Bukbukel a Nagbunga Kalpasan ti Adu a Tawen

Ti sumaganad a surat ket naawat kas resulta ti artikulo a “Dagiti Karit ken Bendision ti Panangpadakkel iti Pito a Babbaro,” iti “Agriingkayo!” nga Enero 8, 1999.

Patgek a Brother ken Sister Dickman,

Kabasbasak ti pakasaritaanyo, ket masapul a suratankayo. Am-ammok ti pamiliayo adu a tawenen ti napalabas idiay Mississippi [1960-61]. Kinapudnona, kaeskuelaak idi ti babbaroyo, ket pasaray mapanak idiay balayyo ken masansan idi nga agaayamkami. Ngem saan a dagitoy ti kangrunaan a nayukuok iti naganus idi a panunotko. Uray ubingak pay idi, dayawek ti kinapudno a saan a nagsaludo dagiti babbaroyo iti bandera idiay eskuelaan gapu iti Nakristianuan a konsiensiada. Nupay miembroak idi iti Grandview Baptist Church, idi inlawlawag kaniak ti maysa kadagiti babbaroyo ti takderna, ammok a husto ti imbagana.

Maysa kadakuada ti nangted kaniak iti libro a Manipud Paraiso a Napucaw Agingga iti Paraiso a Naisubli,a wenno tinakawko dayta. Diak malagipen no kasano, ngem binasak amin dayta. Para kaniak idi, maysa laeng dayta a napintas a libro dagiti estoria. Diak impagarup a dagiti bukel ti kinapudno ket naimula gayamen a nagtalinaed a di nagtubo iti adu a tawen.

Immakar ti pamiliak iti Amianan idi 1964, ket nagsardengak a makimismisa. Naupayak gapu iti panaginsisingpet ti relihion, isu nga adu a tawen a diak kayat ti makinaig iti organisado a relihion.

Adu a tawen kalpasanna, idi rinugiak a panunoten a naimbag ti panggep ti biag, naamirisko a kayatko a maaddaanak iti relasion iti Namarsua. Kayatko a dayta a relasion ket saan a nagamporan iti panaginsisingpet ti relihion. Nangrugi ngaruden a timmarubong dagiti bukel ti kinapudno a naimula adun a tawen ti napalabas; diak pay la ngamin naamiris idi.

Sangkapanunotko ti kinapudno a diak kayat ti mapan idiay langit; kayatko ti agbiag ditoy daga a mismo. Patiek a daytoy a planeta ket napintas ken nakaskasdaaw a parsua, isu nga apay a dadaelen ti Dios dayta? Kasta met a diak patien a Dios ni Jesus. No isu ti Dios, bugos ngarud ti indatonna. Dagitoy a kapanunotan, rikrikna, ken pammati, no kastat’ pangawag ti maysa, ket saan a maitunos iti naadalko iti Baptist Church. Isu a nangrugiak a nagkararag, talaga a nagkararagak, ken dagus a nagtignay ni Jehova. Dua la nga aldaw ti napalabas, addan dagiti Saksi iti ridawko, ket dagus a nairugi ti panagadal iti Biblia. Nupay awan a pulos ti nakasaritak a Saksi ni Jehova nanipud idi nakigayyemak iti pamiliayo agingga idi nangrugiak a nakiadal, nagtalinaed ti panagraemko kadagiti babbaroyo ken iti kinaturedda a mangitandudo iti umiso. Idi narugianen ti pannakiadalko ken naaddaanakon iti pannakaammo, addan kaes-eskan ti amin a banag kaniak. Makatawen ket kagudua sakbay a nagbalin a naurnos ti biagko. Nagangayanna, nabautisaranak idi 1975.

Kada usigentayo ti impormasion no kasano a ti kababalintayo ket makaipaay iti pammaneknek nupay ditay mapupuotan dayta, malagipko ti pamiliayo. No us-usigentayo ti kinapateg ti panangimula iti adu a bukel ti Pagarian agsipud ta saantay a kanayon nga ammo no agramutto dayta, ammokon, manipud iti mismo a kapadasak no kasano ti kinaagpayso daytoy.

Kayatko ti agyaman kadakayo iti panagbalinyo a maysa kadagiti tattao ni Jehova ken ti kinasungdoyo kadagiti patpatienyo uray pay idin. Saanyo ammo nga adda gayam natulonganyo a nangbirok iti kinapudno. Sapay koma ta agtultuloy nga agraniag ti kinapudno babaen ti kababalin ken pammatiyo a sangapamiliaan. Impagarupko no diak maammuanen ti nagbanaganyo wenno diakon makapagyaman pay. Ulitek, pagyamanan.

Buyogen ti napalaus a Nakristianuan nga ayat,

L. O.

[Footnote]