Mulmula Kontra Polusion

NAPAUT, nangina, ken masansan a narigat a trabaho ti mangikkat kadagiti nangmulit iti kontaminado a daga ken danum. Nupay kasta, mapampaneknekan a kabaelan dagiti ordinario a mula nga aramiden nga is-isuda dayta a trabaho.

Pampanunoten dagiti sientipiko ti panangusar kadagiti gagangay a pondweed ken periwinkle a pagdalus kadagiti nabayagen a nakaipempenan dagiti igam sada pasayaaten ti daga. Kadagiti eksperimento, nagsayaat ti panangagsep dagiti isterelisado a parrot feather ken periwinkle iti TNT ta iti las-ud ti makalawas, awanen ti natda nga eksplosibo iti tisyu dagiti mula, ket ti pananguram kadakuada saan met a nangpataud iti ibebettak! Nadiskobre ti dadduma pay a managsirarak a kabaelan dagiti selula ken tutot ti ordinario a sugar beet nga agsepen ken runawen ti nitroglycerin.

Ti ngay danum a kontaminado unay iti radioaktibo? Agparang a makatulong dagiti sunflower. Nausar dagiti innem a lawasda a sunflower a mangtaming iti kontaminado a basura a danum iti din maus-usar a paktoria ti uranium idiay Ohio, E.U.A. Ti resultana? Nakissayan ti kontaminasion ti uranium manipud iti promedio a 200 a mikrogramo iti kada litro agingga iti natalged a limitasion a 20 a mikrogramo iti kada litro. Impakita ti dadduma pay a pannubok iti reaktor ti Chernobyl, nga asideg idiay Kiev, nga inagsep dagiti sunflower ti 95 a porsiento iti radioaktibo nga strontium ken cesium iti las-ud ti sangapulo nga aldaw!

Mabalin nga usarenton dagiti mannalon ti yellow iris ken bulrush kadagiti panangikagumaanda a liklikan ti panangmulit dagiti pestisidio ken herbisidio iti padanum. Daytoy a proseso ti panangikkat iti kontaminasion ti nangnangruna nga aramiden dagiti mikrobio iti ramramut ti mulmula a mangrunaw kadagiti mangmulit ken mangdalus iti danum.

Dagiti nadakamat a pagarigan ti mangyilustrar iti nakaskasdaaw a kabaelan ti daga a mangdalus iti bagina.