Maysa a banag a nakatulong kaniak idi nailaksidak ket nupay limitado unay ti pannakilangenko iti pamiliak, kanayon nga ammok nga ay-ayatennak ti pamiliak.” Nagtultuloy a rimmang-ay ni Scott ket agserserbin kas panglakayen iti napalabas a walo a tawen.

Ti maysa pay a nakalkaldaang a napasamak ket nailaksid idi 1998 ti maysa kadagiti appokomi nga agtawen iti nasurok a 20. Ngem naliwliwakami a ti disiplina manipud ken Jehova ket mangibunga kadagiti positibo a panagbalbaliw.

Dakkel a Panagbalbaliw iti Biagmi

Kamaudiananna, idi 1978, pimmanaw aminen dagiti annakmi iti pagtaengan. Iti panaglabas dagiti tawen, nakagun-odak iti kapadasan iti heating, ventilation, ken air-conditioning system. Idi 1980, dakam ken ni Margaret ket immawat iti nakaskasdaaw nga imbitasion nga agserbi idiay hedkuarter ti Watch Tower Society sadi Brooklyn iti siam a bulan. Sangapulo ket walo a tawen kalpasanna, addakami pay laeng ditoy!

Siwawadwad a nabendisionankami. Saan a kanayon a nalaka ti mangpadakkel iti babbaromi iti kadaanan a pamay-an, sigun kadagiti prinsipio ti Biblia, ngem nagunggonaankami. Ti agdama a kasasaadmi ket lima kadagiti annakmi ti agserserbi kas panglakayen iti kongregasion, ket maysa ti agdaldaliasat a manangaywan. Adda 20 nga appokomi ken 4 nga appoko iti tumeng​—ket adda iti kinapudno ken matalek iti Dios ti kaaduan kadakuada.

Naimatanganmi ti kinapudno ti sasao ti salmista: “Kitaenyo, dagiti annak isuda ti pagpatawid ni Jehova: ket ti bunga ti tian isu ti panggunggonana. Kas kadagiti pana iti ima ti nabileg a lalaki, kasta dagiti annak ti agkabannuagan.”​—Salmo 127:3, 4.

[Dagiti Footnote]

[Dagiti ladawan iti panid 20, 21]

Kaduami dagiti annakmi ken mamanugangmi (kannawan) ken appokomi (adayo a kannawan) iti maika-50 nga anibersariomi, idi 1996